AMOS 4 - Hakcipta - Biatah Bidayuh

¹ Dingah, angān bara dayung Samaria, adi mbŭh bitambah gamu mun sapi Bashan adi nakit dog paan. Angān arap ngga daya adi ramah, kinanyuh daya adi sirata, ka takan banŭh ngan bada ari nggen nok adi bisā di angān!

² Nimun TUHAN Raja inŭh kudus, Ayŭh mbŭh bijanji, “Andu re mandŭg kan ngara re batak angān pakai sikait; barang naan angān re mun iken adi bikideng di sibakid pisis.

³ Angān re dog batak ka rubang sindung adi sindŭk ka dog taran ka sapa.”

Israel dŭh Birajar

⁴ TUHAN Raja nang, “Daya Israel, di ka yŭn bisambah di Bethel ka ndai dosa, kambŭi angān dŭh siŭn dŭh di! Di ka Gilgal ka ndai dosa ngga situngang tungang ngan! Ndai adŭ, ka taban dāng an ngan nyadis barang isan isan, ka taban pinganggen ndi utung-so-simŭng ngan barang andu adi taruh.

⁵ Ndai adŭ, ka jugan ruti ngan ndu pinganggen trima kaseh ka Tapa, ka minyu sambuh pasar rabis pinganggen adi angān mbŭh taban! Anŭ inŭh masam kayuh adi angān suka ndai.

⁶ “Aku inŭh adi taban apag ka sopŭrŭg kupo ngan, pak angān dŭh pari ka Aku.

⁷ Aku bitan ujen kan pimuruh ngan raru biguna di piin. Aku nggen ujen di ndi kupo, pak dŭh di kupo adi bŭkŭn. Ujen rabu di ndi ŭmŭh, pak ŭmŭh adi bŭkŭn badŭh.

⁸ Ramah ngga badŭh asŭng, daya so kupo kupo adi bŭkŭn mandŭg ka ndi kupo di yŭn ngara harap adŭp-i dapŭd piin, pak diginŭ dŭh sadang piin re ngara nok. Babŭ gŭh angān dŭh pari ka Aku.

⁹ “Aku pait sabak adi paras ngga bada pimuruh ngan pisŭk. Kadis-baga pirusak teya ngan ka teya anggor ngan, tŭngŭn ara ngan ka tŭngŭn kanā ngan. Babŭ gŭh angān dŭh pari ka Aku.

¹⁰ “Aku pait sesak-andam ka angān mun anŭ adi Aku pait ka daya Egypt. Aku siŭ bara dari ngan adi mara darŭm perang ka tambit kuda ngan. Aku ngisi undung ngan ngga buuh so tadang adi madam di tarun yŭn ngan bibari. Babŭ gŭh angān dŭh pari ka Aku.

¹¹ “Aku pirabur kada so angān mun Aku pirabur Sodom ngga Gomorrah. Angān adi dŭh kabŭs mbŭh keya ka rangas adi sau pak dŭh rŭpŭg da apui. Babŭ gŭh angān dŭh pari ka Aku,” nang TUHAN.

¹² “Ngapŭi meh, daya Israel, Aku re ngukum angān. Ka sabab Aku re ngukum angān, sidia meh adŭp ngan!

¹³ Tapa inŭh adi ndai sopŭrŭg darŭd ka adi napa sabak. Ayŭh bada pikir kira-I dog puan manusia; Ayŭh ngubah sandu jadi ngarŭm. Ayŭh panu di tibung tibung ong. TUHAN Tapa Bisa-pŭrŭg, anŭ inŭh adŭn-I!