DITRONOMI 22 - Hakcipta - Biatah Bidayuh

¹ “Kambŭi angān kiris sapi puan kah biri daya Israel rupas, dŭhnyah tandah-i; taban-i pari ka daya adi dapu-i.

² Pak kambŭi daya adi dapu-i rŭŭ jo so nŭ, puan kah kambŭi angān dŭh puan asi dapu-i, angān siŭn taban-i ngga maad. Kan daya adi dapu-i mandŭg di jiroh-i, nggen-i pari ka adŭp-i.

³ Ndai simŭnŭ gŭh kambŭi angān dapŭd kaldi, supek piraka, puan kah tadŭ tadŭ kayuh adi daya Israel mbŭh bada manyap.

⁴ “Kambŭi kaldi puan kah sapi daya Israel rabu, dŭhnyah tandah; turung ayŭh pakat dāng anŭ bada mijog.

⁵ “Dayung dŭh siŭn nēn piraka dari, ka dari dŭh siŭn nēn piraka dayung. TUHAN adi Tapa ngan tiru di daya adi ndai simŭnŭ.

⁶ “Kambŭi angān tipia dapŭd sarin manuk di atuh kayuh puan kah di tana, ka agi sindŭ manuk anŭ ngŭkŭp turoh-i puan kah ngga anak-i, angān dŭh siŭn tambit sindŭ manuk anŭ.

⁷ Angān bisa tambit anak manuk anŭ, pak angān dŭh siŭn dŭh tandah sindŭ manuk anŭ, isa pimudip ngan tui buang mujur.

⁸ “Kan angān pijog ramin bauh, angān an nakit ingat ndai buwang maning bŭngŭn tibung ramin. Jadi angān dŭh re dapu tanggong kambŭi daya rabu puan kah kabŭs rabu so dieh.

⁹ “Dŭhnyah purun tadŭ tadŭ pimuruh di ndi teya bigaur ngga tŭngŭn tŭngŭn anggor ngan; kambŭi angān ndai simŭnŭ, angān dog kijaman sun buwa buwa anggor bait buwa buwa pimuruh ngan anŭ.

¹⁰ “Dŭhnyah bada birapid sapi ngga kaldi di ndi bajak, ngga majak tana ngan.

¹¹ “Dŭhnyah nēn banang adi dog nanun so buruh biri bigaur ngga banang linen.

¹² “Nyiit jabuh taris di so-pat sikuh piraka ngan.

Ukum-Adat Jeja ka Pinyiripong Pŭrŭng

¹³ “Nyamtadar-i ndi naan dari sawŭn ndi naan dayung adi gibabŭ mara, ka ripas anŭ ayŭh dŭh tia suka ayŭh.

¹⁴ Jadi dari anŭ nang barang ka sak pinganang kadong ngga nyarah dayung anŭ, napŭ ayŭh dŭh dayung tibŭn di andu ngara sawan.

¹⁵ “Kambŭi har anŭ agi timur, pimas dayung anŭ siŭn taban tapas ambok sawan ngara adi agi takar titeg deya dieh adi natu ayŭh dayung tibŭn, ka kiren-i di pinguru pinguru kupo di yŭn bisara.

¹⁶ Sama dayung anŭ an kidaan di ngara, ‘Aku nggen anak dayung ku di dari ati bada ayŭh sawŭn, ka madin ayŭh dŭh suka ayŭh.

¹⁷ Ayŭh barang ka sak-i nang pinganang kadong ngga napŭ ayŭh, nang ayŭh dŭh dayung tibŭn di andu ngara sawan. Pak ta rah-i taksi adi natu anak ku dayung tibŭn. Tingga no takar titeg deya di tapas ambok ngara!’

¹⁸ Komŭnŭ bara pinguru kupo siŭn tambit banŭh dayung anŭ ka madŭs ayŭh.

¹⁹ Bara pinguru anŭ siŭn ngukum gŭh ayŭh bada bayar siratus kiping duit pirak ka nggen duit anŭ di sama dayung anŭ, sabab dari anŭ mbŭh nggen mangŭh di dayung daya Israel. Nambah ka anŭ, dayung anŭ siŭn babŭ jadi sawŭn-i, ka ayŭh dŭh siŭn taran ayŭh sitŭkŭd adŭp-i udip.

²⁰ “Pak kambŭi dayung anŭ sawŭ dŭh dayung tibŭn sak adi nang dari anŭ, ka mating taksi adi nang ayŭh dayung tibŭn,

²¹ bara pinguru anŭ an taban dayung anŭ ngga ruah ka rawa ramin sama-i, di yŭn bara dari so kupo anŭ manjan ayŭh ngga batuh ndŭg kabŭs. Ayŭh mbŭh ndai kayuh adi nggen mangŭh di dupan bangsa ta, anŭ inŭh nurut pinyiripong pŭrŭng diŭ so ayŭh banan, darŭm ayŭh gibabŭ rŭŭ di ramin sama-i. Simŭnŭ inŭh angān taran kraja arap anŭ.

²² “Kambŭi ndi naan daya dog dapŭd nurut pinyiripong pŭrŭng-i ngga sawŭn daya, so-duwŭh ngara an dog siŭ. Simŭnŭ angān taran kraja arap anŭ.

²³ “Kambŭi ndi naan daya di kupo dog dapŭd nurut pinyiripong pŭrŭng-i ngga dayung adi mbŭh bitunang ngga dari bŭkŭn,

²⁴ angān siŭn taban so-duwŭh ngara ngga ruah ka sapa kupo, ka manjan ngara ngga batuh ndŭg ka kabŭs. Dayung anŭ patut kabŭs sabab ayŭh dŭh nyirais mite turung pŭn ka-i darŭm kupo adi yŭn sirais-i tungang dog dingah. Ka dari anŭ patut kabŭs sabab ayŭh nurut pinyiripong pŭrŭng-i ngga dayung adi mbŭh agi tunang-i. Simŭnŭ angān taran kraja arap anŭ.

²⁵ “Nyamtadar-i ndi naan dari di sapa kupo miragag ndi naan dayung adi mbŭh bitunang. Kaŭs-i dari anŭ adŭ adi dŭh siŭn dŭh dog ukum kabŭs;

²⁶ mating ani ani siŭn dog dayung anŭ sabab ayŭh dŭh ndai sarah adi yŭn-i patut dog ukum kabŭs. Har anŭ brimun ngga ndi naan daya nyerang ka siŭ daya bŭkŭn.

²⁷ Dayung anŭ adi mbŭh bitunang dog miragag di sapa kupo, ka sunggu ayŭh nyirais mite turung, daya mating turung ayŭh.

²⁸ “Nyamtadar ndi naan daya dog nakap miragag ndi naan dayung adi gibayuh bitunang,

²⁹ ayŭh dŭh siŭn dŭh bayar sama dayung anŭ duit sawan sikiang rimŭh puru kiping duit pirak, ngga tambit dayung anŭ ndu sawŭn-i, sabab ayŭh mbŭh takan dayung anŭ yŭn-i pimunos pinyiraan pŭrŭng. Ayŭh dŭh siŭn taran dayung anŭ sitŭkŭd adŭp-i gibabŭ udip.

³⁰ “Daya dŭh siŭn nggen mangŭh di sama-i, nyibŭŭs ngga tadŭ tadŭ sawŭn sama-i.