AKIM 4 - Hakcipta - Biatah Bidayuh

Deborah ngga Barak

¹ Ripas Ehud kabŭs, daya Israel bidosa rawan TUHAN.

² Jadi TUHAN bada ngara dog ngarah Jabin, adi raja daya Canaan adi mritah di kupo Hazor. Pingibās soldadu-i inŭh Sisera, adi rŭŭ di Harosheth-Hagoyim.

³ Jabin biyŭn prii ratus krita kuda adi dog ndai so basi, ka mritah daya Israel ngga gaok ka ganas sitian duwŭh puru sawa. Komŭnŭ daya Israel mite turung so TUHAN.

⁴ Deborah, adi sawŭn Lappidoth, inŭh nabi, ka ayŭh mbŭh jadi akim yŭn daya Israel di tika anŭ.

⁵ Ayŭh ari guru di ribo ndi tŭngŭn kurma di asah Ramah ngga Bethel di rais tarun tana sandah Ephraim, ka daya Israel ari di kamanŭ di dingah pinganang pitayan so ayŭh.

⁶ Agi ndi sidah ayŭh bagan Barak anak Abinoam so kupo Kedesh di Naphtali, ka nang di ayŭh, “TUHAN, adi Tapa Israel, mbŭh nggen pesan ati di kuu: ‘Taban simŭng ribu naan daya so tibaran-asar Naphtali ngga Zebulum ka nguru ngara ka Darŭd Tabor.

⁷ Aku re bada Sisera, adi pingibās soldadu Jabin, rawan kuu di Yang Kishon. Ayŭh re taban krita krita kuda ngga bara soldadu, pak Aku re nggen di kuu pimanang ngarah ayŭh.’ ”

⁸ Komŭnŭ Barak nam, “Aku an di kambŭi kaam di ngga aku, pak kambŭi kaam dŭh, aku dŭh gŭh an di.”

⁹ Ayŭh nam, “Sa-i, aku re di ngga kuu, pak kuu dŭh re dapu dŭn di pimanang anŭ, sabab TUHAN re nyerah Sisera ka tangan dayung.” Jadi Deborah matak di ka Kedesh ngga Barak.

¹⁰ Barak bagan tibaran-asar Zebulum ngga Naphtali da di ka Kedesh, ka simŭng ribu naan bara dari tunda ayŭh. Deborah sua matak ngga ayŭh.

¹¹ Di tika anŭ Heber adi daya Ken mbŭh pijog bari-i dŭh jo so Kedesh sindŭk tŭngŭn oak di Zanannim. Ayŭh mbŭh bipindah jo so bara daya Ken, adi bara sesang Hobab, adi sike dari Moses.

¹² Kan Sisera dingah Barak mbŭh di ka Darŭd Tabor,

¹³ ayŭh nguruk prii ratus krita kuda-i adi dog ndai so basi samŭn sopŭrŭg soldadu-i, ka pait ngara so Harosheth-Hagoyim ka Yang Kishon.

¹⁴ Komŭnŭ Deborah nang di Barak, “Panu! TUHAN agi ngga kuu! Andu ati Ayŭh mbŭh nggen di kuu pimanang ngarah Sisera.” Jadi Barak mūn so Darŭd Tabor ngga simŭng ribu naan soldadu-i.

¹⁵ Kan Barak nyerang ngga bara soldadu-i, TUHAN bada Sisera ngga bara krita kuda samŭn bara soldadu-i jadi kandang-kandŭ. Sisera mūn so krita kuda-i ka bikaduh bu.

¹⁶ Barak tadak krita krita kuda samŭn bara soldadu anŭ ndŭg Harosheth-Hagoyim, ka sopŭrŭg soldadu Sisera dog siŭ. Ndi naan mating gŭh dŭm.

¹⁷ Sisera bu ka bari Jael, sawŭn Heber adi daya Ken, sabab Raja Jabin di Hazor agi darŭm bidamai ngga rawang Heber.

¹⁸ Jael ruah di bidapŭd ngga Sisera ka nang di ayŭh, “Mŭrŭt, tuan; mŭrŭt ka darŭm bari ku. Dŭhnyah taru.” Jadi ayŭh mŭrŭt, ka Jael sukan ayŭh di punok tabir.

¹⁹ Ayŭh nang di Jael, “Turung nggen di aku piin adud; badŭh asŭng ku.” Jael kuka ndi bŭrŭh-kurit adi brisi ngga sisuh, nggen-i di ayŭh bada nok, ka pari sukan ayŭh.

²⁰ Komŭnŭ ayŭh nang di Jael, “Mijog di tiban bari, ka kambŭi agi daya mandŭg ka siken agi kah mating daya digiti, kidaan nang mating.”

²¹ Sisera mbŭh raru kawŭk ka-i bŭŭs, ka rasu rŭrŭ. Jael tambit pabā ngga ndi pagu bari, pirŭngŭt tudu ayŭh, ka ngga pabā anŭ ayŭh maba pagu anŭ di ubak tura ka panding-i, birambus ndŭg tana.

²² Kan Barak mandŭg jiroh Sisera, Jael ruah tudu ayŭh ka nang, “Mandŭg kamati! Aku an kiren di kuu daya adi kuu jiroh.” Jadi ayŭh mŭrŭt tunda ayŭh, ka kiris Sisera mbŭh gandar gandar di tana kabŭs, ngga pagu bari birambus di ubak-i.

²³ Di andu anŭ Tapa nggen di daya Israel pimanang ngarah Jabin, raja daya Canaan.

²⁴ Ngara nyerang ayŭh ndŭg ka ayŭh mbŭh makin ramah, ka pinŭbŭn-i ngara siŭ ayŭh.