HOSEA 4 - Hakcipta - Biatah Bidayuh

TUHAN Nyarah Israel

¹ TUHAN nyarah daya adi rŭŭ di tarun tana ati. Dingah Israel, kayuh adi-I nang, “Mating pinyitŭtŭd bait kah pinyirindu di tarun tana ati, ka daya dŭh ngaku Aku ati Tapa.

² Ngara ndai janji ka miranggar-i; ngara kadong, siŭ daya, naku, ka bikandak. Sarah adi barang ka mun-i bitambah, ka birijut adŭ daya dog siŭ.

³ Tarun tana re badŭh, ka barang masam kayuh dieh re kabŭs. Sopŭrŭg dāng ngga manuk, ndŭg ka iken, re kabŭs.”

TUHAN Nyarah Bara Imam

⁴ TUHAN nang, “Manyah daya nyarah daya Ku bait nang ngara. Aku nyarah angān bara imam.

⁵ Sandu singarŭm angān ndai sarah, ka bara nabi mun angān gŭh. Aku re pirabur Israel, sindŭ ngan.

⁶ Daya Ku re rabur amai ngara dŭh ngaku Aku. Angān bara imam abah ngaku Aku ka mbŭh tirawan ajar Ku, ngapŭi Aku tirawan angān ka re dŭh ngaku bara anak ngan keya bara imam Ku.

⁷ “Kiang bara imam bagŭ, tanŭ ka angān bidosa rawan Aku, ngapŭi Aku re pimangŭh angān.

⁸ Angān bitambah kaya so dosa daya Ku, ka angān raan ngara ari bidosa.

⁹ Angān re sua kinyam ukum adi Aku re nggen di daya Ku! Aku re ngukum angān yŭn arap adi mbŭh ngan ndai.

¹⁰ Angān re man utung ngan so sadis sadis anŭ, pak re babŭ sibŭrŭk. Angān re nyambah tapa pimuah, pak re babŭ dŭh biyŭn anak, sabab angān mbŭh nyipunok Aku ka di nyambah tapa bŭkŭn.”

TUHAN Nunggu Bisambah Adat Karŭm

¹¹ TUHAN nang, “Wain, adi amba ngga adi bauh, mbŭh pirusak pikir daya Ku!

¹² Ngara mite pinandŭng so supek kayuh! Ndi apŭg kayuh kidaan di ngara kayuh adi ngara raan puan! Ngara mbŭh tagan Aku. Mun dayung adi mbŭh jadi dayung sundar, ngara mbŭh nggen adŭp ngara di tapa bŭkŭn.

¹³ Di tarun tarun yŭn bisambah adat karŭm di tibung darŭd ngara jugan sadis, ka di dudu sandah ngara badang kimanyan di ribo tŭngŭn kayuh adi bagŭ ka mirayap daan-i, sabab sayung-i kana! “Ngapŭi meh, anak anak dayung ngan jadi sundar, ka iban iban dayung ngan tanggah.

¹⁴ Pak Aku dŭh ngukum ngara yŭn pingandai anŭ, sabab adŭp ngan mbŭh ruah ngga dayung sundar bari-sambah, ka samah ngara angān mbŭh jugan sadis adat karŭm. Sak adi nang pinganang pitas, ‘Daya adi dŭh biyŭn pikir re binasa.’

¹⁵ “Sunggu angān daya Israel dŭh tŭtŭd di Aku, dŭhnyah gŭh angān ndai simŭnŭ. Dŭhnyah bisambah di Gilgal bait di Bethaven, puan kah ndai janji diginŭ ngga adŭn TUHAN adi udip.

¹⁶ Daya Israel baking mun kuda pinakan kaldi. Munki meh Aku re paan ngara mun biri di tarun tana kupai adi bayah?

¹⁷ Daya Israel mbŭh ripong di tibudo. Tandah adŭ ngara mun anŭ.

¹⁸ Ripas nok wain, ngara nyundar ngga sanang asŭng, raan dŭ dog ngamun so dog stabi.

¹⁹ Ngara re dog taban bu mun adi dog poh sabak, ka ngara re mangŭh ngarun sadis adat karŭm ngara.