AKIM 5 - Hakcipta - Biatah Bidayuh

Ragu Deborah ngga Barak

¹ Di andu anŭ, Deborah ngga Barak adi anak Abinoam nang ragu ati: Puji ka TUHAN!

² Bara pinguru Israel mbŭh bigŭtŭ raan biperang; bara daya bagŭ ngaŭn asŭng raan sua.

³ Dingah, angān bara raja! Nakit dingah, angān adi mritah! Aku re biragu ka main musik ka Tapa Israel adi TUHAN.

⁴ O TUHAN, di tika Kaam bu so darŭd Seir, di tika Kaam ruah so abong tarun tana Edom, tana bigugoh, ka ujen rabu so rangit, sawŭ, piin dog basen so kruman.

⁵ Darŭd darŭd bigugoh di sirung jawin TUHAN Sinai, di sirung jawin TUHAN, adi Tapa Israel.

⁶ Di jaman Shamgar anak Anath, di jaman Jael, bara daya dŭh tia ated ated mutas tarun tana rais, ka daya bagŭ mbŭh pakai aran patas.

⁷ Kupo kupo daya Israel dog tagan, O Deborah; mating daya dieh ndŭg ka kaam mandŭg, mandŭg keya ka sindŭ yŭn Israel.

⁸ Komŭnŭ perang agi di tarun tana di tika Israel mien tapa tapa bauh. So bara dari adi pat puru ribu naan di Israel, agi kah daya digen jarok puan kah pinangin?

⁹ Atin ku agi ngga bara pingibās Israel, ngga dudu daya adi ngaŭn asŭng raan sua biperang. Puji ka TUHAN!

¹⁰ Kidaan pasar kayuh anŭ, angān adi nunggang kaldi buda, adi guru di tunduh tapas-pinyiguru, ka angān adi dŭh siŭn dŭh bidayŭh ka tadŭ yŭn.

¹¹ Dingah! Jawŭn dudu daya maning prigi prigi kidaan pasar pimanang TUHAN, pimanang daya Israel! Komŭnŭ bara daya TUHAN baris mūn so kupo kupo ngara.

¹² Makat meh, Deborah, makat meh! Makat meh! Nang ndi ragu! makat meh! Makat, Barak anak Abinoam, taban meh bara daya-takap mu!

¹³ Komŭnŭ, ngara adi tŭtŭd mūn mandŭg tudu bara pingubak ngara; bara daya TUHAN mandŭg tudu Ayŭh, sidia re biperang.

¹⁴ Ngara mandŭg so Ephraim di ka rubān di punok tibaran-asar Benjamin ngga bara daya-i. Bara pingibās soldadu mandŭg mūn so Machir. bara pingubak soldadu mandŭg mūn so Zebulum.

¹⁵ Bara pinguru Issachar mandŭg ayō Deborah; sawŭ, Issachar mandŭg ka simŭnŭ gŭh Barak, ka ngara tunda ayŭh di ka rubān. Pak tibaran-asar Reuben mbŭh pape; ngara mbŭh dŭh tungang natu adŭp-i re mandŭg kah dŭh.

¹⁶ Mani ngara abah sua, ka dog tingge samah biri biri? Dingah bara pingingat-biri bagan kaban biri? Sawŭ, tibaran-asar Reuben mbŭh pape; ngara mbŭh dŭh tungang natu adŭp-i re mandŭg kah dŭh.

¹⁷ Tibaran-asar Gad rŭŭ di tura ka timor Jordan, ka tibaran-asar Dan babŭ rŭŭ sindŭk kapar kapar. Tibaran-asar Asher rŭŭ di arong bŭngŭn rawŭt; ngara babŭ di arong tabing rawŭt.

¹⁸ Pak daya Zebulum ngga Naphtali ruban asŭng ngara di tarun yŭn biperang.

¹⁹ Di Taanach, sindŭk sungi Megiddo, bara raja mandŭg di birawan; bara raja Canaan birawan, pak ngara mating taban pirak ngga bu.

²⁰ Bitang bitang birawan so rangit; buang mutas rangit, ngara rawan Sisera.

²¹ Piin uba di Kishon paman ngara ngga bu — uba Yang Kishon adi daras aman. Aku re panu, masang, ngga pinyibake!

²² Komŭnŭ bara kuda mandŭg bikaduh, sigudab di tana ngga tinjug-i.

²³ “Mangu Meroz” malaikat TUHAN nang, “pangu, pangu nyatŭk ngara adi rŭŭ diginŭ. Ngara dŭh mandŭg di turung TUHAN, nimun soldadu adi birawan yŭn-I.”

²⁴ Adi bituah dŭ so dayung bŭkŭn inŭh Jael, adi sawŭn Heber daya Ken — dayung adi siabo bituah adi rŭŭ di bari.

²⁵ Sisera mite piin, pak Jael nggen sisuh di ayŭh; Jael taban yŭn-i kada krim darŭm makuk adi raru ramus.

²⁶ Ayŭh digen pagu bari di ndi tangan, ka pabā di tangan-i anŭ ndi; ayŭh maba pagu anŭ di ubak tura ka panding Sisera ka mape tikurok-i; ayŭh bada pagu anŭ tambus ubak-i.

²⁷ Ayŭh rabu sagan karŭb-i, tumbang ka radus sipŭŭb di kaja Jael. Di kaja Jael ayŭh rabu sagan karŭb-i ka tumbang; tumbang ka tana, kabŭs.

²⁸ Sindŭ Sisera nyingo so pinjan; ayŭh nŭkŭn tingga so kirarai pinjan, Ayŭh nang, “Mani krita kuda-i paŭh rambat mandŭg? Mani bara kuda-i paŭh sais mari?”

²⁹ Bara dayung adi nguan ayŭh adi raru bijak nam ayŭh, ka ayŭh pari pari nang di adŭp-i,

³⁰ “Ngara gi-aŭn jiroh kayuh adi re-i sirapas ka kutung, ndi puan kah duwŭh naan dayung yŭn barang naan soldadu, banang adi grua yŭn Sisera, adi birabuh kana yŭn tungo rani.”

³¹ Ngapŭi isa-i sopŭrŭg pinganyu Mai kabŭs mun anŭ, O TUHAN, pak isa-i sopŭrŭg jerā Mai nyirinyak mun batŭh andu makat! Ka rais anŭ darŭm damai sitŭkŭd pat puru sawa.