DANIEL 5 - Hakcipta - Biatah Bidayuh

Belshazzar Ndai Gawai

¹ Raja Belshazzar bagan siribu naan bara pingibās-i ka gawai bās, ka ayŭh nok wain ngga ngara.

² Darŭm ngara birunok, Belshazzar nggen ukum bada saker mas ngga saker pirak dog taban mŭrŭt, adi sama-i Nebuchadnezzar muko taban ngga bu so Ramin TUHAN di Jerusalem. Raja mite sopŭrŭg-i dog taban mŭrŭt isa ayŭh, bara pingibās-i, bara sawŭn-i, ka bara dayung nyikŭn-i bisa nok so dieh.

³ Jam anŭ gŭh saker mas ngga makuk mas dog taban mŭrŭt, ka ngara sopŭrŭg nok so dieh,

⁴ ka muji tapa adi dog ndai so mas, so pirak, so timaga, so basi, so kayuh, ka so batuh.

⁵ Ka gŭgŭh agi tangan tatŭng ka piguru nuris di samen sindung istana, di yŭn jawa so prita daras dŭ nyekar. Ka raja kiris tangan anŭ nuris.

⁶ Jawin raja marui pusat buang taru ndŭg ka karŭb-i kimŭtŭr.

⁷ Ayŭh nyirais bada urun-i taban ngga mŭrŭt bara pinanung, bara dukun, ka bara adi puan pasar bitang. Kan ngara mbŭh mŭrŭt, raja nang di ngara, “Asi asi adi tungang basa turis anŭ ka kidaan rati-i re dog bada nēn jipo-ambu raja adi bēng, pakai kukong mas di tungo-i, ka re dog bada jadi pinguasa adi numbor taruh darŭm pritah.”

⁸ Bara adi tukang pitayan raja di ka jawin, pak mating so ngara dapŭd basa turis anŭ bait kidaan rati-i.

⁹ Darŭm susah jawin Raja Belshazzar bitambah pusat, ka bara pingibās-i mbŭh dŭh puan ani re ngara ndai.

¹⁰ Sindŭ raja dingah dudu adi dog ndai raja ngga bara pingibās-i, mŭrŭt birit bās gawai. Ayŭh nang, “Tabi Tuan Raja! Dŭhnyah bada adŭp nŭh susah ndŭg ka jawin pusat.

¹¹ Agi daya darŭm pritah mu adi agi roh bara tapa adi kudus di adŭp-i. Di jaman sama mu jadi raja, daya anŭ dog dapŭd biyŭn pinyipitar, pinyipuan, ka pinyibijak mun pinyibijak bara tapa. Ka Raja Nebuchadnezzar, sama mu, bada ayŭh jadi pingubak bara daya adi tukang kidaan nasip, bara pinanung, bara dukun, ka bara adi puan pasar bitang.

¹² Ayŭh biyŭn pimandai adi saruh, bijak ka pandai kidaan rati pŭmŭh, pandai nam atau, ka pandai kidaan rati rusia. Dŭn daya anŭ Daniel, pak raja kadŭn ayŭh Belteshazzar. Bagan ayŭh. Ayŭh dapŭd kidaan di kuu rati sopŭrŭg kayuh anŭ.”

¹³ Daniel rasu dog taban mŭrŭt bada bidapŭd ngga raja, ka raja nang di ayŭh, “Kuu kah Daniel anŭ, daya Jahudi adi dog taran, adi sama ku adi raja taban kamati so Judah?

¹⁴ Aku agi dingah roh bara tapa adi kudus agi di kuu, ka kuu pandai ka biyŭn pinyipuan ngga pinyibijak.

¹⁵ Bara adi tukang pitayan ngga bara pinanung agi dog taban mŭrŭt bada basa turis anŭ ka kidaan rati-i di aku, pak ngara dŭh tungang dapŭd rati-i.

