EKLISIASTIS 6 - Hakcipta - Biatah Bidayuh

¹ Agi gŭh dinge kayuh adi mbŭh ruai dŭh patut, ka mbŭh nyusah manusia di ong.

² Tapa bisa nggen di barang naan daya pinyikaya, stabi, ka buat-rata; sawŭ, sopŭrŭg adi ayŭh raan, pak ripas anŭ Tapa dŭh bada ayŭh gaŭn biyŭn-i. Pak daya bŭkŭn re gaŭn biyŭn-i. Mating rati-i, sopŭrŭg-i mbŭh sarah.

³ Kadŭ daya bisa biyŭn siratus anak ka udip tui, pak munki mun tui ayŭh udip, kambŭi ayŭh dŭh sua dapu pinyigaŭn ka dŭh dog kubur ngga tirase, mbŭh kana dŭ inŭh nasip sipira adi dog biranak ripas-i mbŭh kabŭs.

⁴ Mating kana-i sipira anŭ dog biranak; ayŭh miyap ka darŭm karŭm, di yŭn-i dog kambŭt.

⁵ Ayŭh bŭn kiris jawa sandu bait puan ani anŭ udip, pak ayŭh mbŭh kinyam sanang adi sawŭ.

⁶ Jangi rabis kana so tung daya anŭ adi udip duwŭh ribu sawa pak bŭn kinyam sanang darŭm pimudip-i. Amai sawŭ, soduwŭh ngara taŭn samah pinijū-i, ka ndi tarun yŭn anŭ.

⁷ Daya ngga situngang tungang-i nyiraja yŭn dapŭd pinguman, pak ngara bŭn re biyŭn sukup.

⁸ Ani kana-i daya bijak kambŭi danding ngga daya budo? Ani kana-i daya sirata kambŭi nakit ndai urah-i?

⁹ Mating rati-i; anŭ mbŭh keya ka tadak sabak. Kana dŭ pimunos adŭp nŭh ngga kayuh adi nŭŭh biyŭn so nŭŭh marar gruwŭn kayuh adi dŭh nŭŭh dapu.

¹⁰ Sopŭrŭg kayuh adi mbŭh jadi muko diŭ ndun jah dog natu bada jadi, ka sopŭrŭg ata puan nang ata dŭh dapŭd matah daya adi bake dŭ so ata.

¹¹ Makin ata matah, makin-i dŭh biguna, ka mating utung-i di ata.

¹² Simuki daya re puan ani adi siabo kana yŭn ta darŭm pimudip ta ati adi purok ka adi dŭh biyŭn rati, pimudip adi rikas miyap keya ka singangi? Simuki ata re puan ani re jadi di ong ati ripas ata mbŭh kabŭs?