DANIEL 2 - Hakcipta - Biatah Bidayuh

Pŭmŭh Nebuchadnezzar

¹ Di sawa adi duwŭh darŭm pinyipritah-i, Nebuchadnezzar agi nyipŭmŭh. Pŭmŭh anŭ bada ayŭh raru susah ndŭg ka dŭh tungang bŭŭs.

² Jadi ayŭh bagan bara daya-i adi pandai kidaan nasip, bara pinanung, bara nyamba-biruri, ka bara dukun bada mandŭg ka kidaan di ayŭh rati pŭmŭh-i anŭ. Kan ngara mandŭg ka mijog di sirung jawin raja,

³ ayŭh nang di ngara, “Aku agi nyipŭmŭh ka aku mbŭh raru susah bada-i. Aku raan puan ani rati-i.”

⁴ Ngara nam raja darŭm piminyu daya Aram, “Tabi Tuan Raja! Kidaan di kieh pŭmŭh mai, ka kieh re kidaan rati-i di kaam.”

⁵ Raja nang di ngara, “Aku mbŭh ndai pikir ku. Angān dŭh siŭn dŭh kidaan ani pŭmŭh anŭ samŭn rati-i di aku. Kambŭi angān dŭh tungang, aku re kapŭg kaja tangan ngan ka nyirubuh ramin ngan bada jadi tugung rakang tibawang.

⁶ Pak kambŭi angān tungang kidaan ani pŭmŭh anŭ samŭn rati-i, aku re ngupah angān ngga pinganggen ka ngga dŭn bās adi dog stabi. Madin, kidaan di aku ani pŭmŭh anŭ ka ani rati-i.”

⁷ Ngara nam raja dinge, “Kambŭi Tuan Raja an kidaan ani pŭmŭh anŭ, ka kieh bisa kidaan rati-i.”

⁸ Raja rasu nam, “Taŭn aku mbŭh puan! Angān taŭn raan tambit bagŭ masā, sabab angān puan aku mbŭh ndai pikir ku

⁹ re ngukum angān ngga ndi masam ukum yŭn sopŭrŭg ngan kambŭi angān dŭh kidaan di aku pŭmŭh anŭ. Angān mbŭh bipekat dupan adŭp ngan an kadong aku amai angān harap aku re nukar pikir ku. Kidaan di aku ani pŭmŭh anŭ, ka aku re puan nang angān dapŭd gŭh kidaan rati-i.”

¹⁰ Bara adi tukang pitayan nam, “Mating daya di ong adi re bisa kidaan di Tuan Raja kayuh adi kaam raan puan. Mating raja, bait-i adi siabo bās ngga adi siabo bikuasa, mbŭh mite sakanŭ di bara daya-i adi tukang kidaan nasip, di bara pinanung-i, ka di bara dukun-i.

¹¹ Pimite Tuan Raja inŭh kayuh adi raru mbar, ka mating daya tungang ndai-i, adŭ-i bara tapa, pak bara tapa dŭh gŭh udip bigaur ngga manusia.”

¹² Dingah sakanŭ, raja rasu baji ka mritah bada sopŭrŭg ngara adi tukang pitayan raja di Babylon dog nggen ukum kabŭs.

¹³ Jadi ukum anŭ rasu dog kidaan di daya bagŭ, nang sopŭrŭg ngara re dog siŭ, samŭn Daniel ngga bara jerā-i.

Tapa Kidaan di Daniel Rati Pŭmŭh Anŭ

¹⁴ Komŭnŭ Daniel di ka Arioch, pingubak bara pingibān raja, adi mbŭh dog tijuan bada siŭ ngara. Ngga nakit,

¹⁵ ayŭh minyu siken di Arioch mani raja mbŭh nggen ukum adi bisā mun anŭ. Jadi Arioch kidaan di Daniel kayuh adi mbŭh jadi.

¹⁶ Daniel rasu di ka mite raja nggen di ayŭh bagŭ masā, isa ayŭh dapŭd kidaan di ayŭh rati pŭmŭh anŭ.

