DITRONOMI 13 - Hakcipta - Biatah Bidayuh

¹ “Kadŭ nabi nabi puan kah ngara adi tukang kidaan rati pŭmŭh re bijanji nang adŭp-i re ndai pingandai-nginga puan kah pingandai saruh,

² ngga-i nyikuro angān bada nyambah ka bituan di tapa tapa adi angān bŭn nyambah dawŭ-i. Sunggu bait kani janji ngara jadi bitŭtŭk,

³ dŭhnyah piduri ngara. TUHAN adi Tapa ngan mbŭh pakai ngara ngga suba angān, an tingga nang ka sawŭ rindu ngan kah TUHAN ngga siabo atin ngan.

⁴ Tunda TUHAN ka stabi di ayŭh; nurut pinganang-I ka sita pinyipesan-I; nyambah Ayŭh ka tŭtŭd di Ayŭh.

⁵ Pak siŭ ngara adi tukang kidaan rati pŭmŭh bait nabi nabi adi bada angān rawan TUHAN adi pirupas angān so Egypt, di yŭn angān ko jadi urun. Daya adi mun anŭ arap; ngara suba bada angān miriseu so aran pimudip adi TUHAN mbŭh pesan di angān. Ngara dŭh siŭn dŭh dog siŭ, ngga kadi adŭp ngan so arap adi mun anŭ.

⁶ “Ndŭg ka adŭp jurud ngan, puan kah anak dari ngan, puan kah anak dayung ngan, puan kah sawŭn ngan adi angān rindu, puan kah dingan ngan adi raru rapat ngga angān bisa gŭh darŭm bisukan ngatat angān bada nyambah tapa tapa adi bŭkŭn, adi angān ngga tayung-babuk ngan bŭn nyambah.

⁷ Kada so ngara bisa gŭh ngasu angān bada nyambah tapa tapa ngara adi rŭŭ sindŭk angān puan kah tapa tapa ngara adi rŭŭ jo so angān.

⁸ Pak dŭhnyah bada tadŭ so ngara nyikuro angān; dŭhnyah dingah pinganang ngara. Dŭhnyah masi di ngara, ka dŭhnyah gŭh grindung ngara.

⁹ Siŭ ngara! Diŭ nŭŭh manjan ngara ngga batuh, ka komŭnŭ tandah sopŭrŭg daya bŭkŭn manjan gŭh ngara.

¹⁰ Manjan ngara ngga batuh ndŭg ka kabŭs! Ngara mbŭh suba an bada angān miriseu so TUHAN adi Tapa ngan adi piruah angān so Egypt adi yŭn ngan ko jadi urun.

¹¹ Komŭnŭ sopŭrŭg daya Israel re dingah kayuh adi mbŭh jadi; ngara re taru, ka ndi naan mating gŭh re tia ndai kayuh adi arap mun anŭ dinge

¹² “Kan angān rŭŭ darŭm kupo kupo adi TUHAN adi Tapa ngan nggen di angān, angān re dingah

¹³ nang kada daya adi dŭh biguna so bangsa ngan mbŭh bada miriseu kada daya so kupo ngara bada nyambah tapa tapa adi adŭp ngan bŭn nyambah dawŭ-i.

¹⁴ Kambŭi angān dingah kayuh adi sakanŭ, nakit nyuki dawŭ-i; ka kambŭi kayuh arap anŭ sawŭ,

¹⁵ angān bisa siŭ sopŭrŭg daya adi di kupo anŭ samŭn sopŭrŭg dāng kudip ngara. Pirabur kupo anŭ.

¹⁶ Nguruk sopŭrŭg buat-rata daya daya adi rŭŭ diginŭ ka nugung-i di pakan kupo. Komŭnŭ sigot kupo anŭ ngga sopŭrŭg kayuh adi darŭm-i ndu sadis ka TUHAN adi Tapa ngan. Anŭ dŭh siŭn dŭh adu adu nyibawang ka dŭh tia pari dog pijog.

¹⁷ Dŭhnyah tambit yŭn adŭp ngan tadŭ tadŭ kayuh adi mbŭh dog ngŭtŭ dŭh siŭn dŭh dog pirabur; ka TUHAN re dŭh tia raru baji ka re kiren masi-I di angān. Ayŭh re masi di angān ka re bada angān jadi daya adi raru bagŭ, nimun adi Ayŭh muko janji di tayung-babuk ngan,

¹⁸ kambŭi angān tunda sopŭrŭg pesan adi aku nggen di angān andu ati, buang ndai anŭ adi Ayŭh raan.