DANIEL 3 - Hakcipta - Biatah Bidayuh

Nebuchadnezzar Nggen Ukum bada Barang Naan Daya Nyambah Patong Mas

¹ Raja Nebuchadnezzar bada ndi patong dog ndai so mas, 27 mita bigatung-i ka sindŭk 3 mita buka-i, ka ayŭh bada-i dog pijog di rabak Dura di utung tarun tana rais Babylon.

² Komŭnŭ raja nggen ukum bada sopŭrŭg pinurung-i mandŭg tikuruk — bara raja, bara gabenor, bara pinurung gabenor, bara nyamba utung utung rais, bara adi tukang digŭng duit, bara akim, bara majistret, ka sopŭrŭg pinurung adi bŭkŭn so utung utung rais. Ngara dŭh siŭn dŭh sua tikuruk di gawai ngga piguru adat nyambah patong anŭ adi Raja Nebuchadnezzar muko pijog.

³ Kan sopŭrŭg ngara mbŭh tikuruk di gawai ngga piguru adat nyambah patong anŭ ka mijog nura patong anŭ,

⁴ ndi naan daya adi mbŭh dog tijuan minyu ngga sirŭŭn bana, “Bara daya so barang bangsa, kaum, ngga piminyu!

⁵ Angān re dingah jawŭn trompet, dog tunda jawŭn ragu dog mambak ngga tanduk, gambus, zithers, ka kachapi; ka komŭnŭ sopŭrŭg pingakas musik adi bŭkŭn dog mambak gŭh. Kan musik piguru, angān an mutu ubak ngan ka nyambah patong mas adi Raja Nebuchadnezzar mbŭh pijog.

⁶ Asi asi adi dŭh mutu ubak-i ka nyambah patong anŭ re rasu dog taran ka darŭm buwang apui adi bijagu apui dieh.”

⁷ Sawŭ meh, kan ngara dingah jawŭn so pingakas pingakas musik anŭ, bara daya so barang bangsa, kaum, ngga piminyu mutu ubak ngara ka nyambah patong mas anŭ adi Raja Nebuchadnezzar mbŭh pijog.

Jerā Daniel adi Taruh Naan dog Nyarah Amai Nyibireu Pinganang

⁸ Nganŭ meh kada daya Babylonia tambit pluang ngga kinarap daya Jahudi.

⁹ Ngara nang di Raja Nebuchadnezzar, “Tabi Tuan Raja!

¹⁰ Tuan Raja mbŭh nggen ukum nang kan musik mbŭh piguru, barang naan daya an mutu ubak ka nyambah patong mas anŭ,

¹¹ ka asi asi adi dŭh mutu ubak-i nyambah an dog taran ka darŭm buwang apui adi bijagu apui dieh.

¹² Daya daya Jahudi adi kaam mbŭh tijuan bada tukang nguasa utung tarun tana rais Babylon — Shadrach, Meshach, ngga Abednego — adi nyibireu pinganang Tuan Raja. Ngara dŭh nyambah tapa mai bait mutu ubak ngara ka patong adi kaam mbŭh pijog.”

¹³ Dingah sakanŭ, raja rasu baji ka mritah bada ngara dog taban ka yŭn adŭp-i.

¹⁴ Ayŭh nang di ngara, “Shadrach, Meshach, ka Abednego, sawŭ kah angān abah nyambah tapa ku bait mutu ubak ngan ka patong adi aku mbŭh pijog?

¹⁵ Madin, kan angān dingah jawŭn trompet, tanduk, gambus, zithers, kachapi, ngga sopŭrŭg pingakas musik adi bŭkŭn, mutu ubak ngan ka nyambah patong anŭ. Kambŭi angān dŭh, angān re rasu dog taran ka darŭm buwang apui adi bijagu apui dieh. Angān pikir agi tapa adi re tungang nyiramat angān kah?”

¹⁶ Shadrach, Meshach, ngga Abednego nam, “Tuan Raja, kieh dŭh re suba nyibandar adŭp ami.

