AKIM 8 - Hakcipta - Biatah Bidayuh

Sikasŭn daya Midian dog Ngarah

¹ Jadi daya Ephraim nang di Gideon, “Mani kuu dŭh bagan kieh di tika kuu matak rawan daya Midian? Mani kuu simŭnŭ ngga kieh?” Ngara bandar bandar mingungut pasar anŭ.

² Pak ayŭh kidaan di ngara, “Kayuh adi aku tungang ndai inŭh au-tarun kambŭi danding ngga kayuh adi angān mbŭh ndai. Kayuh adi nisŭ adi angān daya Ephraim mbŭh ndai inŭh brega dŭ so kayuh adi sopŭrŭg daya manak ku mbŭh ndai.

³ Amai sawŭ gŭh, so kuasa Tapa angān siŭ pingubak daya Midian anŭ adi duwŭh naan, Oreb ngga Zeeb. Ani meh adi aku mbŭh ndai re ngga danding anŭ?” Kan ayŭh muko nang sakanŭ, ngara mbŭh dŭh tia paŭh tuas.

⁴ Di tika anŭ Gideon ngga bara-i adi taruh ratus naan mbŭh ndŭg ka mbŭh mutas Yang Jordan. Ngara mbŭh raru kawŭk, pak gibabŭ tadak bara pinganyu.

⁵ Kan ngara mbŭh ndŭg Sukkoth, ayŭh nang di bara daya kupo anŭ, “Turung nggen di bara daya ku pinguman. Ngara mbŭh raru kawŭk, ka aku ati aŭn tadak Zebah ngga Zalmunna, adi raja raja daya Midian.”

⁶ Pak bara pinguru kupo Sukkoth nang, “Ani pada kieh nggen pinguman di bara soldadu mu? Kuu gibayuh nakap Zebah ngga Zalmunna.”

⁷ Jadi Gideon nang, “Kana! Kan TUHAN muko nggen Zebah ngga Zalmunna di aku, aku re madŭs angān ngga tŭngŭn reja ka bakah pireja so tarun tana-pajam!”

⁸ Gideon pijuu pimanu-i ndŭg Penuel, ka ndai pimite adi sakanŭ gŭh di daya diginŭ, pak daya di Penuel nggen pinyinam adi brisak ngga daya di Sukkoth.

⁹ Jadi ayŭh nang di ngara, “Aku re pari mandŭg kamati siramat buang bua sanang; ka kan aku pari, aku re nyirubuh tawā kupo ati.”

¹⁰ Zebah ngga Zalmunna agi di Karkor ngga bara soldadu ngara. Sopŭrŭg bara soldadu tibaran tibaran-asar daya adi so tarun tana-pajam agi simŭng rimŭh ribu naan adŭ adi dŭm. Siratus duwŭh puru ribu naan adi mbŭh kabŭs dog siŭ.

¹¹ Gideon pijuu pimanu-i kadŭg aran adi di bŭngŭn tarun tana-pajam, tura ka timor Nobah ngga Jogbehah, ka nyirŭgŭh nyerang bara soldadu pinganyu diginŭ.

¹² Raja Midian adi duwŭh naan anŭ, Zebah ngga Zalmunna, bu, pak ayŭh tadak ka nakap ngara, ka bada sopŭrŭg soldadu ngara kandang-kandŭ taru.

¹³ Kan Gideon pari so perang kadŭg aran Ateng Heres,

¹⁴ ayŭh nakap ndi naan bujang dari so Sukkoth ka siken ayŭh. Bujang dari anŭ nuris yŭn Gideon dŭn dŭn ju puru ju naan pinguru di Sukkoth.

¹⁵ Komŭnŭ Gideon di ka yŭn bara pinguru di Sukkoth ka nang, “Ingat angān muko abah turung aku? Angān nang adŭp ngan dŭh tungang nggen pinguman di bara soldadu ku adi mbŭh raru kawŭk amai aku gibayuh nakap Zebah ngga Zalmunna. Ta ngara duwŭh!”

¹⁶ Ka ayŭh tambit tŭngŭn reja ka bakah pireja so tarun tana-pajam ka pakai-i ngga kijera bara pinguru kupo Sukkoth.

