EZRA 8 - Hakcipta - Biatah Bidayuh

Bara Daya Mari Ripas ko Dog Taran

¹ Ati inŭh susud dŭn bara pingubak manak adi dog taran ka Babylonia ka adi mari ngga Ezra ka Jerusalem di jaman Artaxerxes jadi raja-empaya:

^2-14 Gershom, so manak Phinehas Daniel, so manak Ithamar Hattush anak Shecaniah, so manak David Zechariah, so manak Parosh, ngga 150 naan dari so manak-i (agi rekod pasar dŭn tayung-babuk ngara) Eliehoenai anak Zerahiah, so manak Pahath Moab, ngga 200 naan dari Shecaniah anak Jahaziel, so manak Zattu, ngga 300 naan dari Ebed anak Jonathan, so manak Adin, ngga 50 naan dari Jeshaiah anak Athaliah, so manak Elam, ngga 70 naan dari Zebadiah anak Michael, so manak Shephatiah, ngga 80 naan dari Obadiah anak Jehiel, so manak Joab, ngga 218 naan dari Shelomith anak Josiphiah, so manak Bani, ngga 160 naan dari Zechariah anak Bebai, so manak Bebai, ngga 28 naan dari Johanan anak Hakkatan, so manak Azgad, ngga 110 naan dari Eliphelet, Jeuel, ngga Shemaiah, so manak Adonikam, ngga 60 naan dari (ngara mari di tipuh ripas anŭ) Uthai ngga Zaccur, so manak Bigvai, ngga 70 naan dari

Ezra Nguruk Bara Daya Levi Bada Nyiraja di Ramin TUHAN

¹⁵ Aku nguruk sopŭrŭg ngara di pang sungi adi aman ka kupo Ahava, ka kieh bibari diginŭ taruh andu. Aku dapŭd di dupan tibaran anŭ kada imam, pak mating daya Levi.

¹⁶ Aku bagan prii naan pinguru: Eliezer, Ariel, Shemaiah, Elnathan, Jarib, Elnathan, Nathan, Zechariah, ka Meshullam, samŭn duwŭh naan gurū, Joiarib ngga Elnathan.

¹⁷ Aku bada ngara di ka yŭn Iddo, adi pingubak kaum di Casiphia, bada mite so ayŭh ngga bara dingan-i, anŭ inŭh bara daya-gaji Ramin TUHAN, bada nggen di kieh daya da nyiraja di Ramin TUHAN.

¹⁸ Ngga pinyirasi-mandis Tapa, ngara pait ka kieh Sherebiah daya adi pandai, adi daya Levi so manak Mahli, ngga simŭng mai anak dari-i ngga jurud dari-i mandŭg samah ayŭh.

¹⁹ Ngara gŭh pait Hashabiah ngga Jeshaiah so manak Merari, ngga duwŭh puru naan madis ngara.

²⁰ Ngga nambah anŭ agi dinge 220 naan daya-gaji Ramin TUHAN adi tayung-babuk ngara Raja David ko tijuan bada turung daya Levi. Dŭn ngara agi dog nuris.

Ezra Taban Bara Daya Bipusa ngga Simayang

²¹ Di pang sungi Ahava aku nggen ukum bada sopŭrŭg kieh bipusa ka pirapat adŭp ami di sirung jawin Tapa ami ka mite Ayŭh nguru kieh di pimanu ami ka grindung kieh ngga anak anak ami samŭn buat-rata ami.

²² Aku mangŭh re mite so raja-empaya bara soldadu pinunggang kuda bada kingat jaga kieh so serang pinganyu di pimanu ami, sabab aku muko kidaan di ayŭh nang Tapa ami nyiberkat daya adi sabah di Ayŭh, pak ngukum daya adi dŭh tŭtŭd di Ayŭh.

²³ Jadi kieh bipusa ka bidua mite Tapa grindung kieh, ka Ayŭh nam dua ami.

Pinganggen yŭn Ramin TUHAN

²⁴ So dupan bara imam adi bikuasa dŭ aku mien Sherebiah, Hashabiah, ka simŭng naan adi bŭkŭn.

²⁵ Komŭnŭ aku nimbang dudu pirak anŭ, mas anŭ, ka dudu pingakas adi raja-empaya, bara tukang pitayan yŭn-i ngga bara pinurung-i, ngga bara daya Israel mbŭh nggen yŭn dog pakai di Ramin TUHAN, ka aku nggen-i di bara imam.

^26-27 Ati inŭh dudu kayuh anŭ adi aku nggen di ngara: pirak — 22 tan 100 pingakas pirak — 70 kilogram mas — 3,400 kilogram 20 makuk mas — 8.4 kilogram 2 makuk timaga adi brega, brinyam rega-i ngga makuk mas

²⁸ Aku nang di ngara, “Angān inŭh kudus yŭn TUHAN, adi Tapa tayung-babuk ta, ka simŭnŭ inŭh sopŭrŭg pingakas pirak ngga mas adi dog taban ka yŭn-I ndu pinganggen so pinyiraan atin adŭp.

²⁹ Nakit jaga-i ndŭg ka angān mbŭh ndŭg Ramin TUHAN. Diginŭ darŭm birit bara imam, nimbang-i ka nggen-i di bara pinguru imam ka pinguru daya Levi, ka di bara pinguru daya Israel di Jerusalem.”

³⁰ Jadi bara imam ngga bara daya Levi nguasa pirak, mas, ngga dudu pingakas anŭ, re ngara taban ka Ramin TUHAN di Jerusalem.

Mari Ka Jerusalem

³¹ Ngga andu adi simŭng duwŭh darŭm sibungas buran kieh matak so sungi Ahava di ka Jerusalem. Tapa ami agi ngga kieh ka grindung kieh so serang pinganyu ka so dog tuman di pimanu ami.

³² Kan kieh mbŭh ndŭg Jerusalem, kieh rŭŭ sitian taruh andu.

³³ Komŭnŭ di andu adi pat kieh di ka Ramin TUHAN, nimbang pirak, mas, ka pingakas anŭ, ka nyerah-i ka Meremoth adi Imam, anak Uriah. Adi agi diginŭ ngga ayŭh inŭh Eleazar anak Phinehas ka duwŭh naan daya Levi, Jozabad anak Jeshua ka Noadiah anak Binnui.

³⁴ Sopŭrŭg kayuh anŭ dog mirang ka dog nimbang, ka nganŭ gŭh mbŭh nakit dog rekod.

³⁵ Sopŭrŭg ngara adi mbŭh mari ripas ko dog taran taban pinganggen yŭn dog badang ndu sadis ka Tapa Israel. Ngara jugan 12 dari sapi yŭn sopŭrŭg Israel, 96 dari biri, ka 77 anak biri; ngara jugan gŭh 12 kambing ngga pibisig adŭp ngara so dosa. Sopŭrŭg dāng anŭ dog badang ndu sadis ka TUHAN.

³⁶ Ngara gŭh tambit surat adi raja-empaya mbŭh nggen di ngara ka nggen-i di gabenor gabenor ngga bara pinurung utung rais Euphrates Barat, adi rasu nggen pinyibatu ngara ka daya Israel ka yŭn bisambah di Ramin TUHAN.