DITRONOMI 12 - Hakcipta - Biatah Bidayuh

Tarun adi Ndi adŭ Yŭn Bisambah

¹ “Ati inŭh ukum ukum-adat adi angān dŭh siŭn dŭh tunda sitŭkŭd angān udip di tarun tana adi TUHAN, Tapa tayung-babuk ngan, nggen di angān. Dingah nŭh Ayŭh!

² Di tarun tana adi angān tambit, pirabur sopŭrŭg tarun adi yŭn daya nyambah tapa ngara di darŭd adi bigatung, tunduh sandah sandah, ka di ribo tŭngŭn tŭngŭn kayuh.

³ Nyirubuh mija mija-sambah ngara ka pirandŭk dudu uros uros-batuh pirapu' ngara. Badang tandā tandā pinatŭng tapa Asherah ngara, ka tabŭng tibudo tibudo ngara, isa sopŭrŭg-i dŭh tia dog nyambah di tarun tarun anŭ.

⁴ “Dŭhnyah nyambah TUHAN adi Tapa ngan mun gaya ngara anŭ nyambah tapa tapa ngara.

⁵ So abong tarun tana sopŭrŭg tibaran-asar ngan TUHAN re mien tarun yŭn anŭ adi ndi adŭ adi yŭn bara daya siŭn di ka sirung jawin-I ka nyambah Ayŭh.

⁶ Diginŭ angān siŭn jugan dudu sadis ngan adi an dog badang ngga sadis ngan adi bŭkŭn, pinganggen ndi utung-so-simŭng ngga pinganggen ngan adi bŭkŭn, pinganggen adi angān bijanji an jugan ka TUHAN, sadis adi dog jugan so pinyiraan atin adŭp, ka anak bungas sapi ngga anak bungas biri ngan.

⁷ Diginŭ, di sirung jawin TUHAN adi Tapa ngan, adi mbŭh nyiberkat angān, angān ngga rawang rawang ngan re man ka angan kayuh kana adi angān dapŭd so kraja ngan.

⁸ “Kan tipuh anŭ mbŭh mandŭg, angān dŭh siŭn ndai nimun adi mbŭh ngan ndai tian ti. Ndŭg madin angān mbŭh bisambah nanyam adi raan ngan,

⁹ sabab angān gibayuh mŭrŭt tarun tana anŭ adi TUHAN adi Tapa ngan nggen di angān, adi yŭn angān bisa udip bamai.

¹⁰ Kan angān mutas Yang Jordan, TUHAN re bada angān ngisi ka rŭŭ di tarun tana anŭ, Ayŭh re bada sopŭrŭg ngan siramat so sopŭrŭg pinganyu ngan, ka angān re udip bamai.

¹¹ TUHAN re mien ndi adŭ tarun adi yŭn adŭp-I re dog nyambah, ka diginŭ angān dŭh siŭn dŭh taban ka yŭn-I sopŭrŭg kayuh adi aku mbŭh pesan di angān: sadis ngan adi re dog badang ngga sadis ngan adi bŭkŭn, pinganggen ndi utung-so-simŭng ngan ngga pinganggen ngan adi bŭkŭn, ka pinganggen adi grua adi angān mbŭh bijanji an jugan ka TUHAN.

¹² Gaŭn meh diginŭ di sirung jawin-I, samah ngga bara anak ngan, daya-gaji ngan, ngga bara daya Levi adi rŭŭ di kupo kupo ngan; ingat nŭh bara daya Levi dŭh re biyŭn tana adi tah tung adŭp ngara.

¹³ Angān dŭh siŭn jugan sadis ngan di tadŭ tadŭ yŭn angān raan.

¹⁴ Angān dŭh siŭn dŭh jugan sadis adŭ-i di ndi yŭn anŭ adi TUHAN re mien di tarun tana so ndi tibaran-asar ngan. Diginŭ adŭ angān siŭn jugan sadis sadis ngan adi patut dog badang, ka ndai sopŭrŭg kayuh adi bŭkŭn adi aku muko pesan di angān.

¹⁵ “Pak angān siŭn siŭ ka man dāng dāng ngan di tadŭ tadŭ yŭn ngan rŭŭ. Angān siŭn man sikiang adi TUHAN nggen di angān. Sopŭrŭg ngan, bait bisig puan kah kais nanyam ka adat, siŭn man-i, nimun angān man dagin peyu bait jerak.

