DITRONOMI 10 - Hakcipta - Biatah Bidayuh

Moses Trima Dinge Simŭng Pinyipesan Anŭ

¹ “Komŭnŭ TUHAN nang di aku, ‘Ndai duwŭh kiping batuh bada mun anŭ adi sibungas-i, ka ndai gŭh pati so kayuh yŭn nyikŭn-i. Maad ka yŭn Ku di sambu darŭd,

² ka Aku re nuris di duwŭh kiping batuh anŭ kayuh adi Aku muko nuris di kiping kiping anŭ adi kuu ko mape, ka komŭnŭ kuu siŭn nyikŭn-i di darŭm pati anŭ.’

³ “Jadi aku ndai ndi pati so kayuh acacia, ka ndai duwŭh kiping batuh mun anŭ adi sibungas-i ka taban-i ngga maad darŭd.

⁴ Komŭnŭ TUHAN nuris di kiping kiping batuh anŭ piminyu pinganang brisak ngga anŭ adi sibungas-I nuris, anŭ inŭh Simŭng Pinyipesan adi-I mbŭh nggen di angān di tika Ayŭh minyu so jireb apui di andu angān tikuruk di sigŭn darŭd. TUHAN nggen kiping kiping batuh anŭ di aku,

⁵ ka aku rasu mūn so darŭd. Jadi nanyam adi TUHAN muko pesan, aku na kiping kiping batuh anŭ di darŭm pati adi aku muko ndai, ka-i mbŭh diginŭ so andu anŭ ndŭg andu ati.” (

⁶ Bara daya Israel makat panu so dudu prigi adi dog dapu daya Jaakan, ka panu ka Moserah. Diginŭ Aaron kabŭs ka dog kubur, ka anak dari-i Eleazar gati ayŭh jadi imam.

⁷ So nŭ ngara makat di ka Gudgodah, komŭnŭ di ka Jotbathah tarun adi yŭn bagŭ piin.

⁸ Di darŭd anŭ TUHAN tijuan bara dari so tibaran-asar Levi bada dapu tanggong jaga Pati Simanya ka ndai kraja bara imam yŭn-I ka nggen berkat darŭm adŭn-I. Ka anŭ taŭn gibabŭ kraja ngara.

⁹ Anŭ sabab-i tibaran-asar Levi dŭh sua dapŭd utung tana mun tibaran tibaran-asar adi bŭkŭn; kayuh adi ngara mbŭh trima inŭh hak jadi bara imam TUHAN, nanyam ka adi TUHAN adi Tapa ngan mbŭh janji.)

¹⁰ “Aku rŭŭ di darŭd pat puru andu ngga pat puru ngarŭm, nimun adi sibungas-i. TUHAN dingah dinge pimite ku, ka situju dŭh re pirabur angān.

¹¹ Komŭnŭ Ayŭh bada aku matak ka nguru angān, isa angān dapŭd tambit tarun tana adi muko-I janji di tayung-babuk ngan.”

Pimite Tapa

¹² “Madin, angān daya Israel, dingah nŭh kayuh adi TUHAN adi Tapa ngan mite so angān: Nyambah TUHAN ka ndai sopŭrŭg anŭ adi-I pesan. Rindu Ayŭh, bituan di Ayŭh ngga siabo atin ngan,

¹³ ka tunda sopŭrŭg ukum adat-I. Aku nggen-i di angān andu ati yŭn utung di adŭp ngan.

¹⁴ Rangit adi siabo bigatung TUHAN gŭh dapu. Ong ati tung jangi gŭh ngga sopŭrŭg kayuh adi agi dieh.

¹⁵ Pak pinyirindu TUHAN di tayung-babuk ngan taŭn raru tagap ndŭg ka Ayŭh mien dŭh daya bŭkŭn pak angān bada jadi daya-I, ka angān taŭn babŭ daya adi-I mbŭh mien.

¹⁶ Ngapŭi meh, so madin tunda pinganang TUHAN, ka dŭh tia baking.

¹⁷ TUHAN adi Tapa ngan inŭh bikuasa di tunduh sopŭrŭg tapa ka di tunduh sopŭrŭg kuasa. Ayŭh inŭh bās ka bikuasa, ka Ayŭh inŭh adi patut ata dingah. Ayŭh dŭh marad di pingatur-I, ka Ayŭh dŭh trima suap.

¹⁸ Ayŭh raan natu bara anak tumang ngga bara dayung uban dog nimbang ngga nakit; Ayŭh rindu bara daya pinami adi rŭŭ bigaur ngga bangsa ta, ka nggen di ngara pinguman ngga pimakai.

¹⁹ Ngapŭi meh, kiren pinyirindu di bara daya pinami, sabab adŭp ngan jah ko gŭh jadi daya pinami di Egypt.

²⁰ Stabi di TUHAN adi Tapa ngan, ka nyambah Ayŭh sadi adŭ. Tŭtŭd di Ayŭh ka ndai janji ngan darŭm adŭn-I sadi adŭ.

²¹ Muji Ayŭh — Ayŭh inŭh Tapa ngan, ka angān mbŭh kiris ngga batuh adŭp ngan kayuh kayuh bās ngga kayuh kayuh saruh adi mbŭh-I ndai yŭn ngan.

²² Di andu Tayung-babuk ngan di ka Egypt, ngara agi ju puru naan adŭ. Pak madin TUHAN adi Tapa ngan mbŭh bada angān jadi raru bagŭ mun bitang bitang di rangit.