DITRONOMI 17 - Hakcipta - Biatah Bidayuh

¹ “Dŭhnyah nyadis ka TUHAN adi Tapa ngan sapi puan kah biri adi dŭh ramus pidanah; TUHAN tiru di pingandai adi mun anŭ.

² “Nyamtadar-i angān dingah darŭm ndi so kupo kupo ngan kada dari puan kah dayung mbŭh bidosa rawan TUHAN ka miranggar simanya-I,

³ anŭ inŭh nyambah ka bituan di tapa bŭkŭn, batŭh andu, buran, ka bitang, adi sitiked so pesan-I.

⁴ Kambŭi angān dingah kayuh anŭ, nyuki-i nakit nakit. Kambŭi kayuh arap anŭ sawŭ agi jadi di Israel,

⁵ taban adŭp ngara anŭ ngga ruah ka sapa kupo ka manjan ngara ngga batuh ndŭg kabŭs.

⁶ Pak sunggu mŭnŭ, ngara bisa dog ukum kabŭs adŭ-i kambŭi agi duwŭh puan kah rabis daya bisaksi rawan ngara. Ngara dŭh siŭn dog ukum kabŭs kambŭi ndi naan adŭ saksi.

⁷ Bara saksi siŭn jakad sibungas batuh di ngara; komŭnŭ sopŭrŭg daya adi bŭkŭn siŭn manjan ngara gŭh ngga batuh. Simŭnŭ inŭh angān kadi arap anŭ so ruang ngan.

⁸ “Kadŭ agi kada har adi raru mbar re bara akim ngatur, mun har pasar hak di buat-rata, puan kah har pasar pŭrŭng ganan adi biragan, puan kah har pasar aki ndi siŭ daya ngga aki ndi kinanyap asŭng daya ngga dŭh singaja. Kan har adi mun anŭ timur, di ka tarun yŭn anŭ adi ndi adŭ yŭn bisambah adi dog mien TUHAN adi Tapa ngan,

⁹ ka nggen har anŭ ka bara imam adi so asar Levi samŭn ka akim adi agi kŭkŭn kraja-i di tipuh anŭ, ka bada ngara nyirase har anŭ.

¹⁰ Ngara anŭ re nggen pimatŭd pikir-kira ngara, ka angān an ndai nanyam adi kidaan ngara di angān.

¹¹ Trima itong adi ngara matŭd ka tunda atur-adat adi ngara nggen ngga sipuno-i.

¹² Tadŭ tadŭ daya adi pagan rawan pinganang akim bait pinganang imam adi ndai kraja-i di tipuh anŭ dŭh siŭn dŭh dog ukum kabŭs. Simŭnŭ inŭh angān bisa kadi arap anŭ so Israel.

¹³ Jadi barang naan daya re dingah ka jadi taru, ka mating katŭn daya re pagan ndai sarah adi mun anŭ.

Pingatur Jeja ka Raja

¹⁴ “Ripas angān mbŭh tambit tarun tana adi TUHAN adi Tapa ngan nggen di angān ka mbŭh bituku rŭŭ diginŭ, angān re natu adŭp ngan biyŭn raja mun sopŭrŭg bangsa bŭkŭn adi maning angān.

¹⁵ Angān an nakit natu daya adi angān mien bada jadi raja inŭh daya adi adŭp TUHAN mbŭh mien. Ayŭh dŭh siŭn dŭh daya bangsa adŭp ngan, ka mba ngapŭh bada daya pinami jadi raja ngan.

¹⁶ Raja anŭ dŭhsah biyŭn paŭh bagŭ kuda yŭn bara soldadu-i, ka ayŭh dŭhnyah gŭh bada daya-i di ka Egypt miris kuda, sabab TUHAN mbŭh minyu nang daya-I re dŭh tia pari kamanŭ.

¹⁷ Raja anŭ dŭh siŭn biyŭn bagŭ sawŭn, amai anŭ bisa bada ayŭh nyibireu TUHAN; ka ayŭh dŭh siŭn bada adŭp-i kaya ngga mas pirak.

¹⁸ Kan ayŭh jadi raja, ayŭh an biyŭn ndi surat ukum-adat ngga ajar Tapa adi dog mbit so anŭ adi dog nyikŭn bara imam so asar Levi.

¹⁹ Ayŭh siŭn nyikŭn surat anŭ sindŭk adŭp-i ka ari basa-i sitŭkŭd ayŭh udip, isa ayŭh bisa birajar stabi di TUHAN ka tunda ngga atin tŭtŭd sopŭrŭg kayuh adi dog pesan darŭm surat anŭ.

²⁰ Anŭ re bada ayŭh dŭh pikir adŭp-i kana dŭ so daya Israel adi bŭkŭn, ka isa ayŭh dŭh nyibireu kayuh adi TUHAN pesan. Simŭnŭ inŭh ayŭh re bisawa sawa mritah, ka bara sesang-i re biturap turap mritah Israel.