¹⁶ Pak angān dŭh siŭn man deya-i; angān dŭh siŭn dŭh basen-i di tana keya ka basen piin.

¹⁷ Mating kayuh adi jugan ngan ka TUHAN siŭn dog man di tarun adi yŭn ngan rŭŭ: pinganggen ndi utung-so-simŭng so gandom ngan dŭh gŭh, wain, puan kah inyo kanā ngan dŭh gŭh, puan kah anak bungas sapi ngga biri ngan, pinganggen adi angān muko bijanji an jugan ka TUHAN, sadis adi dog jugan so pinyiraan atin adŭp, puan kah tadŭ tadŭ pinganggen adi bŭkŭn.

¹⁸ Angān ngga bara anak ngan, samah ngga bara daya-gaji ngan ngga bara daya Levi adi rŭŭ di kupo kupo ngan, siŭn man dudu sadis anŭ adŭ-i di sirung jawin TUHAN adi Tapa ngan di tarun yŭn anŭ adi ndi adŭ yŭn bisambah adi dog mien adŭp TUHAN adi Tapa ngan. Ka angān patut gaŭn diginŭ amai sopŭrŭg kayuh adi angān muko ndai.

¹⁹ Nakit ingat gŭh, dŭhnyah dŭh mbit piduri di bara daya Levi sitŭkŭd angān udip di tarun tana ngan.

²⁰ “Kan TUHAN adi Tapa ngan pikambang tarun tana ngan, nimun adi Ayŭh mbŭh janji, angān siŭn man dagin di tadŭ nga angān raan.

²¹ Kambŭi tarun yŭn anŭ adi ndi adŭ yŭn bisambah mbŭh raru jo, angān bisa di tadŭ nga angān raan, siŭ tadŭ tadŭ sapi puan kah biri adi TUHAN muko nggen di angān, ka siŭn man dagin anŭ di arŭn ngan, nimun adi aku muko kidaan di angān.

²² Tadŭ tadŭ angān, adi bisig puan kah kais nanyam ka adat, siŭn man dagin anŭ, nimun ayŭh man dagin peyu puan kah dagin jerak.

²³ Adŭ angān dŭhnyah man dagin adi gibabŭ agi deya dieh, amai asŭng agi darŭm deya, ka angān dŭh siŭn man asŭng ngga dagin anŭ.

²⁴ Dŭhnyah deya jadi pinguman ngan; angān patut basen-i di tana keya ka basen piin.

²⁵ Kambŭi angān tunda pesan anŭ, TUHAN re munos asŭng-I, ka angān ngga bara sesang ngan re sanang.

²⁶ Taban ka tarun yŭn anŭ adi ndi adŭ yŭn bisambah dudu sadis ngan ngga dudu pinganggen adi angān muko janji yŭn TUHAN.

²⁷ Jugan diginŭ dudu sadis adi re kubo dog badang di mija-sambah TUHAN. Jugan gŭh dudu sadis anŭ adi re ngan man dagin-i ka deya-i ren di tunduh mija-sambah.

²⁸ Tunda ngga atin tŭtŭd sopŭrŭg adi aku muko pesan di angān, ka angān ngga bara sesang ngan re adu adu sanang, sabab angān ndai kayuh adi batur ka adi pimunos asŭng TUHAN adi Tapa ngan.

Pinyibakan Pasar Nyambah Tibudo

²⁹ “TUHAN adi Tapa ngan re pirabur sinadan bangsa adi angān nyerang tana-i, ka angān re ngisi-i ka rŭŭ dieh.

³⁰ Ripas TUHAN pirabur bangsa bangsa anŭ, ingat dŭhnyah sikari kari angān tunda kraja pingandai adat ngara, sabab anŭ re pirabur angān. Dŭhnyah suba an puan gaya ngara nyambah tapa tapa ngara, amai ramŭn raan tunda gaya ngara.

³¹ Dŭhnyah nyambah TUHAN adi Tapa ngan mun gaya ngara nyambah tapa ngara; amai darŭm ngara nyambah tapa ngara, ngara ndai sopŭrŭg kayuh adi sipŭ adi TUHAN tiru. Ngara nyadis gŭh anak anak ngara di apui di tunduh mija-sambah ngara.

³² “Ndai sopŭrŭg kayuh adi aku muko pesan di angān. Dŭhnyah nambah tadŭ tadŭ kayuh, puan kah kadi tadŭ tadŭ kayuh so pesan anŭ.