EPHESUS 1 - Hakcipta - Biatah Bidayuh

¹ So Paul, adi pinyuruh Kristus Jesus so ka pinyiraan Tapa, nuju bara daya adi Tapa mbŭh mien di Ephesus, adi tŭtŭd darŭm pimudip ngara adi ndi ngga Kristus.

² Isa-i Tapa adi Sama ta ngga Tuhan ta Jesus Kristus nggen di angān pinyirasi-mandis ngga damai.

Berkat Roh darŭm Kristus

³ Ata nggen trima kaseh di Tapa adi Sama Tuhan ta Jesus Kristus! Amai darŭm ata udip ndi ngga Kristus Ayŭh mbŭh nyiberkat ata ngga sopŭrŭg berkat roh so shorga.

⁴ Sibayuh ong ati dog napa, Tapa mbŭh mien ata da jadi tung adŭp-I so ka udip ndi ta ngga Kristus, isa ata bisa jadi kudus mating takar sarah di sirung jawin-I. Sabab pinyirindu-I

⁵ Tapa mbŭh natu ata jadi bara anak-I so Jesus Kristus, nanyam ka suka asŭng ngga tujuan-I.

⁶ Ja ata muji Tapa amai pinyirasi mandis-I adi bragah, amai pinganggen bās-I adi-I mbŭh nggen di ata darŭm Anak nyirot-I!

⁷ Amai so ka pinyikabŭs Kristus adi sadis ata mbŭh dog pirupas, anŭ inŭh, dosa ta mbŭh dog apun. Mbŭh raru bās inŭh pinyirasi-mandis Tapa,

⁸ adi-I mbŭh ren di tunduh ata! Darŭm sopŭrŭg pinyibijak ngga pinyipuan-I

⁹ Tapa mbŭh pijadi kayuh nanyam tujuan-I, ka mbŭh kiren di ata atur pinyiraan-I adi-I mbŭh natu an ngamas so ka Kristus.

¹⁰ Kayuh adi Tapa an ndai anŭ, adi-I re ngamas di tipuh adi adŭp-I mien, inŭh nguruk sopŭrŭg anŭ adi-I ko napa, bait-i darŭm shorga, bait-i darŭm ong, ngga Kristus adi jadi ubak.

¹¹ Sopŭrŭg-i re dog ndai nanyam ka atur-pinyiraan Tapa. Nunda ka tujuan-I adi ko-I natu so sibungas-i, Tapa mbŭh mien ata da jadi daya adi tung adŭp-I darŭm udip ndi ngga Kristus.

¹² Ja meh garang, ata adi diŭ biyŭn pingarap di Kristus, muji bragah Tapa!

¹³ Ka angān gŭh jadi bara daya adi Tapa mbŭh mien kan angān mbŭh dingah agah pasar ajar adi sawŭ, anŭ inŭh Agah Kana adi taban pinyiramat ka angān. Angān sabah di Kristus, ka Tapa, ngga-I kiren angān mbŭh tung adŭp-I, mbŭh nandā angān ngga Roh Kudus adi-I ko bijanji an nggen.

¹⁴ Roh anŭ inŭh jamen ata bisa kambat kayuh adi Tapa ko bijanji an nggen di daya-I, ka simŭnŭ gŭh ata puan Tapa re nggen pinyirupas ngga sipuno-i di sinadan daya adi-I dapu. Ja ata muji bragah-I!

Dua Paul

¹⁵ Sabab anŭ, so sibungas aku dingah pasar angān mbŭh sabah di Tuhan Jesus samŭn pinyirindu ngan di sopŭrŭg daya adi Tapa mbŭh mien,

¹⁶ aku dŭh rŭŭ nggen trima kaseh di Tapa yŭn ngan. Aku ingat angān darŭm simayang

¹⁷ buang mite Tapa Tuhan ta Jesus Kristus, Sama adi bragah, nggen di angān Roh Kudus adi re bada angān bijak buang pinandŭng Tapa di angān, isa angān bisa puan Ayŭh.

¹⁸ Aku mite pikir ngan tikuka yŭn kiris jawa-I, isa angān adi-I mbŭh mien puan ani anŭ adi angān harap, munki masam grua berkat adi-I mbŭh bijanji an nggen di daya-I,

¹⁹ ka munki masam bās inŭh meh kuasa-I adi turung ata adi sabah. Kuasa-I anŭ agi brinyam ngga kuasa bās anŭ

²⁰ adi-I pakai ngga pakat Kristus so kabŭs ka piguru Ayŭh di tura ka tauh-I di shorga.

²¹ Diginŭ Kristus mritah di sambu sopŭrŭg pinyipritah, pinguasa, pinguru ka raja. Ayŭh agi dŭn adi rabis bigatung so tadŭ mun dŭn kuasa, bait-i di ong ati puan kah di ong adi re.

²² Tapa mbŭh na sopŭrŭg kayuh di ribo kaja Kristus, ka mbŭh nggen Ayŭh di eklisia da nguasa sopŭrŭg kayuh.

²³ Eklisia inŭh pŭrŭng Kristus, adi mbŭh pinyukup-I adi nyukup sopŭrŭg kayuh di barang yŭn.