AKIM 18 - Hakcipta - Biatah Bidayuh

Micah ngga Tibaran-Asar Dan

¹ Jadi, mating raja di Israel di jaman anŭ. Di jaman anŭ, daya tibaran-asar Dan aŭn jiroh tarun tana re-i ngaku ka yŭn rŭŭ, sabab ngara gibayuh trima utung tana mun tibaran tibaran-asar Israel adi bŭkŭn.

² Jadi daya tibaran-asar Dan mien rimŭh naan daya adi birani so sopŭrŭg rawang darŭm tibaran-asar anŭ ka pait ngara so kupo Zorah ngga Eshtaol bada nyiong tarun tana anŭ. Kan ngara mbŭh ndŭg rais tarun tana sandah Ephraim, ngara nyandong ramin Micah.

³ Sitadŭn ngara diginŭ, ngara natŭng piminyu bujang dari daya Levi anŭ; ka ngara di tudu ayŭh ka siken, “Ani ndai mu digiti? Asi taban kuu kamati?”

⁴ Ayŭh nam, “Aku mbŭh agi pekat-janji ngga Micah adi bayar gaji ku jadi imam-i.”

⁵ Ngara nang di ayŭh, “Turung siken di Tapa nang kah re mujur kah dŭh pimanu ami.”

⁶ Imam anŭ nam, “Mating ani ani re angān yŭn gapang. TUHAN agi kingat jaga angān di pimanu ngan.”

⁷ Jadi ngara anŭ adi rimŭh naan makat ka panu di ka kupo Laish. Ngara kiris pinyirŭŭ ngara diginŭ agi pagŭng mun pinyirŭŭ daya Sidon. Ngara daya adi udip bamai, dŭh bidudu, dŭh pinyikaii, ka biyŭn sopŭrŭg kayuh adi biguna-i. Ngara rŭŭ jo so daya Sidon ka dŭh bigaur ngga tadŭ tadŭ daya bŭkŭn.

⁸ Kan ngara adi rimŭh naan mbŭh pari ka Zorah ngga Eshtaol bara daya siken ani pinyidapŭd ngara so pimanu ngara.

⁹ “Ja meh,” ngara nam, “Ata di nyerang Laish. Kieh muko kiris tarun tana anŭ, ka-i mbŭh raru damŭn. Dŭhnyah paya paya rŭŭ digiti; rikas! Ata di sirabut tana anŭ!

¹⁰ Kan angān ndŭg nŭ, angān re kiris daya diginŭ dŭh puan kayuh adi re jadi. Rais anŭ raru bayah, ka-i biyŭn barang masam kayuh adi daya raan, ka Tapa mbŭh nggen-i di angān.”

¹¹ Jadi nŭm ratus naan daya so tibaran-asar Dan makat so Zorah ngga Eshtaol, sidia yŭn biperang.

¹² Ngara matak ka bibari di tura ka barat Kiriath Jearim di Judah. Anŭ sabab tarun anŭ gibabŭ dog kadŭn Bari Dan.

¹³ Ngara pijuu panu so nŭ ka mandŭg ka ramin Micah di rais tarun tana sandah Ephraim.

¹⁴ Komŭnŭ ngara adi rimŭh naan anŭ adi muko nyiong rais adi maning Laish nang di dingan-i, “Puan ngan kah darŭm ndi so dudu ramin ati, agi ndi tibudo kayuh adi bibarut ngga pirak? Agi gŭh dudu tibudo adi bŭkŭn ngga ndi efod. Ani meh sŭn ngan nang patut ata ndai?”

¹⁵ Jadi ngara di mŭrŭt ramin Micah, adi yŭn bujang dari daya Levi rŭŭ, ka siken munki pinyirŭŭ-i diginŭ.

¹⁶ Sitadŭn anŭ, bara soldadu daya tibaran-asar Dan adi nŭm ratus naan anŭ, adi mbŭh sidia yŭn biperang, agi mijog di tiban buwang ramin anŭ.

¹⁷ Pinyiong anŭ adi rimŭh naan radus mŭrŭt ramin anŭ ka tambit tibudo kayuh adi bibarut ngga pirak, tibudo tibudo adi bŭkŭn, ngga efod anŭ, sitadŭn imam mijog di tiban buwang ngga bara soldadu bisinyata adi nŭm ratus naan anŭ.

¹⁸ Kan bara pinyiong anŭ mŭrŭt ka darŭm ramin Micah ka tambit kayuh kayuh kudus anŭ, imam anŭ siken ngara, “Ani anŭ ndai ngan?”

¹⁹ Ngara nang di ayŭh, “Pirŭŭ adŭp nŭh. Dŭhnyah nang ani ani. Matak ngga kieh ka jadi imam ka tukang pitayan yŭn ami. Dŭh kah kuu raan dŭ jadi imam yŭn sopŭrŭg tibaran-asar Israel so mu jadi imam yŭn rawang daya ndi naan?”

²⁰ Anŭ bada imam anŭ raru gaŭn, ka-i tambit kayuh kayuh anŭ ka panu tunda ngara.

²¹ Komŭnŭ ngara pijuu pimanu ngara, ngga bara anak anak ngara, dāng kudip ngara, ka ngga sopŭrŭg buat-rata ngara, diŭ di tura ka jawin.

²² Ngara mbŭh panu mua juan-i so ramin anŭ kan Micah ngaja bara rasū-i di nyerang ngara. Micah ngga bara-i nyandat bara daya Dan,

²³ ka nyirais di ngara. Bara daya Dan bigiring ka siken Micah, “Ani har? Mani angān mbŭh raru bagŭ mun anŭ?”

²⁴ Micah nam, “Ani rati pinganang ngan anŭ? ‘Ani har?’ Angān tambit imam ku ngga tapa tapa adi adŭp ku mbŭh ndai, ka rasu bu! Ani agi dŭm yŭn ku!”

²⁵ Bara daya Dan nang di ayŭh, “Kana dŭ kuu dŭhsah nang ani ani, kambŭi kuu dŭh raan ngara ati baji di kuu ka nyerang kuu. Kuu ngga sopŭrŭg di rawang mu abo kabŭs rai-i.”

²⁶ Komŭnŭ bara daya Dan pijuu pimanu ngara. Micah kiris ngara bake dŭ so adŭp-i; sabab anŭ ayŭh pari maad ka ramin adŭp-i.

^27-28 Ripas bara daya Dan muko tambit imam anŭ ngga kayuh kayuh adi Micah muko ndai, ngara di nyerang Laish, kupo daya adi bamai, daya adi dŭh bidudu, adi samah di rubān anŭ ngga kupo Bethrehob. Ngara siŭ bara daya adi rŭŭ di kupo anŭ ka sigot kupo anŭ. Mating daya mandŭg di turung ngara, amai Laish mbŭh raru jo so Sidon, ka ngara dŭh gŭh bigaur ngga tadŭ tadŭ daya bŭkŭn. Daya Dan pari pijog kupo anŭ ka rŭŭ diginŭ.

²⁹ Ngara nukar dŭn Laish ka kadŭn-i Dan, tarik dŭn babuk ngara Dan, adi anak Jacob.

³⁰ Bara daya Dan pijog tibudo anŭ yŭn nyambah, ka Jonathan, adi anak Gershom ka sukuh Moses, jadi imam yŭn bara daya Dan, ka bara sesang-i jadi imam ngara ndŭg ka andu adi ngga bangsa ngara dog nakap ka dog taran ka rais tami.

³¹ Tibudo adi Micah ndai gibabŭ diginŭ sitian Bari adi yŭn Tapa dog nyambah babŭ mijog di Shiloh.