DITRONOMI 27 - Hakcipta - Biatah Bidayuh

Ukum-Adat Tapa dog Nuris di Batuh

¹ Komŭnŭ Moses, samah ngga bara pinguru Israel, nang di bara daya, “Tunda sopŭrŭg ajar adi aku nggen di angān andu ati.

² Di andu angān mutas Yang Jordan ka mŭrŭt tarun tana adi TUHAN adi Tapa ngan nggen di angān, angān an nugung batuh batuh baga, ka nutu ka pijarŭh-i ngga samen,

³ ka nuris di tunduh batuh batuh anŭ sopŭrŭg ukum-adat ngga ajar ati. Kan angān mbŭh mŭrŭt tarun tana adi kaya ngga damŭn anŭ adi TUHAN, adi Tapa tayung-babuk ngan, mbŭh bijanji an nggen di angān,

⁴ ka angān taŭn mbŭh di parad mandi Yang Jordan, angān an nugung batuh batuh anŭ di tibung Darŭd Ebal, nimun adi kidaan ku di angān andu ati, ka nutu ka pijarŭh-i ngga samen.

⁵ Pijog ndi mija-sambah diginŭ so batuh batuh adi bŭn dog mŭŭt ngga pingakas basi,

⁶ sabab tadŭ tadŭ mija-sambah adi angān pijog yŭn TUHAN adi Tapa ngan dŭh siŭn dŭh dog ndai so batuh adi dŭh dog mŭŭt. Diginŭ angān siŭn jugan sadis sadis adi main badang,

⁷ ka diginŭ angān siŭn nyadis ka man sadis bidingan ngga atin trima kaseh di sirung jawin TUHAN adi Tapa ngan.

⁸ Di tunduh tugung batuh anŭ nuris bada bitarang barang bang piminyu ukum-adat Tapa.”

⁹ Komŭnŭ Moses, samah ngga bara imam adi so asar Levi, nang di bara daya Israel, “Nakit dingah, angān daya Israel, kayuh adi nang ku. Andu ati angān mbŭh jadi daya TUHAN adi Tapa ngan;

¹⁰ ngapŭi tunda meh pinganang-I ka sita sopŭrŭg ukum adat-I adi aku nggen di angān andu ati.”

Pangu Dog Daya adi Nyibireu

¹¹ Komŭnŭ Moses nang di bara daya Israel,

¹² “Ripas angān muko mutas Yang Jordan, bara tibaran-asar ati an mijog di tibung Darŭd Gerizim kan berkat dog nyabŭt yŭn bara daya: Simeon, Levi, Judah, Issachar, Joseph ka Benjamin.

¹³ Ka bara tibaran-asar adi re mijog di tibung Darŭd Ebal kan pangu dog nyabŭt: Reuben, Gad, Asher, Zebulun, Dan ka Naphtali.

¹⁴ Bara daya Levi re nyabŭt pinganang ati ngga sirŭŭn bana:

¹⁵ “ ‘Pangu Tapa nyatŭk tadŭ tadŭ daya adi ndai tibudo so batuh, so kayuh, puan kah so basi, ka nyambah-i darŭm bisukan; TUHAN tiru di pingandai nyambah tibudo’. “Ka sopŭrŭg daya re nam, ‘Amen!’

¹⁶ “ ‘Pangu Tapa nyatŭk tadŭ tadŭ daya adi dŭh stabi di sindŭ sama-i.’ “Ka sopŭrŭg daya re nam, ‘Amen!’

¹⁷ “ ‘Pangu Tapa nyatŭk tadŭ tadŭ daya adi ngana tandā baat dingan-i.’ “Ka sopŭrŭg daya re nam, ‘Amen!’

¹⁸ “ ‘Pangu Tapa nyatŭk tadŭ tadŭ daya adi taban daya adi karak kadŭg aran adi sarah.’ “Ka sopŭrŭg daya re nam, ‘Amen!’

¹⁹ “ ‘Pangu Tapa nyatŭk tadŭ tadŭ daya adi sirapas hak daya pinami, anak tumang, ka dayung uban.’ “Ka sopŭrŭg daya re nam, ‘Amen!’

²⁰ “ ‘Pangu Tapa nyatŭk tadŭ tadŭ daya adi pimangŭh sama-i, anŭ inŭh nurut pinyiripong pŭrŭng-i ngga tadŭ tadŭ so bara sawŭn nyama-i.’ “Ka sopŭrŭg daya re nam, ‘Amen!’

²¹ “ ‘Pangu Tapa nyatŭk tadŭ tadŭ daya adi birambang ngga dāng.’ “Ka sopŭrŭg daya re nam, ‘Amen!’

²² “ ‘Pangu Tapa nyatŭk tadŭ tadŭ daya adi raban ngga jurud dayung-i, puan kah ngga jurud tiri-i adi dayung.’ “Ka sopŭrŭg daya re nam, ‘Amen!’

²³ “ ‘Pangu Tapa nyatŭk tadŭ tadŭ daya adi raban ngga dinŭh-i.’ “Ka sopŭrŭg daya re nam, ‘Amen!’

²⁴ “ ‘Pangu Tapa nyatŭk tadŭ tadŭ daya adi siŭ daya darŭm bisukan.’ “Ka sopŭrŭg daya re nam, ‘Amen!’

²⁵ “ ‘Pangu Tapa nyatŭk tadŭ tadŭ daya adi trima duit upah yŭn siŭ daya adi dŭh sarah.’ “Ka sopŭrŭg daya re nam, ‘Amen!’

²⁶ “Pangu Tapa nyatŭk tadŭ tadŭ daya adi dŭh tunda sopŭrŭg ukum-adat ngga ajar Tapa.’ “Ka sopŭrŭg daya re nam, ‘Amen!’