HABAKKUK 1 - Hakcipta - Biatah Bidayuh

¹ Ati inŭh pinganang adi TUHAN pinandŭng di nabi Habakkuk.

Habakkuk Mingungut pasar Pinyitŭnggŭn dŭh dog Pimanu

² O TUHAN, ndŭg sinde aku bagan mite turung? Sinde Kaam re dingah aku ka nyiramat kieh so pinyiganas?

³ Mani Kaam tandah aku kinyam pinyusah adi mun ati? Simuki Kaam tan kiris daya ndai sarah? Pinyirabur ngga pinyiganas taŭn mbŭh dog ndai maning aku, ka kaii ngga karit mbŭh di barang yŭn.

⁴ Ukum-adat ramah buang dŭh biguna, ka pinyitŭnggŭn bŭn dog pimanu. Daya arap ari ngarah daya adi tŭnggŭn di tika bisara; ngapŭi meh pinyitŭnggŭn mbŭh jadi bidikok.

Pinyinam TUHAN

⁵ Komŭnŭ TUHAN nang di daya-I, “Nakit tingga bangsa bangsa adi maning angān, ka angān re gŭgŭh bada kayuh adi angān kiris. Aku re ndai kayuh adi dŭh angān sabah kan angān dingah-i.

⁶ Aku re bada daya Babylonia bikuasa, ngara adi mangah ka girungos. Ngara baris di ndi ong ong nyerang rais rais bŭkŭn.

⁷ Ngara bada daya taru ka tikaran di barang yŭn. Ngara raru gambung ndŭg ka nang sopŭrŭg pingandai ngara inŭh batur nanyam ka ukum-adat.

⁸ “Kuda kuda ngara bikaduh daras dŭ so cheetah, buang mangah dŭ so kasong tarun adi sibŭrŭk. Bara soldadu pinunggang kuda ngara mandŭg so rais rais adi jo. Kuda ngara bikaduh taban ngara nyurong mun beuh mūn nyambar dangah-i.

⁹ “Bara tibaran soldadu ngara masang ka nyerang ngga ganas, ka sopŭrŭg daya mbŭh tikaran darŭm ngara masang. Bara daya adi ngara mbŭh nakap raru bagŭ mun sirah sumat.

¹⁰ Ngara ngamun raja raja ka tawŭh bara pinurung pritah adi baga pangkat. Mating kuta tungang bitan ngara. Ngara nugung tana di sindung kuta ka sirabut-i.

¹¹ Komŭnŭ ngara rasu miyap mun sabak. Kuasa ngara inŭh tapa ngara.”

Habakkuk Ngadu Ka TUHAN dinge

¹² TUHAN, so sibungas-i Kaam inŭh Tapa. Kaam inŭh Tapa ku, kudus buang udip adu adu. TUHAN, Tapa ku, pinyigrindung ku, Kaam mbŭh mien daya Babylonia ka bada ngara bake isa ngara ngukum kieh.

¹³ Pak simuki Kaam tan kiris daya adi arap buang ginaka mun ngara? Batŭh Mai raru kudus re tingga kayuh adi arap, ka Kaam dŭh tan kiris daya ndai sarah. Ka mani meh Kaam pajam kan ngara bada daya adi rabis tŭnggŭn so adŭp ngara sangsara?

¹⁴ Simuki Kaam bada daya mun iken bait mun dāng adi bigawang adi dŭh biyŭn pimritah adi tukang nguru ngara?

¹⁵ Daya Babylonia nakap daya ngga sikait, ngga bada daya mun iken. Ngara batak daya ngga jaring ka nyirais angan amai mbŭh agi dog nakap.

¹⁶ Ngara nyambah jaring ani ka jugan sadis ka jaring anŭ, sabab jaring ngara mbŭh nggen di ngara sopŭrŭg kayuh adi siabo kana.

¹⁷ Ngara re adu adu pakai pedang kah, ka pirabur bangsa bangsa ngga dŭh biyŭn masi?