EZRA 1 - Hakcipta - Biatah Bidayuh

Cyrus Bada daya Jahudi Pari ka Rais adŭp Ngara

¹ Di sibungas sawa Cyrus adi raja-empaya Persia, TUHAN bada kayuh adi-I nang so baba nabi Jeremiah jadi bitŭtŭk. Ayŭh nguasa Cyrus bada nuris pesan ati ka bada-i dog basa di barang yŭn darŭm empaya-i:

² “Ati inŭh pesan so Cyrus, adi Raja-empaya Persia. TUHAN, Tapa adi pinguasa di Shorga, mbŭh bada aku jadi pimritah di ndi ong ong ka mbŭh nggen di aku pinanggong pijog Ramin yŭn-I di Jerusalem di tarun tana Judah.

³ Isa-i Tapa agi ngga angān adi daya-I. Angān an di ka Jerusalem ka pari pijog Ramin TUHAN, adi Tapa Israel, Tapa adi dog nyambah di Jerusalem.

⁴ Kambŭi agi so dupan daya-I adi dog taran kamati biguna di pinurung, rasū ngara siŭn nggen di ngara pirak ngga mas, inged pinguman ka dāng ngga ngakut barang, samŭn pinganggen yŭn Ramin Tapa di Jerusalem.”

⁵ Komŭnŭ bara pingubak manak tibaran-asar Judah ngga Benjamin, bara imam ngga bara daya Levi, ngga barang naan daya adi Tapa mbŭh kuka atin-i sidia re matak ka pari pijog Ramin TUHAN di Jerusalem.

⁶ Sopŭrŭg rasū ngara nggen bagŭ kayuh ngga turung ngara: mun pingakas pirak, mas, inged pinguman, dāng ngga ngakut barang, buat-rata, ka pinganggen yŭn Ramin TUHAN.

⁷ Cyrus nggen pari di ngara makuk makuk ngga saker saker adi Nebuchadnezzar ko tambit so Ramin TUHAN di Jerusalem ka na-i di bari-sambah tapa adŭp-i.

⁸ Cyrus nyerah-i ka Mithredath, pingubak adi nguasa pinyirikŭn rata pritah, ka adi nyusud sopŭrŭg-i yŭn Sheshbazzar, adi gabenor Judah,

^9-10 simuti: makuk mas yŭn pinganggen 30 makuk pirak yŭn pinganggen 1,000 makuk adi bŭkŭn 29 anak makuk mas 30 anak makuk pirak 410 pingakas adi bŭkŭn 1,000

¹¹ Prungun-i agi, 5,400 makuk mas ngga makuk pirak samŭn kayuh kayuh adi bŭkŭn adi Sheshbazzar taban kan ayŭh ngga bara daya adi dog taran matak ngga ayŭh so Babylon ka Jerusalem.