AMOS 6 - Hakcipta - Biatah Bidayuh

Pinyirabu Israel

¹ Munki masam sipŭ-i re di angān adi mbŭh udip sanang di Zion ka angān adi kinyam adŭp ngan siramat di Samaria. Angān adi bara pinguru bās bangsa adi bās anŭ, ka yŭn ngan daya mandŭg mite turung!

² Panu di tingga kupo Calneh. Komŭnŭ panu radus ka Hamath kupo bās anŭ ka mūn ka Gath kupo daya Philistine. Kana dŭ kah ngara anŭ so pritah Judah ngga Israel? Bayah dŭ kah tarun tana ngara so tung jangān?

³ Angān abah ngaku nang andu pinyirusag mbŭh sindŭk, pak kayuh adi ndai ngan batur-i bada andu anŭ rikas mandŭg.

⁴ Munki masam sipŭ-i re di angān adi guring di pangō grua ngan anŭ, bigawai man dagin anak sapi ngga anak biri!

⁵ Angān suka nimbur ragu, mun David, ka mambak-i di kachapi.

⁶ Angān nok wain ndi makuk ka pakai wangi adi brega, pak angān dŭh muās pinyirabu Israel.

⁷ Jadi angān re jadi sibungas daya adi dog taran ka rais tami. Pawŭn ngan ngga gawai ngan re mungan.

⁸ TUHAN Raja adi Bisa-pŭrŭg mbŭh nggen pinyibakan ati: “Aku dŭh rindu uap-sambuh daya Israel; Aku ngamun ramin grua ngara. Aku re nggen sindŭ kupo ngara samŭn sopŭrŭg kayuh adi agi dieh di pinganyu ngara.”

⁹ Kambŭi agi simŭng naan dari dŭm darŭm rawang, ngara re kabŭs.

¹⁰ Madis daya adi kabŭs, sianŭ adi ngatur pinyikubur, re taban tadang anŭ ruah so ramin. Madis-i re bagan asi asi adi babŭ darŭm ramin, “Agi kah daya bŭkŭn diginŭ ayō kuu?” Ka sirŭŭn re nam, “Mating!” Ka madis anŭ re nang, “Pirŭŭ adŭp nŭh! Ata dŭh siŭn nyabŭt adŭn TUHAN.”

¹¹ Kan TUHAN nggen ukum, ramin adi bayah ngga adi sŭ re dog nyirubuh.

¹² Agi kah kuda bikaduh di tunduh sandah batuh? Agi kah daya majak rawŭt ngga sapi? Pak angān mbŭh bada pinyitŭnggŭn marui jadi rasun, ka kayuh adi batur angān bada marui jadi kayuh adi sarah.

¹³ Angān mingangŭn adŭp ngan mbŭh sirabut kupo Lodebar. Angān mingangŭn nang, “Kieh sukup bake tungang sirabut Karnaim.”

¹⁴ Adŭp TUHAN adi Tapa Bisa-pŭrŭg nang, “Daya Israel, Aku re pait bara tibaran soldadu tami bada ngisi rais ngan. Ngara re kinanyuh angān so Ateng Hamath di utara ndŭg sungi Arabah di siratan.”