AKIM 7 - Hakcipta - Biatah Bidayuh

Gideon Ngarah Daya Midian

¹ Agi ndi sidah, Gideon ngga sopŭrŭg daya-i makat isan isan ka bibari sindŭk Rubang piin Harod. Bara daya Midian bibari di rubān tura ka utara ngara sindŭk Sandah Moreh.

² TUHAN nang di Gideon, “Bara dari adi ayō mu mbŭh raru bagŭ re Ku yŭn nggen pimanang ngarah daya Midian. Ngara re pikir ngara manang so pinyibake adŭp ngara, ka dŭh re nyibragah Aku.

³ Kidaan di daya bagŭ, ‘Barang naan adi pinakut patut pari ka ramin-i, ka kieh rŭŭ digiti di Darŭd Gilead.’ ” Jadi duwŭh puru-duwŭh ribu naan daya bu mari, pak simŭng ribu adi dŭm.

⁴ Komŭnŭ TUHAN nang di Gideon, “Gibabŭ bagŭ daya mu. Taban ngara ngga mūn ka tŭngŭn piin, ka diginŭ aku re nyidŭrŭ ngara yŭn mu. Kambŭi Aku kidaan di kuu daya adi patut di ngga kuu, ayŭh dŭh siŭn dŭh di. Kambŭi Aku kidaan di kuu daya adi dŭh siŭn di ngga kuu, ayŭh dŭh siŭn di.”

⁵ Gideon taban bara daya-i mūn ka tŭngŭn piin, ka TUHAN kidaan di ayŭh, “Nyidŭrŭ barang naan daya adi nyarek piin ngga jura-i mun kasong, so barang naan daya adi sidikang ngga karŭb-i nok.”

⁶ Agi taruh ratus naan bara dari adi nyarek piin adi dog nyauk ngga tangan-i. Sopŭrŭg adi bŭkŭn sidikang ngga karŭb-i nok.

⁷ TUHAN nang di Gideon, “Aku re nyiramat angān ka nggen pimanang di angān ngarah daya Midian ngga taruh ratus naan bara dari adi nyarek piin anŭ. Kidaan di barang naan adi bŭkŭn bada mari.”

⁸ Jadi Gideon bada sopŭrŭg daya Israel mari, adŭ-i ngara adi taruh ratus naan, adi tambit sopŭrŭg inged ngga trompet so ngara. Bari daya Midian agi di sagān ngara di rubān.

⁹ Ngarŭm anŭ TUHAN nang di Gideon, “Makat meh ka nyerang bari bari daya Midian; Aku nggen di kuu pimanang ngarah ngara.

¹⁰ Pak kambŭi kuu taru di nyerang; mūn ka yŭn bari bari anŭ ngga daya-gaji mu Purah.

¹¹ Kuu re dingah kayuh adi ngara nang, komŭnŭ kuu re jadi pagan di nyerang.” Jadi Gideon ngga daya gaji-i Purah mūn ka sagān ndŭg bŭngŭn tarun yŭn pinganyu bibari.

¹² Bara daya Midian, daya Amalek, ngga daya tibaran tibaran-asar so tarun tana-pajam mbŭh raru bagŭ di ndi tarun tarun rubān anŭ mun dudu kadis, ka ngara biyŭn raru bagŭ onta keya ka sirah sumat di pang rawŭt.

¹³ Kan Gideon mbŭh ndŭg nŭ, ayŭh dingah ndi naan daya kidaan di dingan-i pasar pŭmŭh-i. Daya anŭ nang, “Aku pŭmŭh ndi baru ruti jeri biraring ka darŭm yŭn ta bibari ka numbong ndi bari. Bari anŭ rubuh.”

¹⁴ Dingan-i nam, “Anŭ inŭh pedang daya Israel anŭ, Gideon anak Joash! Dŭh rati-i kayuh bŭkŭn! Tapa mbŭh nggen di ayŭh pimanang ngarah daya Midian ngga sopŭrŭg soldadu ta!”

¹⁵ Kan Gideon dingah pŭmŭh daya anŭ ngga rati-i, ayŭh rasu sidikang ka nyambah TUHAN. Komŭnŭ ayŭh pari ka yŭn bara daya Israel bibari ka nang, “Makat meh! TUHAN mbŭh nggen di angān pimanang ngarah bara soldadu daya Midian!”

¹⁶ Ayŭh kutung bara daya-i adi taruh ratus naan nyitaruh, ka nggen di barang naan ngara ndi trompet ngga ndi gabuk adi agi prita-siru' di darŭm-i.

¹⁷ Ayŭh kidaan di ngara, “Kan aku mbŭh ndŭg bŭngŭn tarun yŭn pinganyu bibari, nyibatŭh aku, ka ndai anŭ adi aku ndai.

¹⁸ Kan aku ngga bara ku mambak trompet, angān mambak gŭh tung jangān maning bari bari pinganyu buang nyirais nang, ‘Yŭn TUHAN ka yŭn Gideon!’ ”

¹⁹ Gideon ngga bara-i adi siratus naan mandŭg ka bŭngŭn tarun yŭn pinganyu bibari dŭh tui diŭ so sitŭrŭp ngarŭm, ripas daya adi tukang jaga mbŭh bigati. Komŭnŭ ngara mambak trompet ka mape gabuk adi ngara digen,

²⁰ ka ngara anŭ adi duwŭh tibaran ndai simŭnŭ gŭh. Sopŭrŭg ngara digen prita-siru' di tangan bait ngara, trompet di tangan tauh ngara, ka nyirais nang, “Pedang yŭn TUHAN ka yŭn Gideon!”

²¹ Barang naan masin masin tambit yŭn mijog maning tarun yŭn pinganyu bibari, ka sopŭrŭg soldadu pinganyu babak bu nyirais.

²² Sitadŭn bara daya Gideon mambak trompet, TUHAN bada bara soldadu pinganyu nyerang bara adŭp-i ngga pedang. Ngara bikaduh nuju Zarethan jeh ndŭg Beth Shittah, jeh ndŭg kupo Abel Meholah sindŭk Tabbath.

²³ Bara dari so tibaran-asar Naphtali, Asher, ngga so-duwŭh parad so tibaran-asar Manasseh dog bagan, ka ngara tadak bara daya Midian.

²⁴ Gideon pait bara pinyisung bada di ka ndi abong abong rais tarun tana sandah Ephraim da nang, “Mandŭg mūn ka rawan daya Midian. Jaga di Yang Jordan ngga di sungi sungi jeh ndŭg Bethbarah, ka dŭhnyah bada daya Midian mutas.” Bara daya so tibaran-asar Ephraim dog bagan, ka ngara jaga di Yang Jordan ka di sungi sungi jeh ndŭg Bethbarah.

²⁵ Ngara nakap pingubak daya Midian adi duwŭh naan, Oreb ngga Zeeb; ngara siŭ Oreb di Batuh Oreb, ka Zeeb di Tarun yŭn mŭ Anggor Zeeb. Ngara adu adu tadak daya Midian ka taban ubak Oreb ngga ubak Zeeb ka yŭn Gideon adi mbŭh di tura ka timor Jordan.