EZRA 4 - Hakcipta - Biatah Bidayuh

Mito Kraja Pari Pijog Ramin TUHAN

¹ Bara pinganyu daya Judah ngga daya Benjamin dingah ngara adi mbŭh mari ripas ko dog taran pari pijog Ramin TUHAN, adi Tapa Israel.

² Jadi ngara di ka yŭn Zerubbabel ka bara pingubak manak ka nang, “Bada kieh sua ngga angān pijog Ramin TUHAN. Kieh nyambah gŭh Tapa adi angān nyambah, ka kieh mbŭh jugan sadis ka Ayŭh so jaman Esarhaddon, adi raja-empaya Assyria, bada kieh rŭŭ digiti.”

³ Zerubbabel, Joshua, ngga bara pinguru manak nang di ngara, “Kieh dŭh biguna di pinurung ngan ngga pijog ramin yŭn TUHAN adi Tapa ami. Adŭp ami re pijog-i, nimun adi Cyrus, adi raja-empaya Persia, mbŭh pesan kieh.”

⁴ Ripas anŭ bara daya adi rŭŭ di tarun tana anŭ suba an pijimŭ ka pirawan daya Jahudi isa ngara dŭh pijuu kraja piramin ngara.

⁵ Ngara gŭh nyuap bara pinurung so pritah Persia bada katang kraja piramin anŭ. Ngara adu adu ndai simŭnŭ so jaman pinyipritah Cyrus ndŭg jaman pinyipritah Darius.

Mito Kraja Pari Pijog Jerusalem

⁶ Di sibungas pinyipritah Xerxes adi raja-empaya, bara pinganyu daya adi rŭŭ di Judah ngga di Jerusalem nuris surat ngga nyarah ngara.

⁷ Agi dinge di jaman pinyipritah Artaxerxes adi raja-empaya Persia, Bishlam, Mithredath, Tabeel, ngga bara dingan-pekat ngara nuris surat ka raja-empaya. Surat anŭ dog nuris darŭm piminyu Aram ka an dog mindai kan dog basa.

⁸ Simŭnŭ gŭh Rehum, adi gabenor, ngga Shimshai, adi tukang pinuris utung rais, nuris surat ati ka Artaxerxes pasar Jerusalem:

⁹ “Surat ati so Rehum, adi gabenor, so Shimshai, adi tukang pinuris utung rais, ngga bara dingan-pekat ngara, bara akim, ka so sopŭrŭg bara pinurung adi bŭkŭn, adi daya asar so Erech, Babylon, ngga Susa di tarun tana Elam,

¹⁰ samah ngga bara daya adi bŭkŭn adi Ashurbanipal adi bās ngga adi bikuasa mindah ka kupo Samaria ngga di barang yŭn di utung rais Euphrates Barat.”

¹¹ Ati inŭh isi surat anŭ: “Ka Raja Artaxerxes so urun urun-i adi bara daya di Euphrates Barat.

¹² “Kieh raan Tuan Raja puan nang bara daya Jahudi adi mandŭg kamati so tarun tana mai adi bŭkŭn mbŭh rŭŭ di Jerusalem ka aŭn pari pijog kupo adi arap ka adi sipŭ anŭ. Ngara mbŭh piguru pari pijog sindung sindung ka mbŭh re rikas ngamas-i.

¹³ Tuan Raja, kambŭi kupo anŭ pari dog pijog ka sindung sindung-i mbŭh kamas, bara daya-i re dŭh tia bayar suke, ka pinyidapŭd pritah tuan raja re jadi nisŭ.

¹⁴ Madin, sabab Tuan Raja muko ndai kana di kieh, kieh dŭh raan kiris kayuh adi mun anŭ jadi, jadi kieh mite

¹⁵ kaam nggen ukum bada daya pirasa rekod tayung-babuk mai adi dog nyikŭn. Kaam re puan nang kupo anŭ taŭn ari an birawan ka so jah ari nyusah raja raja ngga pimritah di utung utung rais. Daya-i marar mbar dog mritah. Anŭ inŭh sabab kupo anŭ dog nyirubuh.

¹⁶ Ka kieh meh mbŭh puan nang kambŭi kupo anŭ mbŭh abo pari dog pijog ka sindung sindung-i mbŭh kamas, Tuan Raja re dŭh tia tungang nguasa utung rais Euphrates Barat dinge.”

¹⁷ Raja pait pinyinam-i ati: “Ka Rehum, adi gabenor, ka Shimshai, adi tukang pinuris utung rais, ngga bara dingan-pekat ngara adi rŭŭ di Samaria ka di tarun bŭkŭn di Euphrates Barat, tabi.

¹⁸ “Surat adi angān pait ka aku mbŭh dog mindai ka dog basa yŭn ku.

¹⁹ Aku mbŭh nggen ukum bada kayuh anŭ dog nyasat, ka-i sawŭ agi dog dapŭd nang so jaman jah, Jerusalem agi rawan pritah raja raja, ka-i ari gŭh puno ngga daya daya adi an birawan ka adi an ndai pito.

²⁰ Raja raja adi bikuasa ko mritah diginŭ ka nguasa ndi tarun tarun utung rais Euphrates Barat, sun suke ngga takŭd so rayat.

²¹ Ngapŭi angān, patut piruah ukum bada ngara anŭ pirŭŭ kraja ngara adi pari pijog kupo anŭ ndŭg ka aku mbŭh nggen pesan bauh.

²² Dŭhnyah angān sais di har ati; abah aku bada pritah ku dapŭd bagŭ rugi.”

²³ Kan surat anŭ adi so Artaxerxes dog basa di sirung jawin Rehum, Shimshai, ngga di sirung jawin bara dingan-pekat ngara, ngara rikas di ka Jerusalem ka takan bara daya Jahudi bada pirŭŭ kraja ngara adi pari pijog kupo anŭ.

Kraja Pari Pijog Ramin TUHAN Dog Piguru Dinge

²⁴ Kraja pari pijog Ramin TUHAN mbŭh dog pirŭŭ ka babŭ mun mun-i simŭnŭ ndŭg ka sawa adi duwŭh darŭm pinyipritah Darius, adi raja-empaya Persia.