AKIM 16 - Hakcipta - Biatah Bidayuh

Samson di Gaza

¹ Ndi andu Samson di ka kupo daya Philistine di Gaza, di yŭn-i bidapŭd ngga ndi naan dayung sundar, ka nyibŭŭs ngga ayŭh.

² Daya daya di Gaza dingah Samson agi diginŭ, jadi ngara kirurung tarun anŭ ka tuman ayŭh ndi ngarŭm ngarŭm di tiban-bās kupo. Ngara pirŭngŭt ndi ngarŭm ngarŭm buang bipikir dupan adŭp ngara, “Ata kajŭn ndŭg siri jawa, komŭnŭ ata siŭ ayŭh.”

³ Pak Samson diginŭ ndŭg sitŭrŭp ngarŭm adŭ. Komŭnŭ ayŭh makat ka di dimbut tiban-bās kupo, sopŭrŭg-i samŭn uros uros ngga parang abŭt-i. Ayŭh na sopŭrŭg-i di kawin-i ka gŭrŭng-i ngga bu jeh ndŭg tibung sandah adi nura Hebron.

Samson ngga Delilah

⁴ Ripas anŭ, Samson awang ndi naan dayung dŭn Delilah, adi rŭŭ di Rubān Sorek.

⁵ Rimŭh naan raja Philistine di tudu Delilah ka nang, “Nyikuro Samson isa ayŭh kidaan di kuu mani ayŭh raru bake, ka simuki kieh bisa ngarah ayŭh, muak ayŭh, ka bada ayŭh dŭh dapŭd ndai ani ani. Barang naan kieh re nggen di kuu siribu siratus kiping pirak.”

⁶ Jadi Delilah nang di Samson, “Turung kidaan di aku ani bada kuu raru bake. Kambŭi daya an muak kuu ka bada kuu dŭh dapŭd ndai ani ani, ani patut-i ndai?”

⁷ Samson nam, “Kambŭi daya muak aku ngga ju tŭngŭn taris panah adi bauh adi gibayuh pisŭk, aku bisa jadi ramah mun daya bŭkŭn.”

⁸ Jadi raja raja Philistine taban ju taris bawŭh panah adi gibayuh pisŭk, ka Delilah muak Samson ngga taris anŭ.

⁹ Ayŭh muko bada kada daya kajŭn di darŭm birit adi bŭkŭn, jadi ayŭh nyirais nang, “Samson! Bara daya Philistine mandŭg!” Pak Samson matŭd adŭ taris taris bawŭh panah anŭ mun tiburi patŭd kan-i dog jireb apui. Jadi gibayuh meh ngara puan rusia pinyibake-i.

¹⁰ Delilah nang di Samson, “Tingga, kuu bada aku mun daya budo; kuu dŭh kidaan kayuh adi sawŭ di aku. Turung kidaan di aku simuki daya bisa muak kuu.”

¹¹ Samson kidaan di ayŭh, “Kambŭi daya muak aku ngga taris bauh adi gibayuh dog pakai, aku bisa jadi ramah mun daya bŭkŭn.”

¹² Jadi Delilah tambit kada taris adi bauh ka muak Samson. Komŭnŭ ayŭh nyirais, “Samson! Bara daya Philistine mandŭg!” Bara daya anŭ agi kajŭn di birit adi bŭkŭn. Pak ayŭh matŭd adŭ dudu taris anŭ so tangan-i mun matŭd tiburi.

¹³ Delilah nang di Samson, “Kuu gibabŭ ndai aku mun daya budo, amai kuu gibabŭ dŭh kidaan kayuh adi sawŭ di aku. Kidaan di aku simuki daya bisa muak kuu.” Samson kidaan di ayŭh, “Kambŭi kuu nganyam so-ju sarat ubok ku di sinangan tanun ka nyisŭt ngga pagu sinangan, aku bisa jadi ramah mun daya bŭkŭn.”

¹⁴ Jadi Delilah bada ayŭh bŭŭs, tambit so-ju sarat ubok-i ka nganyam-i di sinangan tanun ka nyisŭt-i ngga pagu sinangan, ka nyirais nang, “Samson! Daya Philistine mandŭg!” Pak Samson burah ka tarik pirudos ubok-i so sinangan.

¹⁵ Jadi ayŭh nang di Samson, “Simuki kuu bisa nang adŭp mu awang aku, kan di atin mu kuu dŭh sawŭ? Kuu mbŭh bada aku mun daya budo pitaruh kari, ka kuu gibabŭ dŭh kidaan di aku ani anŭ adi bada kuu raru bake.”

