AMOS 5 - Hakcipta - Biatah Bidayuh

Bada Marik Pimudip Pari ka Tapa

¹ Dingah, daya Israel, ragu nyikubur ati adi Aku nang pasar angān:

² Israel, dayung tibŭn anŭ, mbŭh rabu, dŭh re makat dinge! Ayŭh dog tandah guring di tunduh tana, ka mating daya turung pakat ayŭh.

³ TUHAN Raja nang, “Ndi kupo di Israel pait siribu naan soldadu, pak siratus adŭ mari; kupo adi bŭkŭn pait siratus naan soldadu, pak simŭng adŭ mari.”

⁴ TUHAN nang di daya Israel, “Mandŭg ka Aku, ka angān re udip.

⁵ Dŭhnyah di bisambah di Beersheba. Dŭhnyah suba jiroh Aku di Bethel — Bethel re jadi au-tarun. Dŭhnyah di ka Gilgal — daya-i re dog taran ka rais tami.”

⁶ Di ka TUHAN, ka angān re udip. Kambŭi dŭh, Ayŭh re mandŭg mun apui adi bijagu ka daya Israel. Apui anŭ re man daya Bethel, ka mating daya re tungang mura-i.

⁷ Mŭmbŭh inŭh angān, angān adi ngarut pinyitŭnggŭn ka sirapas hak daya!

⁸ TUHAN ndai dudu bitang, Bitang Sikara ngga Bitang Pite Piranuk. Ayŭh bada karŭm jadi jawa andu, ka sandu jadi ngarŭm. Ayŭh bagan piin so rawŭt ka ren-i di ong, Adŭn-I inŭh TUHAN.

⁹ Ayŭh pirabur daya daya adi bake samŭn kuta kuta ngara.

¹⁰ Angān tiru di daya adi natang daya adi dŭh parad pinyitŭnggŭn ka adi minyu kayuh adi sawŭ di tarun yŭn bisara.

¹¹ Angān mbŭh kinanyuh daya sirata ka sirapas gandom ngara. Ngapŭi angān dŭh re tia rŭŭ di ramin batuh grua adi angān pijog. Angān dŭh re tia nok wain so teya anggor damŭn adi angān purun.

¹² Aku puan munki masam sipŭ dosa ngan ka kudu pingandai sarah mbŭh ngan ndai. Angān kisiis daya adi kana, angān man suap, ka bitan sirŭŭn daya sirata dog dingah di tarun yŭn bisara.

¹³ Jadi, mbŭh bijak dŭ nŭŭh pirŭŭ adŭp nŭh di tika adi arap mun anŭ!

¹⁴ Bada-i jadi pinŭtŭn ngan ndai kayuh adi batur, dŭh kayuh adi arap, isa angān udip. Ka TUHAN Tapa Bisa-pŭrŭg re agi ngga angān, sak adi mbŭh angān nang.

¹⁵ Tiru di kayuh adi arap, rindu di kayuh adi batur, ka bada pinyitŭnggŭn mujur di tarun yŭn bisara. Kadŭ TUHAN re masi di daya Israel adi gibabŭ udip.

¹⁶ Sabab anŭ meh TUHAN Raja adi Bisa-pŭrŭg nang, “Re agi sien adi bana ngga sien sabab susah di aran aran kupo. Ndŭg ka tukang tukang teya re dog bagan bada sua muās daya kabŭs ngga ngara adi dog ngupah bada muās.

¹⁷ Re agi sien adi bana di sopŭrŭg teya anggor. Sopŭrŭg anŭ re jadi sabab Aku re mandŭg di ngukum angān.” TUHAN mbŭh minyu.

¹⁸ Munki masam sipŭ-i re di angān adi gruwŭn andu TUHAN! Ani kana-i andu anŭ di angān? Di angān anŭ re andu adi karŭm ka dŭh-i andu adi jawa.

¹⁹ Anŭ re keya ka daya bikaduh mangān singah pak bidapŭd ngga buāng! Puan kah keya ka daya mari ka ramin-i ka na tangan-i di sindung — pak dog nyingŭt jippŭh!

²⁰ Andu TUHAN re karŭm, dŭh-i jawa. Andu anŭ re nyabūk, mating kakab jawa dieh.

²¹ TUHAN nang, “Aku tiru di gawai adat ngan; Aku dŭh tan tingga-i!

²² Kan angān taban ka yŭn Ku sadis badang ngga sadis ruwang kayuh, Aku dŭh re trima-i; Aku dŭh re trima dāng adi mbŭh ngan nyikumō yŭn re taban ka yŭn Ku ndu sadis.

²³ Pirŭŭ ragu ngan adi bidudu anŭ; Aku dŭh raan dingah kachapi ngan.

²⁴ Adi Aku raan, bada pinyitŭnggŭn aman mun anak sungi, ka pinŭnggŭn mun sungi adi bŭn badŭh.

²⁵ “Daya Israel, Aku dŭh mite sadis ngga pinganggen darŭm tipuh pat puru sawa Aku nguru angān mutas tarun tana-pajam.

²⁶ Pak madin, sabab angān mbŭh nyambah gayŭn gayŭn Sakkuth, adi angān ngaku ndu raja; ka Kaiwan, adi angān ngaku nang tapa bitang ngan, angān re taban gayŭn gayŭn anŭ

²⁷ kan Aku taban angān yŭn dog taran ka rais jo so Damascus,” nang TUHAN, adi Adŭn-I Tapa Bisa-pŭrŭg.