DITRONOMI 34 - Hakcipta - Biatah Bidayuh

Moses Kabŭs

¹ Moses maad so rabak Moab ka Darŭd Nebo, di ka tibung Darŭd Pisgah tura ka timor kupo Jericho, ka diginŭ TUHAN kiren di ayŭh ndi abong abong tarun tana anŭ: so gadung tana Gilead jeh ka utara ndŭg kupo Dan;

² gadung tarun tana Naphtali; gadung tarun tana Ephraim ngga Manasseh, gadung tarun tana Judah jeh ndŭg Rawŭt Mediterranean di tura ka barat,

³ parad tarun tana Judah di tura ka siratan; ka rabak adi bayah-i so Zoar ndŭg Jericho, adi kupo tŭngŭn kurma.

⁴ Ka TUHAN nang di Moses, “Anŭ inŭh tarun tana adi Aku mbŭh bijanji di Abraham, Isaac, ngga Jacob an nggen di sesang ngara. Aku mbŭh bada kuu ninjau-i adŭ, pak Aku dŭh re bada kuu di kamanŭ.”

⁵ Jadi Moses, adi urun TUHAN, kabŭs diginŭ di tarun tana Moab nimun adi TUHAN muko kidaan.

⁶ TUHAN kubur ayŭh di rubān di Moab, bistatang ngga kupo Bethpeor, pak ndŭg andu ati mating daya puan diki sibatur yŭn-i dog kubur.

⁷ Moses mbŭh siratus duwŭh puru sawa umbur-i adi ngga-i kabŭs; ayŭh gibabŭ gures bake, ka piningga-i babŭ kana.

⁸ Daya Israel ngurid ayŭh taruh puru andu di rabak tarun tana Moab.

⁹ Joshua anak Nun brisi ngga pinyibijak, sabab Moses mbŭh tijuan ayŭh bada gati adŭp-i. Daya Israel tunda pinganang Joshua ka sita pesan adi TUHAN muko nggen di ngara so Moses.

¹⁰ So jaman anŭ, mating nabi mun Moses di Israel; TUHAN minyu situra jawin ngga ayŭh.

¹¹ Mating nabi bŭkŭn mbŭh ndai pingandai-nginga ngga pingandai-saruh mun anŭ adi TUHAN bada Moses ndai ngga rawan raja di Egypt, pinurung-i ka rais-i.

¹² Mating nabi adi bŭkŭn tungang ndai pingandai bās ngga adi pitaru mun adi Moses mbŭh ndai di sirung jawin sopŭrŭg daya Israel.