HOSEA 6 - Hakcipta - Biatah Bidayuh

Daya Israel Dŭh ngga Siabo Atin Marik Pimudip Ngara Pari ka Tapa

¹ Daya Israel nang, “Ja pari ka TUHAN! Ayŭh kinaman ata, pak Ayŭh tatu re pibua ata; Ayŭh bada ata tawan, pak Ayŭh tatu re marut tawan ta.

² Darŭm duwŭh puan kah taruh andu Ayŭh re pibua ata, ka ata re udip di sirung jawin-I.

³ Ja ata suba puan TUHAN. Ayŭh re sawŭ mandŭg ka ata nimun batŭh andu sawŭ re makat, nimun ujen adi misa tana sawŭ re mandŭg di tipuh bunga.”

⁴ Pak TUHAN nang, “Israel ngga Judah, ani re Ku ndai di angān? Pinyirindu ngan di Aku rikas miyap mun abun isan isan; ayŭh mun sipot-abun, adi miyap awar isan isan.

⁵ Anŭ sabab Aku mbŭh pait bara nabi Ku ka angān ngga ajar pasar ukum ka pinyirusag. Kayuh adi Aku raan so angān inŭh sanang dog mirati:

⁶ Aku raan pinyirindu ngan adi dŭh bisa birubah, dŭh-i sadis dāng ngan. Aku raan dŭ daya Ku puan Aku so sadis badang adi dog jugan ka Aku.

⁷ “Pak kan ngara mbŭh mŭrŭt tarun tana Adam, ngara miranggar simanya adi Aku mbŭh ndai ngga ngara.

⁸ Gilead inŭh kupo adi puno ngga daya adi arap ka pinyiŭ.

⁹ Bara imam mbŭh mun bara pirupak adi tuman daya. Ndŭg ka di aran nuju tarun kudus di Shechem ngara siŭ daya. Ka anŭ ngara ndai ngga singaja!

¹⁰ Aku mbŭh kiris kayuh adi raru sipŭ di Israel: daya Ku mbŭh nyembar adŭp ngara nyambah tibudo.

¹¹ “Mun angān, daya Judah, Aku mbŭh miratak jam ngga ngukum angān ani, amai kayuh adi angān mbŭh ndai.