ISAIAH 16 - Hakcipta - Biatah Bidayuh

Mating Pingarap Moab

¹ So kupo Sela di tarun tana-pajam daya Moab pait ndi anak biri ndu pinganggen di sianŭ adi mritah Jerusalem.

² Ngara kajŭn di tabing Yang Arnon ka panu ngga dŭh puan pinijū ngara, mun manuk adi dog kasig so sarin-i.

³ Ngara nang di daya Judah, “Kidaan di kieh ani patut ami ndai. Grindung kieh mun tŭngŭn kayuh nggen sayung di yun kumbeng, ka bada kieh rŭŭ di sayung ngan. Kieh inŭh daya adi bu mangān rais adŭp ami; sukan kieh di tarun yŭn daya dŭh tungang dapŭd kieh.

⁴ Bada kieh rŭŭ di tarun tana ngan. Grindung kieh so daya adi an pirabur kieh.” (Pingandai kinanyuh ka pinyirusag re ko, ka ngara adi pirusak rais re mating tia.

⁵ Komŭnŭ ndi naan so sesang David re jadi raja, ka ayŭh re mritah daya ngga pinyitŭtŭd ka pinyirindu. Kayuh adi batur ayŭh rikas ndai, ka pinyitŭnggŭn ayŭh pimanu.)

⁶ Daya Judah nang, “Kieh mbŭh dingah munki masam sambuh-i daya Moab. Kieh puan ngara minyu gambung ka miruap, pak pinganang ngara inŭh au-tarun.”

⁷ Daya Moab re sien sabab pinyusah ngara. Sopŭrŭg ngara re muās kan ngara ingat pinguman adi kana adi ngara ko man di kupo Kir Heres. Pingarap ngara re miyap.

⁸ Teya teya adi sindŭk Heshbon ka teya anggor Sibmah mbŭh dog pirusak; teya anggor anŭ adi piruah wain adi ari bada pimritah bangsa mabuk. Muko ndi sidah, tŭngŭn tŭngŭn anggor biratau bayah ndŭg kupo Jazer, ndŭg tarun tana-pajam di parad ka timor, ndŭg pah mandi Rawŭt Pide di parad ka barat.

⁹ Madin aku muās tŭngŭn tŭngŭn anggor Sibmah mun aku muās Jazer. Aku muās Heshbon ngga Elealeh, sabab diginŭ mbŭh mating pingatŭm ngga pigaŭn atin daya.

¹⁰ Madin mating daya gaŭn di tana ŭmŭh adi damŭn. Mating daya nyirais puan kah daya biragu di teya anggor. Mating daya mu-ngindik buwa anggor ngga ndai wain; sirais gaŭn mbŭh mating.

¹¹ Aku nyidaing ngga susah yŭn Moab, aku muās Kir Heres.

¹² Daya Moab pirarah adŭp ngara maad sandah di bisambah di bari-sambah ngara, pak mating utung-i di ngara.

¹³ Anŭ inŭh agah adi TUHAN diŭ nggen pasar Moab.

¹⁴ Ka TUHAN ko diŭ nang, “Darŭm tipuh taruh sawa pinyikaya bās Moab re miyap. Daya-i adi ko bagŭ, nisŭ adŭ adi re babŭ udip; ka ngara anŭ re rumuh.”