¹⁶ Barang andu ayŭh dŭh rŭŭ rŭŭ siken ayŭh ndŭg ka Samson mbŭh kawŭk ka reju dingah ayŭh nang anŭ anŭ;

¹⁷ ngga pinŭbŭn-i ayŭh mbŭh kidaan adŭ ani anŭ adi bada ayŭh raru bake: “Ubok ku gi-bŭn dog kapŭg,” ayŭh nang. “Aku ati mbŭh dog nitah ka Tapa jadi daya Nazir so andu aku dog biranak. Kambŭi ubok ku dog kapŭg, pinyibake ku manyap, ka aku jadi ramah mun daya bŭkŭn.”

¹⁸ Kan Delilah kiris Samson mbŭh kidaan rusia-i, ayŭh pait pinganang ka raja raja daya Philistine ka nang, “Pari dŭm ndi sidah. Ayŭh muko kidaan rusia-i di aku.” Jadi ngara mandŭg ka taban duit adi ngara ko janji.

¹⁹ Delilah bada Samson bŭŭs di kŭkŭn-i, ka bagan ndi naan daya, adi kapŭg so-ju sarat ubok Samson. Komŭnŭ Delilah rasu pijera Samson, amai ayŭh mbŭh dŭh tia bake.

²⁰ Komŭnŭ ayŭh nyirais, “Samson! Bara daya Philistine mandŭg!” Samson burah ka bipikir, “Aku re pirupas adŭp ku mun adi barang nga-i.” Ayŭh dŭh puan nang TUHAN mbŭh tingge adŭp-i.

²¹ Daya Philistine nakap ayŭh ka tuket so-duwŭh ruwang batŭh-i. Ngara taban ayŭh ka Gaza, nyirunggo ayŭh ngga parik timaga, ka bada ayŭh ndai kraja ngisar di yŭn ngisar di ramin jer.

²² Pak ubok-i piguru timbu dinge.

Pinyikabŭs Samson

²³ Bara raja daya Philistine mandŭg tikuruk ka kuka gawai ka jugan sadis bās ka tapa ngara, Dagon. Ngara biragu, “Tapa ta mbŭh nggen di ata pimanang ngarah pinganyu ta Samson!”

^24-25 Ngara nyipawŭn adŭp ngara, ka nang, “Bagan Samson, ka bada ayŭh ndai rubi yŭn ta!” Kan ngara taban Samson ruah so ramin jer, ngara bada ayŭh ndai rubi yŭn ngara, ka bada ayŭh mijog di asah duwŭh tiang bās. Kan bara daya kiris ayŭh, ngara biragu muji tapa ngara: “Tapa ta mbŭh nggen di ata pimanang ngarah pinganyu ta, adi ko pirusak tarun tana ta ka siŭ bagŭ daya ta!”

²⁶ Samson nang di ndi naan anak dari adi kayak ayŭh, “Bada aku tama tiang tiang anŭ adi nukang ramin ati. Aku an minyandis dieh.”

²⁷ Ramin anŭ mbŭh puno bada bara daya, dari ngga dayung. So-rimŭh raja daya Philistine agi diginŭ, ka agi taruh ribu naan dari dayung di tibung ramin, tingga Samson ndai rubi-i yŭn ngara.

²⁸ Komŭnŭ Samson bidua, “TUHAN Raja, turung ingat meh aku; turung O Tapa, nggen pinyibake di aku dŭm ndi sidah ati adŭ, isa ngga ndi pingandai ku adi re ku ndai aku dapŭd maras daya Philistine adi muko tuket ruwang batŭh ku.”

²⁹ Jadi Samson na so-duwŭh tangan-i di so-duwŭh tiang bās adi nukang ramin anŭ; ndi tangan di ndi tiang, ayŭh turak-i bada nyatŭk ngara,

³⁰ ka nyirais, “Bada aku kabŭs ngga daya Philistine!” Ayŭh turak ngga siabo tungang-i, ka ramin anŭ rubuh nyatŭk so-rimŭh raja anŭ ngga barang naan daya adi bŭkŭn. Samson siŭ bagŭ dŭ daya di pinyikabŭs-i so anŭ adi siŭ-i darŭm-i gibabŭ udip.

³¹ Bara jurud dari-i ngga sopŭrŭg adi bŭkŭn so rawang-i mandŭg di tambit tadang-i. Ngara taban ayŭh ngga mari ka kubur ayŭh di asah Zorah ngga Eshtaol di darŭm kubur sama-i Manoah. Ayŭh jadi pinguru Israel sitian duwŭh puru sawa.