DITRONOMI 23 - Hakcipta - Biatah Bidayuh

Daya adi Dŭh Siŭn dog Pibŭrŭt ka darŭm Tibaran Daya TUHAN

¹ “Mating daya adi muko dog nuroi puan kah adi muko dog kapŭg buat-i siŭn dog pibŭrŭt ka darŭm tibaran daya TUHAN.

² “Mating daya adi dog biranak di sapa adat banan sawan puan kah tadŭ tadŭ sesang daya adi mun anŭ, ndŭg ka adi so turap simŭng bait kani, siŭn dog pibŭrŭt ka darŭm tibaran daya TUHAN.

³ “Mating daya Ammon puan kah daya Moab, puan kah tadŭ tadŭ so sesang ngara, ndŭg ka turap adi simŭng bait kani, siŭn dog pibŭrŭt ka darŭm tibaran daya TUHAN.

⁴ Ngara abah nggen di angān pinguman bait piin di tika angān ruah so Egypt; ka ngara ngupah Balaam anak Beor, so kupo Pethor di Mesopotamia, da mangu angān.

⁵ Pak TUHAN adi Tapa ngan dŭh raan dingah Balaam, tanŭ ka Ayŭh marik pangu-i bada jadi berkat, sabab Ayŭh rindu angān.

⁶ Sitŭkŭd angān gibabŭ ndi bangsa, dŭhnyah ndai tadŭ tadŭ kayuh ngga turung bangsa bangsa anŭ puan kah ngga bada ngara mujur.

⁷ “Dŭhnyah ngamun daya Edom; ngara anŭ madis ngan. Ka dŭhnyah ngamun daya Egypt; angān muko dawŭ-i rŭŭ di tarun tana ngara.

⁸ Piguru so turap adi taruh sesang ngara anŭ siŭn dog pibŭrŭt ka darŭm tibaran daya TUHAN.

Kingat Bari bara Soldadu bada Bisig

⁹ “Kan angān bibari di tipuh perang, angān dŭh siŭn dŭh kingat jaga adŭp ngan so tadŭ kayuh adi bisa bada angān jadi kais nanyam ka adat.

¹⁰ Kambŭi daya jadi kais amai ayŭh nyibubot da pŭmŭh darŭm-i bŭŭs singarŭm, ayŭh an ruah di ka sapa tarun yŭn bibari ka rŭŭ diginŭ.

¹¹ Sindŭk singumi andu ayŭh an mamuh adŭp-i, ka ngga simŭdŭp batŭh andu ayŭh siŭn pari ka darŭm bari.

¹² “Angān an biyŭn di sapa tarun yŭn bibari, tarun yŭn bijamban.

¹³ Kan angān raan bijamban, angān an taban apŭg kayuh ngga kareh rubang ka ngga napuk-i.

¹⁴ Bada bari ngan bisig nanyam ka adat, amai TUHAN adi Tapa ngan agi ngga angān darŭm bari ngan, grindung angān ka nggen pimanang di angān rawan pinganyu ngan. Dŭhnyah ndai pingandai adi dŭh tatu adi bisa bada TUHAN nyipunok angān.

Barang mun Ukum-adat

¹⁵ “Kambŭi daya urun bu so tuan adi dapu ngara ka mandŭg ka yŭn ngan mite pinyigrindung, dŭhnyah pibu ngara bada pari.

¹⁶ Ngara siŭn rŭŭ di tadŭ kupo ngan adi ngara mien, ka angān dŭhnyah ida ida ngga ngara.

¹⁷ “Mating daya Israel, dari bait dayung siŭn jadi sundar bari-sambah.

¹⁸ Ka dinge, mating duit adi dog dapŭd so kraja pingandai adi mun anŭ siŭn dog taban ka darŭm Ramin TUHAN adi Tapa ngan ngga pijadi payu. TUHAN tiru di sundar bari-sambah.

¹⁹ “Kan angān nginjam duit, puan kah pinguman, puan kah tadŭ tadŭ kayuh ka dingan ngan adi samah daya Israel, dŭhnyah mite anak duit so ngara.

²⁰ Angān siŭn mite anak duit so kayuh adi angān nginjam ka daya pinami, pak dŭh so kayuh adi angān nginjam ka daya Israel. Tunda atur ati, ka TUHAN adi Tapa ngan re nyiberkat sopŭrŭg kayuh adi angān ndai di tarun tana adi angān re ngisi.

²¹ “Kan angān muko bipayu ngga TUHAN adi Tapa ngan, dŭhnyah dŭh ndai kayuh adi angān muko bijanji an ndai; TUHAN re digŭng payu ngan anŭ, ka-i re jadi dosa kambŭi angān dŭh ndai-i.

²² Dŭh nŭŭh bidosa dŭh ndai payu ngga TUHAN,

²³ pak kambŭi angān ngaŭn asŭng ndai payu ngan, dŭhnyah dŭh sita payu ngan anŭ.

²⁴ “Kan angān panu mutas teya anggor daya, angān bisa man sikiang buwa anggor angān raan, pak angān dŭh siŭn na-i darŭm bakur ngga taban bu.

²⁵ Kan angān panu mutas teya gandom daya, angān bisa man sikiang gandom adi angān tungang muas ngga tangan ngan, pak angān dŭh siŭn kapŭg tundun-i ngga gayang pingatŭm.