DITRONOMI 25 - Hakcipta - Biatah Bidayuh

¹ “Nyamtadar-i duwŭh naan daya Israel di ka yŭn bisara an nyirase kaii ngara, ka ndi naan dog dapŭd dŭh sarah, sianŭ ndi dog dapŭd sarah.

² Kambŭi sianŭ adi sarah dog ukum padŭs, akim siŭn bada ayŭh nyipŭŭb ka bada daya madŭs ayŭh. Pikudu kari ayŭh dog madŭs inŭh nanyam ka sarah adi ko-i ndai.

³ Ayŭh siŭn dog madŭs 40 kari, ka dŭh siŭn rabis so anŭ; rabis so anŭ re pimangŭh ayŭh di sirung jawin daya bagŭ.

⁴ “Dŭhnyah mŭŭng baba sapi kan angān bada-i ngiik gandom.

Kraja adi Patut Dog Ndai yŭn Jurud Dari adi Mbŭh Kabŭs

⁵ “Kambŭi duwŭh naan dari adi bijurud rŭŭ samah, ka ndi naan so ngara anŭ kabŭs ka mating anak dari tingge-i; sawŭn nyanŭ adi mbŭh kabŭs dŭh siŭn banan ka banŭh dari bŭkŭn di sapa rawang anŭ. Jurud dari nyanŭ adi mbŭh kabŭs patut sawŭn dayung uban anŭ.

⁶ Ka pinuai anak dari ngara re dog nyirundeng anak dari nyanŭ adi mbŭh kabŭs, isa taris asar-i bisa babŭ darŭm Israel.

⁷ Pak kambŭi jurud nyanŭ adi mbŭh kabŭs abah sawŭn dayung uban anŭ, dayung uban anŭ siŭn di bidapŭd ngga bara pinguru kupo ka nang, ‘Jurud banŭh ku dŭh raan ndai kayuh adi patut-i ndai; ayŭh abah pakat sesang jurud-i di dupan daya Israel.’

⁸ Komŭnŭ bara pinguru kupo bisa bagan dari anŭ ka minyu ngga ayŭh. Kambŭi ayŭh abah gŭh sawŭn dayung uban anŭ,

⁹ dayung uban anŭ siŭn di ka yŭn-i di sirung jawin pinguru pinguru kupo anŭ, kadi ndi kasut-i, nyiruja jawin-i, ka nang, ‘Simuti inŭh kayuh di dari adi abah pakat sesang jurud-i.’

¹⁰ Rawang-i re dog kadŭn darŭm Israel ‘rawang daya adi ko dog kadi kasut-i.’

Ukum-adat adi Bŭkŭn

¹¹ “Kambŭi duwŭh naan dari birawan, ka sawŭn ndi naan suba turung banŭh-i buang rasu ngagŭm sikawa dari anŭ ndi,

¹² dŭhnyah masi di dayung anŭ; kapŭg tangan-i.

^13-14 “Dŭhnyah nipu kan angān nimbang bait nakar kayuh.

¹⁵ Pakai timbang ngga takar adi batur, isa angān tui udip di tarun tana adi TUHAN adi Tapa ngan nggen di angān.

¹⁶ TUHAN tiru di daya adi nipu.

Pesan Bada Siŭ Daya Amalek

¹⁷ “Ingat kayuh adi daya Amalek ndai di tunduh ngan darŭm angān mandŭg so Egypt.

¹⁸ Ngara dŭh taru di Tapa, ngapŭi ngara nyerang angān so punok ngan darŭm angān mbŭh raru kawŭk buang sarsor, ka siŭ sopŭrŭg ngan adi panu sundis di aran.

¹⁹ Sabab anŭ meh, kan TUHAN muko nggen tarun tana anŭ di angān, ka bada angān siramat so sopŭrŭg pinganyu ngan adi rŭŭ maning angān, angān dŭh siŭn dŭh kubo siŭ daya Amalek, isa daya mating tia ingat ngara. Dŭhnyah angān kambŭt!