¹⁷ Kambŭi Tapa adi yŭn ami bituan dapŭd nyiramat kieh so buwang apui adi bijagu apui dieh ka so kuasa mai, Ayŭh dŭh re dŭh nyiramat kieh.

¹⁸ Pak kambŭi-I dŭh nyiramat bait kani, Tuan Raja re puan kieh ngaŭn dŭh re nyambah tapa mai, ka kieh dŭh re mutu ubak ami ka patong mas anŭ adi kaam mbŭh pijog.”

Jerā Daniel adi Taruh Naan dog Nggen Ukum Kabŭs

¹⁹ Komŭnŭ Nebuchadnezzar mbŭh raru baji, ka jawin-i marui bireh baji di Shadrach, Meshach, ngga Abednego. Jadi ayŭh nggen ukum bada marak apui anŭ ju kari rabis paras so adi mbŭh.

²⁰ Ka ayŭh mritah daya daya adi siabo bake so bara tibaran soldadu-i bada mŭŭng ngara adi taruh naan anŭ ka taran ngara ka darŭm buwang apui.

²¹ Jadi ngara mŭŭng ngara, babŭ nēn piraka — jipo, piraka ambu, tupi, ngga sopŭrŭg-i — ka taran ngara ka darŭm buwang apui adi bijagu apui dieh.

²² Ka sabab raja mbŭh nggen ukum bada buwang apui anŭ ruai paras, apui badang bara soldadu adi tukang taban ngara ka buwang apui anŭ.

²³ Komŭnŭ Shadrach, Meshach, ngga Abednego, gibabŭ dog mŭŭng, rabu ka darŭm yun apui adi bijagu anŭ.

²⁴ Nebuchadnezzar nyirŭgŭh mijog darŭm inga inga. Ayŭh siken bara pinurung-i, “Dŭh kah ata mŭŭng ngara adi taruh naan anŭ ka taran ngara ka darŭm buwang apui adi bijagu anŭ?” Ngara nam, “Sawŭ, mŭŭng ta, Tuan Raja.”

²⁵ “Ka mani ata kiris pat naan daya bijaruh di darŭm apui anŭ?” ayŭh siken. “Ngara dŭh dog mŭŭng, ka ngara dŭh gŭh kinaman — ka ndi naan so ngara adi pat anŭ mun malaikat.”

Taruh Naan Ngara Dog Pirupas ka Dog Paad Pangkat

²⁶ Jadi Nebuchadnezzar di ka tiban buwang apui adi bijagu apui dieh ka bagan, “Shadrach! Meshach! Abednego! Urun Tapa adi Siabo Bigatung! Ruah!” Ka ngara rasu ruah.

²⁷ Sopŭrŭg raja, bara gabenor, bara pinurung gabenor, ngga bara pinurung adi bŭkŭn tikuruk tingga ngara taruh, adi dŭh kinaman dog apui. Ubok ngara dŭh sau, piraka ngara dŭh sau, ka mating dagŭn asuh di ngara.

²⁸ Raja nang, “Puji ka Tapa Shadrach, Meshach, ka Abednego! Ayŭh mbŭh pait malaikat-I ka mbŭh nyiramat ngara ati adi bituan ka sabah di adŭp-I. Ngara nyibireu pinganang ku ka dŭm tadŭ re ruban asŭng dŭh an mutu ubak ngara nyambah tadŭ tadŭ tapa adŭ-i Tapa adŭp ngara.

²⁹ “Ka madin aku mritah asi asi so tadŭ tadŭ bangsa, kaum, bait piminyu adi minyu rawan Tapa Shadrach, Meshach, ka Abednego, daya anŭ an dog matŭd kaja tangan-i, ka ramin-i an dog nyirubuh bada jadi tugung rakang tibawang. Mating tapa bŭkŭn adi tungang nyiramat mun ati.”

³⁰ Ka raja meh paad Shadrach, Meshach, ngga Abednego ka pangkat adi bās di utung tarun tana rais di Babylon.