¹⁷ Ayŭh nyirubuh gŭh tawā kupo Penuel ka siŭ bara dari kupo anŭ.

¹⁸ Komŭnŭ Gideon siken Zebah ngga Zalmunna, “Munki meh bara dari adi angān siŭ di Tabor?” Ngara nam, “Mun kuu — barang naan ngara mun anak raja.”

¹⁹ Gideon nang, “Ngara anŭ jurud dari ku, bara anak sindŭ adŭp ku. Aku bipayu, kambŭi angān dŭh siŭ ngara, aku dŭh gŭh siŭ angān.”

²⁰ Komŭnŭ Gideon nang di Jether, anak pinuai dari-i, “Siŭ meh ngara!” Pak anak anŭ dŭh nyitak pedang-i. Ayŭh taru, amai ayŭh paŭh gi-mara.

²¹ Komŭnŭ Zebah ngga Zalmunna nang di Gideon, “Adŭp mu siŭ kieh. Anŭ inŭh kraja dari.” Jadi Gideon siŭ ngara ka tambit sopŭrŭg abuh adi agi di tungo onta onta ngara.

²² Ripas anŭ, daya Israel nang di Gideon, “Jadi pimritah ami, kaam ngga bara sesang mai ripas kaam. Kaam mbŭh nyiramat kieh so daya Midian.”

²³ Gideon nam, “Aku dŭh re jadi pimritah ngan, anak dari ku dŭh gŭh. TUHAN inŭh adi re jadi pimritah ngan.”

²⁴ Pak ayŭh pijuu nang, “Bada aku mite ndi masam kayuh so angān. Barang naan angān nggen di aku dudu sigating adi angān mbŭh sirapas so pinganyu.” (Bara daya Midian, mun daya tibaran tibaran-asar so tarun tana-pajam, taŭn pakai sigating mas.)

²⁵ Bara daya bagŭ nam, “Ngga sanang asŭng kieh re nggen kayuh anŭ di kaam.” Ngara mamad banang, ka barang naan ngara na dudu sigating adi muko dog sirapas so pinganyu.

²⁶ Dudu sigating mas adi ngara nggen di Gideon agi duwŭh puru kilogram bat-i, pak anŭ dŭh dog mirang samŭn abuh abuh, kukong kukong, piraka piraka adi bēng adi bara raja Midian pakai, ka abuh abuh adi dog nyikakong di tungo onta onta ngara.

²⁷ Gideon ndai ndi tibudo ngga mas mas anŭ, ka pijog-i di kupo adŭp-i, Ophrah. Sopŭrŭg daya Israel mbŭh tagan Tapa, ka di kamanŭ nyambah tibudo anŭ. Anŭ inŭh mbŭh jadi jarat di Gideon ngga di rawang-i.

²⁸ Jadi Midian mbŭh dog ngarah daya Israel ka mbŭh dŭh tia jadi pinyusah di ngara. Tarun tana mbŭh bamai sitian pat puru sawa, ndŭg ka Gideon kabŭs.

Pinyikabŭs Gideon

²⁹ Gideon pari ka ramin adŭp-i di Ophrah ka rŭŭ diginŭ.

³⁰ Ayŭh biyŭn ju puru madis anak dari, amai ayŭh biyŭn bagŭ sawŭn.

³¹ Ayŭh biyŭn gŭh ndi naan dayung nyikŭn-i di Shechem; adi biranak ndi anak dari yŭn-i, ka ayŭh kadŭn-i Abimelech.

³² Gideon anak Joash kabŭs kan umbur-i mbŭh sadang nyamba-i, ka dog kubur di darŭm kubur sama-i Joash, di Ophrah, kupo manak Abiezer.

³³ Ripas pinyikabŭs Gideon daya Israel mbŭh dŭh tia tŭtŭd di Tapa ka nyambah tapa tapa Baal. Ngara pijadi Baal-Berith tapa ngara,

³⁴ ka dŭh tia bituan di TUHAN adi Tapa ngara, adi muko nyiramat ngara so sopŭrŭg pinganyu adi maning ngara.

³⁵ Ngara dŭh gŭh rada rawang Gideon di sopŭrŭg kayuh adi kana adi ayŭh muko ndai yŭn Israel.