EKLISIASTIS 8 - Hakcipta - Biatah Bidayuh

¹ Kaŭs daya adi bijak adŭ mirati bagŭ kayuh. Pinyibijak bada ngara sanyum ka bada jawin ngara jawa.

Tŭtŭd di Raja

² Ndai anŭ adi Raja bada, ka dŭhnyah gupoh gupoh ndai janji ngga Tapa.

³ Raja bisa ndai ani ani raan-i, ngapŭi bu so yŭn-i; dŭhnyah rŭŭ di tarun yŭn adi bisā mun anŭ.

⁴ Raja ndai kraja-i ngga kuasa, ka mating daya dapŭd matah pingandai-i.

⁵ Siragi kuu tunda pesan-i, kuu siramat, ka daya adi bijak puan munki ka sinde ayŭh tunda pesan-i.

⁶ Agi tika adi batur ngga aran adi batur ngga ndai barang masam kayuh, pak ata puan raru nisŭ kayuh!

⁷ Mating ata puan kayuh adi re jadi, ka mating daya re kidaan di ata.

⁸ Mating daya dapŭd bitan puan kah ngana andu adi ngga-i kabŭs. Pinyikabŭs inŭh keya ka perang adi ata dŭh tungang mangān, bait-i ata pakai tadŭ mun akar puan kah tipu.

Daya Ginaka ngga Daya Tŭnggŭn

⁹ Aku kiris sopŭrŭg ati kan aku bipikir pasar kayuh adi jadi di ong, ong di yŭn agi daya biyŭn kuasa ka adi bŭkŭn sangsara di ribo ngara.

¹⁰ Sawŭ, aku mbŭh kiris daya ginaka kabŭs ka dog kubur. Pak darŭm daya pari so kubur daya muji ngara di kupo di yun ngara ko ndai pingandai arap. Mbŭh mating rati-i kayuh adi mun anŭ.

¹¹ Mani daya graŭh an ndai sarah? Sabab daya adi ndai sarah dŭh rasu dog ukum?

¹² Sunggu daya bidosa ndai sarah siratus kari, ngara babŭ udip. Taŭn aku puan daya agi nang, “Daya adi tŭtŭd di Tapa re udip sanang,

¹³ pak daya ginaka re udip susah. Pimudip ngara inŭh keya ka singangi ka ngara re kabŭs mara, sabab ngara dŭh tŭtŭd di Tapa.”

¹⁴ Pak kayuh anŭ inŭh au-tarun. Tingga kayuh adi jadi di ong: kadang kadang agi andu-i daya tŭnggŭn trima ukum daya ginaka, ka daya ginaka dog ngupah ngga pinŭnggŭn. Aku nang kayuh anŭ dŭh biyŭn rati.

¹⁵ Ngapŭi meh aku nang ata patut pirami adŭp ta, sabab kaŭs kayuh adi bisa ata pakai ngga pimunos adŭp ta inŭh man ngga nok ka pirami adŭp ta. Ata bisa ngga sikurang-i ndai simŭnŭ buang ata bandar nyiraja sitŭkŭd pimudip adi Tapa mbŭh nggen di ata di ong ati.

¹⁶ Kan aku suba an jadi bijak ka birajar pasar kayuh adi jadi di ong, aku rada nang sunggu ata bijaga sandu ngga singarŭm

¹⁷ ata dŭh dapŭd mirati pingandai Tapa. Munki masam ata suba, ata dŭh re dapŭd puan. Daya bijak nang adŭp-i puan, pak sibatur-i ngara dŭh puan.