¹⁷ Komŭnŭ Daniel maad ka kidaan di jerā-i Hananiah, Mishael, ka Azariah kayuh adi mbŭh jadi.

¹⁸ Ayŭh bada ngara bidua ka Tapa adi pinguasa di shorga yŭn masi ka mite Ayŭh kidaan rati rusia pŭmŭh anŭ di ngara isa ngara dŭh dog siŭ ngga bara adi tukang pitayan di Babylon.

¹⁹ Komŭnŭ ngarŭm anŭ gŭh keya ka darŭm pŭmŭh rusia anŭ dog pinandŭng di Daniel, ka ayŭh muji Tapa adi pinguasa di rangit:

²⁰ “Tapa inŭh bijak buang bikuasa! Muji meh Ayŭh ndŭg situi tui.

²¹ Ayŭh nguasa masā ngga tipuh; Ayŭh garar raja ka taran raja; Ayŭh inŭh adi nggen pinyibijak ngga pinyimirati.

²² Ayŭh pinandŭng kayuh kayuh adi tŭrŭp ngga adi bisukan; Ayŭh puan kayuh adi bisukan darŭm karŭm, ka adŭp-I dog kirurung jawa.

²³ Aku muji Kaam ka stabi di Kaam, Tapa tayung-babuk ku. Kaam mbŭh nggen di aku pinyibijak ngga pinyibake; Kaam mbŭh nam dua ku ka mbŭh kidaan di kieh kayuh adi re ami kidaan di raja.”

Daniel Kidaan di Raja Pŭmŭh anŭ Samŭn Rati-i

²⁴ Jadi Daniel di ka Arioch, adi Raja muko mritah bada siŭ ngara adi tukang pitayan raja. Ayŭh nang di ayŭh, “Dŭhnyah siŭ ngara. Taban aku ka yŭn raja ka aku re kidaan rati pŭmŭh-i.”

²⁵ Arioch rasu taban Daniel ngga di dapŭd Raja Nebuchadnezzar ka kidaan di ayŭh, “Aku mbŭh dapŭd ndi naan daya Jahudi adi dog taran, adi bisa kidaan di Tuan Raja rati pŭmŭh mai.”

²⁶ Raja nang di Daniel (adi dog kadŭn gŭh Belteshazzar), “Tungang kuu kidaan ani pŭmŭh ku ka ani rati-i?”

²⁷ Daniel nam, “Tuan Raja, mating dukun, mating pinanung, mating daya adi pandai kidaan nasip, puan kah daya adi birajar bitang dapŭd kidaan jeja ka anŭ.

²⁸ Pak agi Tapa adi pinguasa di shorga, adi pinandŭng rati barang masam rusia. Ayŭh mbŭh kidaan di Tuan Raja kayuh adi re jadi jŭ. Madin aku kidaan pŭmŭh anŭ, kayuh adi dog kiren di kaam darŭm bŭŭs.

²⁹ “Darŭm bŭŭs Tuan Raja nyipŭmŭh pasar kayuh adi re jadi jŭ; ka Tapa, adi pinandŭng rusia, kiren di kaam kayuh adi re jadi.

³⁰ Rusia anŭ dog pinandŭng di aku, dŭh sabab aku bijak dŭ so daya bŭkŭn, pak isa Tuan Raja birajar rati pŭmŭh mai ka mirati pikir-kira adi mandŭg ka kaam.

³¹ “Tuan Raja, darŭm pŭmŭh kaam kiris patong adi raru baga mijog di sirung jawin mai. Patong anŭ jawa buang bringam, buang taru nŭŭh kiris.

³² Ubak-i dog ndai so tigŭrŭ mas; sudo-i ngga tangan-i dog ndai so pirak; tigang ngga kupong-i dog ndai so timaga;

³³ kaja-i dog ndai so basi, ka pura kaja-i dog ndai sitangah so basi ka sitangah so tana-riyat.

³⁴ Darŭm kaam tingga-i, tibande batuh tanggar so jenjang dŭh sabab dog tama daya, ka nyatŭk kaja patong anŭ adi dog ndai so basi ngga tana-riyat, ka bada-i papar.

