HOSEA 1 - Hakcipta - Biatah Bidayuh

¹ Ati inŭh agah adi TUHAN nggen di Hosea anak Beeri di jaman Uzziah, Jotham, Ahaz, ka Hezekiah jadi raja Judah, ka Jeroboam anak Jehoash jadi raja Israel.

Sawŭn Hosea ngga Bara Anak-I

² Kan TUHAN sibungas-I minyu ngga Israel so baba Hosea, Ayŭh nang di Hosea, “Sawan kuu; sawŭn mu re dŭh tŭtŭd, ka bara anak mu re batur mun ayŭh. Simŭnŭ inŭh, daya Ku mbŭh tagan Aku ka mbŭh dŭh tŭtŭd.”

³ Jadi Hosea sawŭn dayung dŭn Gomer, anak Diblaim. Ripas sibungas anak ngara, anak dari, dog biranak,

⁴ TUHAN nang di Hosea, “Kadŭn ayŭh ‘Jezreel,’ amai dŭh dŭm tui Aku re ngukum raja Israel sabab daya daya adi mbŭh dog siŭ babai-i Jehu di Jezreel. Aku re pirarap taris asar pinyipritah Jehu

⁵ Ka di tika anŭ Aku re pirusak kuasa bara tibaran soldadu Israel di Rubān Jezreel.”

⁶ Gomer bite dinge ka biranak anak dayung. TUHAN nang di Hosea, “Kadŭn ayŭh ‘Dŭh-dog-masi’, sabab Aku re dŭh tia masi di daya Israel bait apun ngara.

⁷ Pak Aku re masi di daya Judah. Aku, adi TUHAN Tapa ngara, re nyiramat ngara, pak Aku dŭh re nyiramat ngara pakai perang, pedang bait bawŭh ka reja-panah, bait pakai kuda ngga pinunggang kuda.”

⁸ Ripas anak dayung Gomer mbŭh dŭh tia sisuh di adŭp-i, ayŭh bite dinge ka biranak anak dari dinge.

⁹ TUHAN nang di Hosea, “Kadŭn ayŭh ‘Dŭh-daya-Ku’, sabab daya Israel mbŭh dŭh daya Ku, ka Aku dŭh Tapa ngara.”

Israel re Pari Kana Mun adi Dawŭ-I

¹⁰ Daya Israel re mun sumat di rawŭt, rabis so tungang dog mirang bait dog ngŭkŭd. Madin Tapa nang di ngara, “Angān dŭh daya Ku,” pak andu-i re mandŭg adi ngga Ayŭh re nang di ngara, “Angān inŭh bara anak Tapa adi udip!”

¹¹ Daya Judah ngga daya Israel re jadi ndi. Ngara re mien yŭn adŭp ngara ndi naan adŭ pinguru, ka ngara re pari bitambah bagŭ ka udip mujur di tarun tana ngara. Sawŭ, andu Jezreel inŭh re andu adi bās!