DITRONOMI 6 - Hakcipta - Biatah Bidayuh

Pinyipesan adi Bās

¹ “Ati inŭh sopŭrŭg ukum-adat adi TUHAN adi Tapa ngan pesan aku bada ngajar angān. Tunda-i di tarun tana adi angān mbŭh re mŭrŭt ka ngisi.

² Sitŭkŭd angān udip, angān ngga sesang ngan an stabi di TUHAN adi Tapa ngan, ka tunda sopŭrŭg ukum adat-I adi aku nggen di angān, isa angān udip tui di tarun tana anŭ.

³ Dingah nŭh ukum-adat anŭ, angān daya Israel, ka tunda-i! Simŭnŭ angān re sanang, ka jadi bangsa adi bake ka rŭŭ di tarun tana adi kaya ka damŭn anŭ, nimun adi TUHAN adi Tapa tayung-babuk ta mbŭh bijanji.

⁴ “Israel, ingat ati! TUHAN — ka TUHAN sadi adŭ — inŭh Tapa ta.

⁵ Rindu TUHAN adi Tapa ngan ngga siabo atin ngan, ngga siabo simangi ngan, ka ngga siabo tungang ngan.

⁶ Mba ngapŭh kambŭt pesan anŭ adi nggen ku di angān andu ati.

⁷ Ngajar-i di bara anak ngan. Pari pari nyabŭt-i di tika angān di arŭn ka di tika angān birarang, di tika angān rŭŭ-paya, ka di tika angān nyiraja.

⁸ Mŭŭng-i di tangan ngan ka nen-i di arŭ ngan ndu pingingat.

⁹ Nuris-i di uros tiban ramin ngan ka di tiban buwang ramin ngan.

Pinyibakan Pasar Pinyibireu

¹⁰ “Nimun adi TUHAN adi Tapa ngan mbŭh bijanji di tayung-babuk ngan, Abraham, Isaac, ka Jacob, Ayŭh re nggen di angān tarun tana ngga kupo kupo-i adi bayah ka mujur adi dŭh adŭp ngan pijog.

¹¹ Ramin ramin re puno bada kayuh kayuh adi kana adi dŭh so tangan adŭp ngan, ka re bagŭ prigi adi angān dŭh kareh, ka teya anggor ngga risŭn kanā adi dŭh angān purun. Kan TUHAN taban angān mŭrŭt tarun tana anŭ, ka angān re biyŭn sopŭrŭg adi angān raan man,

¹² nakit ingat dŭhnyah angān kambŭt TUHAN adi piruah angān so Egypt, adi yŭn ngan ko jadi urun.

¹³ Stabi di TUHAN adi Tapa ngan, nyambah Ayŭh sadi adŭ, ka ndai janji ngan darŭm adŭn-I sadi adŭ.

¹⁴ Dŭhnyah nyambah tapa tapa adi bŭkŭn, tadŭ tadŭ tapa daya adi rŭŭ maning angān.

¹⁵ Kambŭi angān nyambah tapa tapa adi bŭkŭn, baji TUHAN re nyatŭk angān keya ka apui, ka re pirarap angān, amai TUHAN adi Tapa ngan, adi agi di ruang ngan, dŭh raan dog nyambah bigaur ngga tapa tapa adi bŭkŭn.

¹⁶ “Dŭhnyah suba TUHAN adi Tapa ngan, nimun anŭ adi ndai ngan di Massah.

¹⁷ Ingat nakit angān dŭh siŭn dŭh tunda sopŭrŭg ukum-adat adi Ayŭh muko nggen di angān.

¹⁸ Ndai anŭ adi TUHAN nang batur ka kana, ka angān re sanang. Angān re tungang dapu tarun tana damŭn anŭ adi TUHAN mbŭh bijanji an nggen di tayung-babuk ngan,

¹⁹ ka angān re pibu pinganyu ngan, nimun adi muko-I bijanji ngga angān.

²⁰ “Di tika adi re mandŭg, bara anak ngan re siken di angān, ‘Mani TUHAN adi Tapa ta pesan ata bada tunda sopŭrŭg ukum-adat anŭ?’

²¹ Jadi kidaan di ngara nang, ‘Ata ko jadi urun raja di Egypt, ka TUHAN muko piruah ata ngga kuasa bās-I.

²² Ngga batŭh adŭp ta ata kiris Ayŭh ndai pingandai-nginga ngga pingandai adi bisā di bara daya Egypt ka di raja ngara ka di sopŭrŭg pinurung-i.

²³ Ayŭh pirupas ata so Egypt ka taban ata kamati ka nggen tarun tana ati di ata nimun adi Ayŭh muko bijanji di tayung-babuk ta.

²⁴ Komŭnŭ TUHAN adi Tapa ta pesan ata bada tunda sopŭrŭg ukum-adat anŭ ka stabi di Ayŭh. Kambŭi ata ndai simŭnŭ, Ayŭh re ari nguan bangsa ta ka bada-i mujur.

²⁵ Kambŭi ata tŭtŭd tunda sopŭrŭg adi Tapa mbŭh pesan di ata, Ayŭh re munos asŭng-I di ata.’