AKIM 6 - Hakcipta - Biatah Bidayuh

Gideon

¹ Jadi daya Israel bidosa dinge rawan TUHAN, ka Ayŭh bada daya Midian mritah ngara sitŭkŭd ju sawa.

² Bara daya Midian bake dŭ so Israel, ka daya Israel bisukan mangān ngara darŭm tang ka di tarun bŭkŭn adi siramat di arong sandah.

³ Tiap kari daya Israel nyipurun, daya Midian mandŭg samah ngga daya Amalek samŭn tibaran tibaran-asar so tarun tana-pajam ka nyerang ngara.

⁴ Ngara bibari di tarun tana anŭ ka pirusak sopŭrŭg pimuruh daya Israel jeh ndŭg arong gadung Gaza di siratan. Ngara sirapas sopŭrŭg biri, sapi, ngga kaldi, ka dŭh kidŭm ani ani kayuh adi ngga bara daya Israel kudip adŭp-i.

⁵ Ngara mandŭg taban dāng kudip ngara ngga bari bari, bara bara ngara mun dudu kadis. Ngara ngga dudu onta ngara mbŭh dŭh tungang dog mirang. Ngara mandŭg ka pirusak tarun tana adŭ,

⁶ ka daya Israel dŭh biyŭn aran re rawan ngara.

⁷ Jadi daya Israel mite turung so TUHAN rawan daya Midian,

⁸ ka Ayŭh pait ka yŭn ngara ndi naan nabi adi taban pinganang ati so TUHAN, adi Tapa Israel: “Aku mbŭh taban angān ruah so jadi urun di Egypt.

⁹ Aku pirupas angān so daya Egypt ka so daya adi rawan angān di tarun tana ati. Aku pibu ngara darŭm angān masang nyerang ngara, ka Aku nggen di angān tarun tana ngara.

¹⁰ Aku kidaan di angān nang, Aku ati TUHAN adi Tapa ngan, ka angān dŭh siŭn nyambah tapa tapa daya Amor adi dapu tarun tana ati adi yŭn ngan rŭŭ madin. Pak angān dŭh dingah pinganang Ku.”

¹¹ Komŭnŭ malaikat TUHAN mandŭg ka anak kupo Ophrah, ka guru di ribo tŭngŭn oak adi Joash dapu, daya adi so manak Abiezer. Anak-i Gideon bisukan ngiik gandom di tarun yŭn mŭ anggor, isa daya Midian dŭh kiris adŭp-i.

¹² Malaikat TUHAN nandŭng di ayŭh diginŭ ka nang: “TUHAN agi ngga kuu, kuu daya adi pagan buang bake!”

¹³ Gideon nang di ayŭh, “Kambŭi aku siŭn siken, tuan, mani ka sopŭrŭg kayuh ati jadi di kieh pŭn ka TUHAN agi ngga kieh? Ani mbŭh jadi di sopŭrŭg pingandai saruh adi tayung-babuk ami mbŭh nyidundan di kieh TUHAN ari ndai — simuki Ayŭh taban ngara ruah so Egypt? TUHAN mbŭh tagan kieh ka tandah kieh darŭm tangan daya Midian.”

¹⁴ Jadi TUHAN mritah Gideon, “Panu ngga siabo pinyibake mu, ka pirupas Israel so daya Midian. Adŭp Ku inŭh pait kuu.”

¹⁵ Gideon nam, “Pak TUHAN, simuki aku re tungang pirupas Israel? Manak adi so aku mandŭg inŭh adi siabo rumuh darŭm tibaran-asar Manasseh, ka aku ati daya adi siabo sŭ pangkat darŭm rawang ku.”

¹⁶ TUHAN nam ayŭh, “Kuu tungang amai Aku re turung kuu. Kuu re sanang ngarah daya Midian, keya ka ngarah ndi naan daya.”

¹⁷ Gideon nam, “Kambŭi asŭng Mai munos di aku, kiren garang tandā di aku nang Kaam ati sawŭ TUHAN adi minyu ngga aku.

¹⁸ Turung dŭhnyah diŭ bu ndŭg ka aku mbŭh taban yŭn Mai pinganggen pinguman.” Ayŭh nang, “Aku re kajŭn ndŭg ka kuu mbŭh pari kamati.”

¹⁹ Jadi Gideon maad ka arŭn-i rasu tanŭk ndi pŭrŭng anak kambing ka pakai simŭng kilogram tibaduk ngga ndai ruti dŭh biragi. Ayŭh na dagin anŭ di darŭm bakur ka ju dagin anŭ darŭm priok branga, taban-i ka yŭn malaikat TUHAN di ribo tŭngŭn oak anŭ, ka nggen-i di ayŭh.

²⁰ Malaikat anŭ kidaan di ayŭh, “Na dagin ngga ruti anŭ di tunduh batuh ati, ka ren ju dagin anŭ di tunduh-i.” Gideon ndai simŭnŭ.

²¹ Komŭnŭ malaikat TUHAN pakat tangan-i ka njug dagin ngga ruti anŭ ngga tŭbŭn sikud adi digen-i. Apui ruah so batuh anŭ ka badang dagin ngga ruti anŭ. Komŭnŭ malaikat anŭ miyap.

