DITRONOMI 26 - Hakcipta - Biatah Bidayuh

Pinganggen So Pingatŭm

¹ “Ripas angān mbŭh mŭrŭt ka ngisi tarun tana adi TUHAN adi Tapa ngan nggen di angān, ka mbŭh tatu rŭŭ diginŭ,

² barang naan angān dŭh siŭn dŭh na darŭm bakur buwa bungas adi angān ngatŭm, ka taban-i ka tarun yŭn anŭ adi ndi adŭ yŭn bisambah.

³ Tudu imam anŭ adi agi nyiraja di tipuh anŭ, ka nang di ayŭh, ‘Madin aku ngaku di sirung jawin TUHAN adi Tapa ku amai aku mbŭh mŭrŭt tarun tana adi Ayŭh mbŭh bijanji di tayung-babuk ta an nggen di ata.’

⁴ “Imam anŭ re tambit bakur anŭ so angān ka piguru-i di jawin mija-sambah TUHAN adi Tapa ngan.

⁵ Komŭnŭ, di sirung jawin TUHAN, angān an nyabŭt pinganang ati: ‘Babuk ku inŭh daya Aram adi bigandon, adi taban rawang-i di ka Egypt ka rŭŭ diginŭ. Nisŭ adŭ ngara di andu ngara bipindah kamanŭ, pak ngara jadi bangsa adi bās buang bake.

⁶ Daya Egypt pijera kieh ka takan kieh nyiraja mun urun.

⁷ Ka kieh bagan mite turung so TUHAN, adi Tapa tayung-babuk ami. Ayŭh dingah kieh ka kiris kieh dog pijera, dog kinanyuh, ka dog kisiis.

⁸ Ngga kuasa-I adi bās ka pinyibake-I Ayŭh piruah kieh so Egypt. Ayŭh ndai pingandai-nginga ngga pingandai saruh, ka bada kayuh adi pitaru jadi.

⁹ Ayŭh taban kieh kamati ka nggen tana ati adi kaya ka damŭn di kieh.

¹⁰ Sabab anŭ meh, madin aku mandŭg taban ka yŭn TUHAN buwa bungas kayuh adi aku ngatŭm adi Ayŭh mbŭh nggen di aku.’ “Komŭnŭ na bakur anŭ di sirung jawin TUHAN, ka nyambah Ayŭh diginŭ.

¹¹ Nggen trima kaseh meh angān sabab kayuh kayuh kana adi TUHAN adi Tapa ngan mbŭh nggen di angān ngga di rawang ngan; ka bada daya Levi ngga daya pinami adi rŭŭ di ruang ngan sua pawŭn ngga angān.

¹² “Barang sawa adi taruh nggen pinganggen, anŭ inŭh ndi utung-so-simŭng so buwa pingatŭm ngan di daya Levi, di daya pinami, di anak tumang, ngga dayung uban, isa di barang kaum re agi sukup pinguman. Kan angān muko ndai simŭnŭ,

¹³ minyu di TUHAN, ‘Mating pinganggen ndi utung-so-simŭng anŭ adi kudus dŭm di arŭn ku; aku mbŭh nggen di daya Levi, di daya pinami, di anak tumang, ka di dayung uban, nanyam adi Kaam ko pesan di aku. Aku mating nyibireu bait kambŭt tadŭ tadŭ pesan Mai jeja ka pinganggen ndi utung-so-simŭng anŭ.

¹⁴ Di tika aku ngurid aku mating man-i; di tika aku kais nanyam ka adat aku mating taban-i ngga ruah so ramin ku; ka aku mating nggen-i ndu sadis yŭn daya kabŭs. Aku tunda pinganang Mai, O TUHAN; Aku mbŭh ndai sopŭrŭg-i nanyam ka pesan Mai jeja ka pinganggen ndi utung-so-simŭng anŭ.

¹⁵ Tingga ka sagān so yŭn kudus Mai di shorga, ka nyiberkat daya Mai Israel. Nyiberkat gŭh tarun tana adi kaya ka damŭn adi Kaam mbŭh nggen di kieh, nimun adi Kaam mbŭh bijanji di tayung-babuk ami.’

Daya adi TUHAN Mbŭh Mien

¹⁶ “Andu ati TUHAN adi Tapa ngan pesan angān da tunda sopŭrŭg ukum adat-I; tunda meh ngga sukup atin sabah ka ngga siabo atin ngan.

¹⁷ Andu ati angān mbŭh ngaku TUHAN adi Tapa ngan; angān mbŭh bijanji an tunda pinganang-I, sita sopŭrŭg ukum adat-I, ka ndai sopŭrŭg adi-I pesan.

¹⁸ Andu ati TUHAN mbŭh trima angān jadi daya adŭp-I nanyam ka janji-I; ka Ayŭh pesan angān bada tunda sopŭrŭg pinyipesan-I.

¹⁹ Ayŭh re bada angān jadi bās dŭ so tadŭ tadŭ bangsa bŭkŭn adi Ayŭh mbŭh napa, ka angān re nggen puji ngga stabi di adŭn-I. Angān re jadi daya adŭp-I, nimun janji-I.”