DITRONOMI 18 - Hakcipta - Biatah Bidayuh

Tah Utung Bara Imam

¹ “Bara imam adi so tibaran-asar Levi dŭh siŭn sua dapu utung tana di Israel. Ngara udip so pinganggen ngga sadis sadis adi dog jugan ka TUHAN.

² Ngara dŭh siŭn sua dapu utung tana nimun tibaran-asar adi bŭkŭn. Tung ngara utung inŭh jadi imam TUHAN, nimun adi mbŭh TUHAN janji.

³ “Kan di tika sapi bait biri dog nyadis, bara imam an dog nggen kawin, siraka, ka tain dāng anŭ.

⁴ Ngara siŭn trima sibungas utung so gandom, wain, inyo kanā, ka buruh biri.

⁵ Amai so sopŭrŭg tibaran-asar ngan, TUHAN mbŭh mien tibaran-asar Levi bada jadi bara imam-I ndŭg situi tui.

⁶ “Tadŭ tadŭ daya Levi, adi raan, siŭn mandŭg so tadŭ kupo darŭm Israel di ka tarun yŭn anŭ adi ndi adŭ yŭn bisambah

⁷ ka siŭn ndai kraja imam diginŭ nimun imam TUHAN adi Tapa-i, nimun bara Levi adi bŭkŭn adi ndai kraja ngara diginŭ.

⁸ Ayŭh siŭn trima pinguman nyikiang ngga imam adi bŭkŭn, ka ayŭh siŭn nyikŭn ani bait ani kayuh adi rawang-i pait ka ayŭh.

Pinyibakan pasar Kraja Pingandai Daya Karŭm

⁹ “Kan angān mbŭh mŭrŭt tarun tana adi TUHAN adi Tapa ngan nggen di angān, dŭhnyah tunda pingandai arap adi dog ndai bangsa bangsa bŭkŭn adi rŭŭ diginŭ.

¹⁰ Dŭhnyah nyadis anak adŭp ngan di apui di tunduh mija-sambah ngan; ka dŭhnyah tandah bangsa adŭp ngan ndai pingandai nanung, puan kah sabah di pinyipuan jang bait pinganang dukun,

¹¹ puan kah barang masam uri karŭm, ka dŭhnyah tandah ngara bisiken ngga roh daya adi mbŭh kabŭs.

¹² TUHAN adi Tapa ngan tiru di daya adi ndai kraja pingandai arap anŭ, ka anŭ inŭh sabab-I pibu bangsa bangsa anŭ so tarun tana anŭ darŭm angān masang mŭrŭt-i.

¹³ Angān dŭh siŭn dŭh sukup tŭtŭd di TUHAN.”

Tapa Bijanji an Pait Ndi Naan Nabi

¹⁴ Komŭnŭ Moses nang, “Di tarun tana adi angān re ngisi, daya diginŭ tunda pinganang bara pinanung ka sabah di pinyipuan jang, pak TUHAN adi Tapa ngan dŭh nyibandar angān ndai simŭnŭ.

¹⁵ Ka Ayŭh re pait ka yŭn ngan ndi naan nabi mun aku, so ruang bangsa adŭp ngan, ka angān dŭh siŭn dŭh tunda pinganang-i.

¹⁶ “Di andu adi ngga angān tikuruk di Darŭd Sinai, angān mite adŭp ngan dŭh tia dingah TUHAN minyu, bait tingga Ayŭh nandŭng darŭm jireb apui, amai angān taru adŭp ngan kabŭs.

¹⁷ Jadi TUHAN nang di aku, ‘Raru bijak pimite ngara.

¹⁸ Aku re pait ndi naan nabi adi mun kuu ka yŭn ngara so ruang bangsa adŭp ngara. Aku re kidaan di ayŭh kayuh adi re-i nang, ka ayŭh re kidaan di ngara sopŭrŭg kayuh adi Aku pesan.

¹⁹ Ayŭh re minyu ngga adŭn Ku, ka Aku re ngukum tadŭ tadŭ daya adi abah tunda pinganang-i.

²⁰ Pak kambŭi agi nabi pagan minyu ngga adŭn Ku darŭm Aku mating pesan ayŭh da ndai simŭnŭ, ayŭh dŭh siŭn dŭh kabŭs. Simŭnŭ gŭh ngga tadŭ tadŭ nabi adi minyu ngga dŭn tapa tapa adi bŭkŭn.’

²¹ “Kadŭ angān re nginga simuki re ngatŭn pinganang nabi dŭh mandŭg so TUHAN.

²² Kambŭi nabi minyu ngga adŭn TUHAN, ka kayuh adi nang-i dŭh jadi bitŭtŭk, angān puan nang anŭ dŭh pinganang so TUHAN. Nabi anŭ mbŭh minyu so ka pinyiraan atin adŭp-i, ka angān dŭh siŭn taru di ayŭh.”