²² Gideon rasu natŭng anŭ malaikat TUHAN adi ayŭh kiris, ka ayŭh nang darŭm taru, “TUHAN Raja! Aku mbŭh situra jawin kiris malaikat Mai.”

²³ Pak TUHAN nang di ayŭh, “Damai, Dŭhnyah taru. Kuu dŭh re kabŭs.”

²⁴ Gideon pijog ndi mija-sambah diginŭ ka kadŭn-i “TUHAN inŭh Damai.” (Mija-sambah anŭ gibabŭ di Ophrah, adi dog dapu manak Abiezer.)

²⁵ Ngarŭm anŭ TUHAN kidaan di Gideon, “Tambit dari sapi sama mu ngga anŭ ndi adi ju sawa umbur-i; nyirubuh mija-sambah adi sama mu pijog yŭn Baal, ka tabŭng tandā pinatŭng tapa Asherah, adi ngapid-i.

²⁶ Pijog ndi mija-sambah adi nakit dog ndai yŭn TUHAN adi Tapa mu di tibung sandah ati. Komŭnŭ tambit dari sapi adi numbor duwŭh anŭ ka mŭrŭng badang-i ndu sadis, ka pakai ndu uwang tandā pinatŭng Asherah adi muko mu tabŭng tejah.”

²⁷ Jadi Gideon mien simŭng naan daya gaji-i ka ndai nanyam adi TUHAN mbŭh bada. Ayŭh dŭh pagan ndai-i sandu amai raru taru di rawang adŭp-i ka di daya daya kupo anŭ, ngapŭi ayŭh ndai-i singarŭm.

²⁸ Kan daya kupo isan makat andu jawa ndi, ngara kiris mija-sambah Baal ngga tandā pinatŭng Asherah mbŭh dog tabŭng, ka dari sapi adi numbor duwŭh muko dog badang di tunduh mija-sambah adi dog pijog diginŭ.

²⁹ Ngara bisiken ngga dingan-i, “Asi ndai ati?” Ngara nyuki pingandai anŭ ka dog kidaan nang Gideon anak Joash adi ndai-i.

³⁰ Ka ngara nang di Joash, “Taban anak mu ruah kamati, isa kieh siŭ ayŭh! Ayŭh nyirubuh mija-sambah Baal, ka tabŭng tandā pinatŭng Asherah adi ngapid-i.”

³¹ Pak Joash nang di sopŭrŭg ngara adi natang nyangang ayŭh, “Angān bikarit ngarun Baal kah? Angān nyibandar ayŭh kah? Asi asi adi ngarun ayŭh re dog siŭ diŭ so andu jawa sipagi. Kambŭi Baal sawŭ tapa, bada ayŭh nyibandar adŭp-i. Mija sambah-i inŭh adi mbŭh dog nyirubuh.”

³² So nganŭ Gideon mbŭh dog kadŭn Jerubbaal amai Joash nang, “Bada Baal nyibandar adŭp-i; mija sambah-i inŭh adi mbŭh dog nyirubuh.”

³³ Komŭnŭ sopŭrŭg daya Midian, daya Amalek, ngga tibaran tibaran-asar so tarun tana-pajam mandŭg tikuruk, mutas Yang Jordan ka bibari di Rubān Jezreel.

³⁴ Roh TUHAN nguasa Gideon, ka ayŭh mambak trompet ngga bagan bara dari so manak Ahiezer bada tunda adŭp-i.

³⁵ Ayŭh pait bara pinyisung ka abong abong so-duwŭh tarun tana Manasseh bada ngara tunda adŭp-i. Ayŭh pait bara pinyisung ka tibaran-asar Asher, Zebulum, Naphtali, ka ngara gŭh mandŭg an tunda ayŭh.

³⁶ Komŭnŭ Gideon nang di Tapa, “Kaam nang adŭp Mai re pakai aku bada pirupas daya Israel.

³⁷ Madin aku na buruh biri di tunduh tana adi yŭn ami ngiik gandom. Kambŭi ngga isan isan andu sipagi sipot-abun agi di tunduh buruh biri anŭ adŭ pak dŭh di tunduh tana, nganŭ aku re puan nang Kaam sawŭ re pakai aku ngga pirupas daya Israel.”

³⁸ Anŭ inŭh kayuh adi sawŭ mbŭh jadi. Kan Gideon makat isan isan andu jawa ndi, ayŭh mŭrŭs buruh biri anŭ ka piin sipot-abun sadang ndi makuk ruah so dieh.

³⁹ Ka Gideon nang di Tapa, “Dŭhnyah tuas di aku, bada aku minyu dŭm ndi sidah. Turung bada aku ndai ndi pinyisuba dinge ngga buruh biri anŭ. Saba ati, bada buruh biri anŭ badŭh, ka bada tana anŭ bisa.”

⁴⁰ Ngarŭm anŭ Tapa bada kayuh anŭ jadi simŭnŭ. Isan isan andu sipagi, buruh biri anŭ badŭh, pak tana bisa bada sipot-abun.