³⁵ Jam anŭ gŭh basi, tana-riyat, timaga, pirak, ngga mas anŭ rubuh ka jadi mun dabu di tarun yŭn daya ngiik di tipuh paras. Sabak taban sopŭrŭg-i ngga bu, ka arok-i mating gŭh. Pak batuh anŭ jadi tibande darŭd adi muno ndi ong ong.

³⁶ “Simŭnŭ inŭh pŭmŭh anŭ. Madin aku kidaan rati pŭmŭh anŭ di Tuan Raja.

³⁷ Tuan Raja, kaam inŭh raja adi rabis bās so sopŭrŭg raja adi bŭkŭn. Tapa adi pinguasa di shorga mbŭh ndai kaam jadi raja-empaya ka nggen kuasa, pinyibake, ngga stabi di kaam.

³⁸ Ayŭh mbŭh bada kaam jadi pimritah sopŭrŭg adi udip di ong, sopŭrŭg dāng ngga manuk. Kaam inŭh ubak mas.

³⁹ Ripas kaam re agi empaya adi bŭkŭn pak dŭh re bās mun jamai, ka ripas anŭ adi taruh, empaya timaga, adi re mritah ndi ong ong.

⁴⁰ Ka komŭnŭ empaya adi numbor taruh, bake mun basi, adi pirara ka pirandŭk barang masam kayuh. Ka nimun basi pirara barang masam kayuh, empaya anŭ re pirara ka pirandŭk sopŭrŭg empaya adi diŭ.

⁴¹ Kaam kiris gŭh kaja ngga trinju kaja patong anŭ mbŭh sitangah tana-riyat ngga basi. Rati-i empaya anŭ re pape nyinuwŭh. Ayŭh re biyŭn pinyibake basi, sabab agi dieh basi bigaur ngga tana-riyat.

⁴² Sindŭ trinju kaja — sitangah basi ngga tana-riyat — rati parad empaya anŭ re bake ka agi parad-i adi ramah.

⁴³ Kaam kiris gŭh basi anŭ bigaur ngga tana-riyat. Rati-i bara pimritah empaya anŭ re suba nyindi rawang ngara pakai aran banan sawan bigaur, pak ngara dŭh re tungang, amai basi dŭh bisa bigaur ngga tana-riyat.

⁴⁴ Di jaman bara pimritah anŭ Tapa adi pinguasa di shorga re pijog pritah adi dŭh bisa mungan. Pritah anŭ dŭh bisa dog ngarah, pak re kubo pirabur sopŭrŭg empaya adi bŭkŭn, ka komŭnŭ adŭp-i re mritah adu adu.

⁴⁵ Kaam kiris munki batuh tanggar so jenjang dŭh so ka dog tama daya ka munki batuh anŭ nyatŭk patong anŭ adi dog ndai so basi, timaga, tana-riyat, ka mas. Tapa adi bās inŭh kidaan di Tuan Raja kayuh adi re jadi jŭ. Aku mbŭh kubo kidaan pŭmŭh mai, ka mbŭh kidaan di kaam rati-i adi sawŭ.”

Raja Ngupah Daniel

⁴⁶ Komŭnŭ Raja Nebuchadnezzar mutu ubak-i ka tana ka nggen ukum bada sadis ngga pinganggen dog jugan ka Daniel.

⁴⁷ Raja nang, “Tapa mu inŭh adi siabo bās so sopŭrŭg tapa, Tuhan di tunduh raja raja, ka adi pinandŭng rusia. Aku puan, sabab kuu tungang kidaan rati rusia anŭ.”

⁴⁸ Komŭnŭ ayŭh nggen di Daniel pangkat adi bās, nggen di ayŭh bagŭ pinganggen adi grua, tijuan ayŭh bada tukang nguasa utung tarun tana rais Babylon, ka bada ayŭh jadi pingubak sopŭrŭg adi tukang pitayan raja.

⁴⁹ So pimite Daniel raja tijuan Shadrach, Meshach, ngga Abednego bada tukang nguasa kraja pingandai di utung tarun tana rais Babylon; Adŭp Daniel rŭŭ di istana raja ka nyiraja diginŭ.