EPHESUS 5 - Hakcipta - Biatah Bidayuh

Udip darŭm Jawa

¹ Amai angān bara anak Tapa adi-I rindu, angān dŭh siŭn dŭh bada adŭp ngan mun Ayŭh.

² Pimudip ngan dŭh siŭn dŭh dog nguasa pinyirindu, nimun Kristus mbŭh rindu ata ka mbŭh nggen asŭng-I yŭn ta adi keya ka pinganggen adi buuh ramak ngga sadis adi pimunos asŭng Tapa.

³ Amai angān mbŭh bara daya adi Tapa mbŭh mien, dŭh-i patut pingandai kais puan kah pimudip adi dŭh tatu puan kah tama dog nyabŭt di ruang ngan.

⁴ Dŭh gŭh angān siŭn pakai piminyu pinganang adi kais, adi sembar, puan kah tapat adi kais. Pak angān patut nggen trima kaseh di Tapa.

⁵ Angān tatu mbŭh puan nang mating daya adi udip darŭm pingandai kais, pimudip adi dŭh tatu, puan kah tama (amai tama agi keya ka nyambah tibudo) re bisa dapŭd utung-i darŭm Pinyipritah Kristus ngga Tapa.

⁶ Dŭhnyah bada daya nyibudo angān ngga pinganang au-tarun; kayuh adi mun ati inŭh adi re bada baji Tapa nyatŭk ngara adi dŭh an dingah pinganang-I.

⁷ Dŭhnyah meh bigaur ngga daya adi mun anŭ.

⁸ Dawŭ-i, adŭp ngan ko udip darŭm karŭm, pak sabab angān madin mbŭh daya Tuhan, angān agi darŭm jawa. Jadi angān dŭh siŭn dŭh udip mun daya jawa,

⁹ amai jawa inŭh adi pijadi pingatŭm bās so tiap pinyikana, pinŭnggŭn, ka pinyawŭ.

¹⁰ Ka suba birajar ani anŭ adi pimunos asŭng Tuhan.

¹¹ Dŭhnyah ndai kayuh adi dŭh biguna, mun pingandai ngara adi udip darŭm karŭm. Angān patut kidaan munki masam sarah inŭh ngara. (

¹² Raru mangŭh nŭŭh ngarun, buang payah nŭŭh re minyu pasar kayuh adi ngara ndai darŭm bisukan.)

¹³ Sopŭrŭg kayuh re granan tatŭng kan-i dog taban ka jawa;

¹⁴ amai tadŭ kayuh adi granan tatŭng jadi jawa. Ngapŭi meh mbŭh agi dog nang, “Burah meh, kuu adi bŭŭs, makat so pinyikabŭs; Kristus re nyekar di tunduh mu.”

¹⁵ Jadi nakit ingat meh munki angān udip. Dŭhnyah udip mun daya budo, pak udip mun daya adi bijak.

¹⁶ Tiap kari angān biyŭn pluang ngga ndai kayuh kana, dŭhnyah taran pluang ngan anŭ, sabab tipuh ati inŭh tipuh adi arap.

¹⁷ Dŭhnyah budo, pak suba jiroh ani anŭ adi Tuhan raan angān ndai.

¹⁸ Dŭhnyah mabuk, amai anŭ kayuh adi re pirusak angān; angān sipatut-i brisi ngga Roh Kudus.

¹⁹ Minyu ngga dingan ngan ngga pinganang mazmur, pinganang nyanyi, ka ngga pinganang ragu kudus; ka nang nyanyi ngga mazmur ka Tuhan ngga atin adi gaŭn.

²⁰ Ngga adŭn Tuhan ta Jesus Kristus, ari nggen trima kaseh di Tapa Sama yŭn sopŭrŭg kayuh.

Banŭh ngga Sawŭn

²¹ Nundok di apid ngan nimun angān stabi di Kristus.

²² Angān adi mbŭh banan, nundok di banŭh ngan nimun angān nundok di Tuhan.

²³ Sabab banŭh biyŭn kuasa di tunduh sawŭn nimun Kristus biyŭn kuasa di tunduh eklisia; ka adŭp Kristus inŭh Pinyikudip eklisia, adi pŭrŭng adŭp-I.

²⁴ Jadi sawŭn dŭh siŭn dŭh an nundok darŭm sopŭrŭg kayuh di banŭh-i, nimun eklisia nundok di Kristus.

²⁵ Angān adi dari, rindu sawŭn ngan nimun Kristus rindu eklisia ka nggen asŭng-I yŭn-i.

²⁶ Ayŭh ndai simŭnŭ ngga bada eklisia jadi kudus ngga pinganang-I, ripas-I ko ngu-i da bisig di piin,

²⁷ siŭn-I bisa dapu eklisia ngga sopŭrŭg pinyiramus-i, anŭ inŭh bisig buang mating sarah, mating takar kais, puan kah tadŭ mun pinyikurang-i.

²⁸ Bara dari patut rindu sawŭn-i nimun-i rindu pŭrŭng ganan adŭp-i. Dari adi rindu sawŭn-i rindu adŭp-i.(

²⁹ Mating daya tiru di pŭrŭng adŭp-i. Pak nyiran-i buang jaga-i, nimun Kristus ngga eklisia;

³⁰ amai ata mbŭh keya ka bara sakap di pŭrŭng-I.)

³¹ Sak adi nang Surat-kudus, “Sabab anŭ dari re tingge sindŭ sama-i ka rakat di sawŭn-i, ka ngara duwŭh re jadi ndi pŭrŭng.”

³² Agi rusia bās dog pinandŭng di pinganang Surat-kudus anŭ, adi aku mirati nang pasar Kristus ngga eklisia.

³³ Pak-i pasar angān gŭh: barang naan angān adi dari dŭh siŭn dŭh rindu sawŭn ngan nimun angān rindu adŭp ngan, ka barang naan angān adi dayung dŭh siŭn dŭh stabi di banŭh ngan.