DANIEL 8 - Hakcipta - Biatah Bidayuh

Ndi Dari Biri ngga Ndi Kambing dog Kiris Daniel Keya ka di darŭm Pŭmŭh

¹ Di sawa adi taruh darŭm pinyipritah Belshazzar, aku kiris dinge kayuh keya ka darŭm pŭmŭh.

² Di darŭm kayuh anŭ adi keya ka darŭm pŭmŭh aku rada adŭp ku darŭm kupo Susa adi bikuta di darŭm utung rais Elam. Aku mijog di bŭngŭn Yang Ulai,

³ ka diginŭ di bŭngŭn sungi aku kiris ndi dari biri adi biyŭn duwŭh tanduk, ndi so tanduk anŭ ambu buang bauh so adi bŭkŭn.

⁴ Aku kiris dari biri anŭ nanduk ka barat, ka utara, ka siratan. Mating dāng adi dapŭd pirŭŭ ayŭh bait bu so kuasa-i. Ayŭh ndai nanyam ka pinyiraan adŭp-i ka ayŭh mbŭh jadi gambung.

⁵ Sitadŭn aku bipikir ani rati kayuh anŭ, ndi kambing bikaduh ruah so parad ka barat, ruai raju ndŭg ka kaja-i mbŭh tipuang so tana. Ayŭh biyŭn ndi tanduk adi rasing di asah batuh-i.

⁶ Ayŭh bikaduh tudu dari biri anŭ, adi aku ko kiris mijog di bŭngŭn sungi, ka nyerang ayŭh ngga siabo pinyibake-i.

⁷ Aku tingga ayŭh nyerang dari biri anŭ. Ayŭh mbŭh raru baji ndŭg ka miradak ayŭh ka mata duwŭh tanduk-i. Dari biri anŭ dŭh biyŭn pinyibake ngga rawan. Ayŭh tiparak ka tana ka dog digang, ka mating daya tungang nyiramat ayŭh.

⁸ Kambing anŭ mbŭh jadi makin gambung, pak di pinyigatung bake-i tanduk-i pata. Komŭnŭ pat tanduk adi bŭkŭn adi rasing ruah, ka tiju barang pat parad rangit.

⁹ So ndi tanduk anŭ ruah ndi tanduk adi siit, adi biyŭn kuasa adi ngukap ka siratan ngga timor nuju Tarun Tana adi dog Janji.

¹⁰ Ayŭh mbŭh jadi makin sukup bake ngga nyerang bara tibaran soldadu shorga, adi adŭp dudu bitang, ka-i taran kudu kudu bitang anŭ ka tana ka bidigang dieh.

¹¹ Anŭ mbŭh natang Pingubak-bās bara soldadu shorga, pirŭŭ sadis adi dog jugan ka Ayŭh barang andu, ka nyembar Ramin TUHAN.

¹² Daya mbŭh bidosa diginŭ, ka mbŭh dŭh jugan sadis adi dog jugan barang andu, ka adat adi sawŭ mbŭh dog taran ka tana. Tanduk anŭ mujur di barang masam kayuh adi ndai-i.

¹³ Komŭnŭ aku dingah ndi malaikat siken malaikat adi bŭkŭn, “Sinde kayuh anŭ adi dog kiris keya ka darŭm pŭmŭh re ko mun anŭ? Sinde dosa adi sipŭ re ko gati sadis barang andu? Sinde bara tibaran soldadu shorga ngga Ramin TUHAN re ko dog digang?”

¹⁴ Aku dingah malaikat adi bŭkŭn nam, “Ayŭh re babŭ ndŭg 2,300 singumi andu ngga isan isan, ka di tipuh anŭ sadis dŭh re dog jugan. Muko anŭ ka Ramin TUHAN re pari dog pijog mun amba-i.”

Malaikat Gabriel kidaan Rati-I

¹⁵ Aku suba jiroh rati kayuh adi dog kiris keya ka darŭm pŭmŭh anŭ, kan gŭgŭh agi daya mijog di sirung jawin ku.

¹⁶ Aku dingah sirŭŭn bagan so Yang Ulai, “Gabriel, kidaan di ayŭh rati kayuh adi-i mbŭh kiris.”

¹⁷ Gabriel mandŭg ka mijog sindŭk aku, ka aku mbŭh raru taru ndŭg ka tumbang ka tana. Ayŭh nang di aku, “O manusia adi bisa kabŭs, mirati meh kayuh adi kuu kiris anŭ. Kayuh adi dog kiris anŭ inŭh pasar pimungan ong.”

¹⁸ Darŭm aku minyu, aku tumbang ka tana dŭh rada tarun. Pak ayŭh tama aku, ka turung aku mijog,

¹⁹ ka nang, “Aku kiren di kuu kayuh adi jadi kan Tapa baji. Kayuh adi dog kiris anŭ inŭh pasar pimungan ong.

²⁰ “Dari biri adi kuu kiris adi biyŭn duwŭh tanduk rati-i pritah Media ngga Persia.

²¹ Kambing anŭ rati-i pritah Greece, ka tanduk adi rasing anŭ di asah batŭh inŭh raja adi sibungas-i.

²² Pat tanduk adi ruah kan sibungas tanduk anŭ pata, rati-i pat pritah adi timbur so ndi pritah adi pape ka adi re dŭh bake mun pritah adi sibungas-i anŭ.

²³ “Kan pimungan pritah pritah anŭ mbŭh sindŭk buang ngara mbŭh raru ginaka yŭn patut dog ukum, re agi raja adi baking, gaok, ka adi pinipu.

²⁴ Ayŭh re jadi bake, pak dŭh so kuasa adŭp-i. Ayŭh re taban pinyirusag adi sipŭ ka re mujur di barang masam kayuh adi ndai-i. Ayŭh re taban pinyirusag di daya adi bikuasa ngga di bara daya Tapa.

²⁵ Sabab ayŭh pinipu, ayŭh re mujur di kraja tipu-i. Ayŭh re mingangŭn di adŭp-i ka bŭn diŭ kidaan di daya kan-i re pirabur daya. Ayŭh re natang gŭh Raja adi siabo bās, pak ayŭh re dog pirabur dŭh ngga kuasa manusia.

²⁶ Kayuh anŭ adi dog kiris keya ka darŭm pŭmŭh pasar sadis singumi andu ngga sadis isan isan adi muko dog kidaan rati-i di kuu re jadi bitŭtŭk. Pak dŭh diŭ bada daya puan, sabab gi-dŭm tui ngga kayuh anŭ re jadi bitŭtŭk.”

²⁷ Aku mbŭh rarah buang sungoh kudu kudu andu anŭ. Komŭnŭ aku makat ka pari ka kraja adi raja ko nggen di aku, pak aku mbŭh inga inga bada kayuh anŭ adi aku kiris keya ka darŭm pŭmŭh ka aku dŭh mirati-i.