¹⁶ Aku dingah kuu pandai kidaan rati kayuh adi bisukan ka pandai kidaan rati rusia. Kambŭi kuu tungang basa turis anŭ ka kidaan rati-i di aku, kuu re dog nggen jipo-ambu adi bēng, pakai kukong mas di tungo mu, ka jadi pinguasa adi numbor taruh darŭm pritah.”

¹⁷ Daniel nam, “Nyikŭn adŭ pinganggen anŭ bait nggen-i di daya bŭkŭn. Aku re basa yŭn Tuan Raja kayuh adi dog nuris anŭ ka kidaan rati-i di kaam.

¹⁸ “Tapa adi Siabo Bigatung bada sama mai Nebuchadnezzar jadi raja adi bās ka nggen di ayŭh stabi ngga kuasa.

¹⁹ Ayŭh raru bās ndŭg ka daya so barang bangsa, kaum, ka piminyu taru di ayŭh ndŭg ka kimŭtŭr. Kambŭi ayŭh raan siŭ daya, ayŭh sawŭ siŭ; kambŭi ayŭh raan tandah daya udip, ayŭh sawŭ tandah. Ayŭh paad pangkat daya ngga bisor pangkat daya nanyam pinyiraan adŭp-i.

²⁰ Pak sabab ayŭh jadi sambuh, baking, ka gaok, ayŭh dog kadi so takta-i, ka dog kadi so bragah-i.

²¹ Ayŭh dog pibu so dupan bara manusia, ka pikir kira-i jadi mun tung dāng. Ayŭh udip bigaur ngga kaldi tarun, man kupai mun sapi, ka bŭŭs di sapa tarun ngga dŭh biyŭn ani ani ngga nutu adŭp-i so sipot-abun. Sikasŭn-i ayŭh ngaku Tapa adi Siabo Bigatung biyŭn kuasa di tunduh sopŭrŭg pritah manusia ka biyŭn kuasa nggen-i di tadŭ daya adi-I mien.

²² “Pak kaam, anak-i, dŭh pirapat adŭp mai, sunggu kaam puan sopŭrŭg kayuh anŭ.

²³ Kaam mbŭh rawan TUHAN adi pinguasa di rangit. Kaam mbŭh pakai saker ngga makuk adi dog taban so Ramin TUHAN. Kaam, bara pingibās mai, bara sawŭn ami, ka bara dayung nyikŭn mai nok wain so dieh ka muji tapa adi dog ndai so mas, so pirak, so timaga, so basi, so kayuh, ka so batuh — bara tapa adi dŭh kiris tarun, dŭh dingah kayuh, dŭh puan ani ani. Pak kaam dŭh stabi di Tapa adi bada kaam udip bait kabŭs ka adi nguasa sopŭrŭg kayuh adi kaam ndai.

²⁴ Anŭ inŭh sabab Tapa pait tangan bada nuris pinganang ati.

²⁵ “Ati inŭh kayuh adi dog nuris: ‘Niap, Niap, Nimbang, Pape.’

²⁶ Ka ati inŭh rati-i: Niap, Tapa mbŭh niap andu pritah mai ka mbŭh bada-i mungan;

²⁷ Nimbang, kaam mbŭh dog nimbang ngga timbang ka dog dapŭd nang paŭh jangan;

²⁸ Pape, pritah mai re pape nyinuwŭh ka dog nggen di daya Media ngga daya Persia.”

²⁹ Nganŭ gŭh Belshazzar mritah bara urun-i bada kasŭk jipo-ambu raja adi bēng ka na kukong mas di tungo-i. Ka ayŭh bada ayŭh jadi pinguasa adi numbor taruh darŭm pritah.

³⁰ Ngarŭm anŭ Belshazzar, raja Babylonia, dog siŭ;

³¹ ka Darius daya Media, adi nganŭ mbŭh 62 sawa umbur-i, sirapas kuasa-raja.