EKLISIASTIS 5 - Hakcipta - Biatah Bidayuh

Dŭhnyah Nyimau Ndai Janji

¹ Kuu an nakit darŭm kuu di ka Ramin TUHAN. Kana dŭ nŭŭh di kamanŭ di birajar so nŭŭh jugan sadis mun ngara adi budo, adi dŭh puan kayuh adi batur ngga adi sarah.

² Bipikir diŭ so kuu minyu, ka dŭhnyah nyimau ndai janji ngga Tapa. Ayŭh di shorga ka kuu di ong, ka dŭhnyah nang rabis so adi mbŭh kuu nang.

³ Makin kuu gapang, makin pŭmŭh adi arap an dog kuu; makin kuu minyu, makin kuu udah nang pinganang budo.

⁴ Jadi kan kuu ndai janji ngga Tapa, dŭhnyah sais pijadi kayuh adi kuu mbŭh bijanji an ndai. Ayŭh dŭh biguna di daya adi budo. Ndai anŭ adi kuu mbŭh bijanji an ndai.

⁵ Kana dŭ dŭhsah ndai janji so nŭŭh ndai janji ka dŭh tungang sita-i.

⁶ Dŭhnyah bada pinganang mu bada kuu bidosa, ka komŭnŭ kidaan di imam Tapa nang kuu nang-i ngga dŭh singaja. Mani bada Tapa baji di kuu? Mani bada Ayŭh pirabur kayuh adi kuu mbŭh dapŭd so turang udas mu?

⁷ Dŭh kira kudu masam pŭmŭh mu, kudu masam pingandai mu adi dŭh biyŭn rati, puan kah munki masam kuu minyu, kuu dŭh siŭn dŭh taru di Tapa.

Pimudip Inŭh Dŭh biyŭn Rati

⁸ Dŭhnyah gŭgŭh kan kuu kiris pritah kinanyuh daya sirata, dŭh pimanu pinyitŭnggŭn yŭn ngara ka dŭh piduri hak ngara. Barang naan pinurung pritah inŭh dog grindung sianŭ adi di tunduh ngara, ka sopŭrŭg ngara dog grindung pinurung adi bigatung dinge so ngara.

⁹ Raja bisangan gŭh di buwa pingatŭm.

¹⁰ Kambŭi kuu gira duit, kuu dŭh re puas; kambŭi kuu gruwŭn an kaya, kuu dŭh re dapŭd sopŭrŭg anŭ adi kuu raan. Sopŭrŭg anŭ dŭh biyŭn rati.

¹¹ Makin kuu kaya, makin bagŭ baba re kuu paan. Ka kaŭs kuu puan inŭh adŭp mu kaya.

¹² Daya adi nyiraja, bait-i biyŭn sukup pinguman bait dŭh, ayŭh dapŭd bŭŭs singarŭm. Daya kaya, amai biyŭn raru bagŭ, ngara dŭh bŭŭs sabab gapang.

¹³ Aku kiris kayuh adi raru mandam di ong ati: daya nyikŭn duit an-i pakai di tika ayŭh biguna dieh,

¹⁴ ka komŭnŭ kinanyap sopŭrŭg-i darŭm kraja pingandai ngga nasip arap, ndŭg ka mating dŭm re-i nggen di anak-i.

¹⁵ Ata bu so ong ati mun ata mandŭg ka ong ati, dŭh taban ani ani. Sunggu ata bandar nyiraja mating kayuh re ata taban ngga bu.

¹⁶ Taŭn dŭh batur! Ata bu mun ata mandŭg. Ata bandar nyiraja, suba nakap sabak, ka ani re ata dapŭd?

¹⁷ Ata dŭh siŭn dŭh udip darŭm karŭm ngga susah, gapang, baji, ka mandam.

¹⁸ Ati inŭh kayuh adi aku mbŭh dapŭd: kayuh adi siabo kana inŭh nŭŭh man nok ka pimunos adŭp nŭh ngga kayuh adi nŭŭh dapŭd so turang udas adŭp nŭh darŭm pimudip adi purok adi Tapa mbŭh nggen di ata; anŭ mbŭh nasip manusia.

¹⁹ Kambŭi Tapa nggen di daya pinyikaya ngga buat-rata ka bada ayŭh gaŭn biyŭn-i, daya anŭ patut nggen trima kaseh ka pimunos adŭp-i ngga kayuh adi-i dapŭd so turang udas adŭp-i. Anŭ inŭh pinganggen so Tapa.

²⁰ Amai Tapa mbŭh nyibandar ayŭh gaŭn, ayŭh dŭh re raru gapang pasar munki masam purok udip ati.