ISAIAH 15 - Hakcipta - Biatah Bidayuh

Tapa Re Pirabur Moab

¹ Ati inŭh agah pasar Moab. Kupo Ar ngga kupo Kir mbŭh dog pirabur darŭm ndi ngarŭm, ka ndi tarun tana Moab mbŭh pajam.

² Daya Dibon maad sandah re muās di bari-sambah. Daya Moab nangŭng sien darŭm susah muās kupo Nebo ngga Medeba; ngara gumbak ubok ngga gagap ngara darŭm susah.

³ Daya di aran nēn banang guni; di pakan kupo ka di tibung ramin daya muās ka sien.

⁴ Daya Heshbon ngga Elealeh nyikaong, ka kaong ngara tungang dog dingah jeh ndŭg Jahaz. Bara soldadu gŭh kimŭtŭr; pinyipagan ngara mbŭh mating tia.

⁵ Aku masi kiris Moab! Daya adi rŭŭ diginŭ mbŭh bu ka kupo Zoar ngga kupo Eglath Shelishiyah. Agi adi maad aran ka Luhith, sien buang ngara panu; agi adi bu ka Horonaim, sien bana.

⁶ Anak sungi Nimrim mbŭh badŭh, kupai di bŭngŭn-i mbŭh rayu, ka mating adŭ kayuh barŭm dŭm.

⁷ Daya mutas Yang Poplar, suba bu ngga sopŭrŭg buat-rata ngara.

⁸ Di barang yŭn di arong baat Moab sirŭŭn daya sien dog dingah; dog dingah di kupo Eglaim ngga di kupo Beerelim.

⁹ Di kupo Dibon piin sungi bireh bada deya, ka Tapa mbŭh sidia kayuh adi rabis arap yŭn bara daya diginŭ. Sawŭ, barang naan daya adi dŭm di Moab re dog siŭ.