HABAKKUK 2 - Hakcipta - Biatah Bidayuh

Pinyinam TUHAN di Habakkuk

¹ Aku maad tawā ku ka kajŭn kayuh adi re TUHAN kidaan di aku ka ani pinyinam-I di pingandu ku.

² TUHAN nggen di aku pinyinam ati: “Nuris ngga nakit di papan tana-riyat kayuh adi Aku pinandŭng di kuu, isa-i sanang dog basa.

³ Nuris-i, sabab gibayuh tika-i jadi bitŭtŭk. Pak tika-i re rikas mandŭg, ka kayuh adi Aku kiren di kuu re sawŭ jadi. Mun adi sais, pak kajŭn adŭ; kayuh anŭ manŭn re jadi, ka dŭh-i re dog pirambat.

⁴ Ka ati inŭh pinganang anŭ: ‘Ngara adi arap re binasa, pak ngara adi tŭnggŭn re udip sabab ngara tŭtŭd di Tapa.’ ”

Pinyirabur Daya adi Dŭh Tŭnggŭn

⁵ Pinyikaya bisa nipu daya. Daya adi tama inŭh gambung buang girungos, keya ka adŭp pinyikabŭs taŭn dŭh pandai puas. Ngapŭi ngara ngarah bangsa ndi ngga bangsa andi yŭn adŭp ngara.

⁶ Ngara adi dog ngarah re kinuas ka ngamun daya adi ngarah ngara. Ngara re nang, “Mbŭh payah inŭh angān adi tambit kayuh adi dŭh angān dapu! Ndŭg sinde angān re babŭ jadi kaya amai takan daya bayar utang?”

⁷ Pak diŭ so angān rada-i, adŭp ngan adi mbŭh ngarah daya bŭkŭn re birutang ka dog takan bada bayar samŭn anak duit. Bara pinganyu re mandŭg ka bada angān kimŭtŭr taru. Ngara re pirinda angān!

⁸ Angān muko sirapas ratā bangsa bangsa, pak madin ngara adi babŭ udip re sirapas ratā ngan sabab pinyiŭ ngan, ka sabab pinyiganas ngan di tunduh daya di ong ngga kupo kupo-i.

⁹ Mbŭh payah inŭh angān! Angān mbŭh bada rawang ngan kaya ngga kayuh adi angān tambit ngga pinyiganas, ka mbŭh suba bada ramin arŭn adŭp ngan siramat so kayuh adi bisa kandam ka pirusak!

¹⁰ Pak atur kraja ngan mbŭh taban mangŭh ka rawang ngan. Darŭm angān pirabur bagŭ bangsa angān mbŭh taban pinyirabur ka adŭp ngan.

¹¹ Ndŭg batuh sindung nyirais nyarah angān, ka angū sirais anŭ ruah so asah kasu kasu.

¹² Payah inŭh angān! Angān pijog kupo so pingandai sarah ka so pinyiŭ.

¹³ Bangsa bangsa adi angān ngarah kubo turang udas ngara ndai kayuh pak dŭh biyŭn rati, ka sopŭrŭg kayuh adi ngara pijog abo dog badang apui. TUHAN Bisa-pŭrŭg adi ndai-i simŭnŭ.

¹⁴ Pak ong re puno ngga pinyipuan pasar bragah TUHAN nimun rawŭt puno ngga piin.

¹⁵ Mbŭh payah inŭh angān! Ngga baji ngan angān ngamun ka pimangŭh rasū ngan; angān bada ngara tibabeu mun adi mabuk.

¹⁶ Madin adŭp ngan re dog pimangŭh ka dŭh dog stabi. Adŭp ngan re nok ka tibabeu. TUHAN re bada angān nok so saker ukum, ka udip stabi ngan re marui jadi mangŭh.

¹⁷ Angān mbŭh tabŭng tuān Lebanon; madin adŭp ngan re dog tabŭng. Angān siŭ dāng dāng adi darŭm-i; madin dāng dāng re pitaru angān. Kayuh ati re jadi sabab angān mbŭh siŭ daya ka sabab pingandai ganas ngan di daya di ndi ong ong ngga di kupo kupo-i.

¹⁸ Ani guna-i tibudo? Anŭ batur-i kayuh adi manusia ndai, ka kayuh adi angān dapŭd so tibudo kaŭs-i pinganang kadong. Ani utung-i yŭn daya adi ndai tibudo? Tibudo dŭh bisa minyu!

¹⁹ Mbŭh payah inŭh angān! Angān nang di apŭg kayuh, “Burah!” puan kah di panggar batuh, “Makat!” Bisa kah tibudo pinandŭng kayuh di angān? Bait-i dog marut ngga pirak puan kah mas, tibudo anŭ dŭh biyŭn asŭng.

²⁰ TUHAN agi di Ramin-I adi kudus; barang naan daya di ong patut pajam di sirung jawin-I.