EKLISIASTIS 7 - Hakcipta - Biatah Bidayuh

Pikir-kira Pasar Pimudip Manusia

¹ Dŭn kana inŭh kana dŭ so wangi adi brega; ka andu mu kabŭs inŭh kana dŭ so andu mu dog biranak.

² Kana dŭ di ka ramin daya ngurid so di ka ramin daya bigawai, sabab daya adi udip patut bada ata ingat pinyikabŭs taŭn ari kajŭn ata.

³ Pinyusah kana dŭ so tawŭh; ayŭh bisa bada jawin nŭŭh susah, pak-i bada nŭŭh rabis mirati.

⁴ Daya adi ari bipikir pasar pinyirami inŭh daya budo. Daya adi bijak bipikir pasar pinyikabŭs.

⁵ Kana dŭ inŭh daya adi bijak nyara ngajar nŭŭh so daya adi budo biragu muji nŭŭh.

⁶ Kan daya budo tawŭh, anŭ inŭh keya ka jawŭn reja dog man apui. Dŭh biyŭn rati.

⁷ Kadŭ kuu bijak, pak kambŭi kuu ngakar daya, kuu mbŭh keya ka daya budo. Kambŭi kuu trima suap, kuu pirusak dŭn kana mu.

⁸ Kayuh adi mbŭh jadi inŭh kana dŭ so kayuh adi muran dog piguru. Atin Sabar inŭh Kana Dŭ so Atin Sambuh.

⁹ Dŭhnyah rikas baji; daya adi budo inŭh adi nyikŭn dendam.

¹⁰ Dŭhnyah siken, “Mani kayuh kana dŭ jaman jah?” Anŭ, dŭh inŭh pinyiken bijak.

¹¹ Sopŭrŭg daya adi udip an bijak; anŭ mbŭh keya ka kambat bisaka

¹² ka nggen jamen keya ka duit. Pinyibijak bada kuu siramat; anŭ inŭh kana-i nŭŭh biyŭn pinyipuan.

¹³ Bipikir pasar kayuh adi Tapa mbŭh ndai. Simuki daya re bada tŭnggŭn kayuh adi Tapa mbŭh bada bidikok?

¹⁴ Kan kuu sanang, gaŭn meh; kan kuu susah, ingat nŭh sanang ngga susah mandŭg so Tapa. Manusia dŭh puan ani kayuh adi re jadi.

¹⁵ Udip ku mbŭh dŭh biyŭn rati, pak aku mbŭh kiris bagŭ masam kayuh. Agi gŭh andu-i daya adi kana kabŭs, sunggu-i ngara daya kana. Agi gŭh andu-i daya adi arap tui udip, sunggu-i ngara daya arap.

¹⁶ Ngapŭi dŭhnyah paŭh kana bait paŭh bijak; mani siŭ adŭp nŭh?

¹⁷ Pak dŭhnyah paŭh ginaka bait paŭh budo; mani kabŭs diŭ so tipuh-i?

¹⁸ Pijo adŭp mu so soduwŭh-i. Kambŭi kuu stabi buang taru di Tapa, kuu re tatu mujur.

¹⁹ Pinyibijak bada kuu bikuasa dŭ so simŭng pinguasa di kupo mu.

²⁰ Mating daya di ong adi ari ndai kayuh adi batur ka bŭn ndai sarah.

²¹ Dŭhnyah piduri barang masam kayuh adi daya nang, te kuu dingah daya-gaji mu mangu kuu rai-i,

²² ka kuu puan nang adŭp mu mbŭh ari mangu daya bŭkŭn.

²³ Aku pakai pinyibijak ku ngga suba sopŭrŭg anŭ. Aku bigŭtŭ an bijak, pak dŭh dapŭd.

²⁴ Simuki daya dapŭd puan ani rati udip? Anŭ mbŭh raru tŭrŭp re nŭŭh mirati.

²⁵ Pak aku bandar birajar ka jiroh pinyipuan yŭn dapŭd pinyibijak ngga pinyinam yŭn pinyiken ku. Ka aku suba an mirati mani daya adi arap buang sipadin mbŭh budo ka gira-gira.

²⁶ Aku agi dapŭd kayuh adi rabis pa'it so pinyikabŭs: dayung adi pakai pinyiawang keya ka jaring puan kah jarat ngga nakap kuu; tangan-i bandar dakŭp kuu keya ka parik basi. Daya adi ndai pinyiraan Tapa dapŭd pirupas adŭp-i, pak daya adi bidosa re dog nakap-i.

²⁷ Sawŭ, nang Philosopha, kayuh anŭ nisit nisit dog dapŭd ku darŭm aku jiroh pinyinam-i.

²⁸ Aku jiroh pinyinam adi bŭkŭn pak mating dapŭd ku. Aku dapŭd ndi naan dari darŭm siribu adi aku dapŭd stabi dieh, pak gi-mating aku dapŭd ndi naan dayung adi bisa aku stabi dieh.

²⁹ Kaŭs ati adŭ kayuh adi aku mbŭh birajar: Tapa napa ata bada tŭnggŭn, pak ata bada adŭp ta bidikok.