AKIM 11 - Hakcipta - Biatah Bidayuh

¹ Jephthah, ndi naan soldadu adi pagan, inŭh anak so dayung sundar. Sama-i so Gilead

² biyŭn anak anak dari adi bŭkŭn so sawŭn-i, ka kan ngara mbŭh baga, ngara takan Jephthah bada bu so arŭn. Ngara nang di ayŭh, “Kuu dŭh bisa dapŭd ani ani utung so sama ami; kuu anak so dayung bŭkŭn.”

³ Jephthah bu so yŭn bara jurud-i ka rŭŭ di tarun tana Tob. Diginŭ ayŭh nguruk tibaran daya adi dŭh biguna, ka di mirupak ayō ayŭh.

⁴ Mua tian-i ripas anŭ daya Ammon matak biperang rawan Israel.

⁵ Kan kayuh jadi simŭnŭ, bara pinguru Gilead di tambit Jephthah pari so tarun tana Tob.

⁶ Ngara kidaan di ayŭh, “Mandŭg ka jadi pinguru ami, isa kieh tungang rawan daya Ammon.”

⁷ Pak Jephthah nam, “Angān ko ruai tiru di aku ndŭg ka angān takan aku bada bu so ramin sama ku. Mani mandŭg tudu aku madin, yŭn angān mbŭh dog pinyusah?”

⁸ Ngara nang di Jephthah, “Kieh madin nyigura kuu sabab kieh raan kuu sua ngga kieh di rawan daya daya Ammon ka mritah sopŭrŭg daya di Gilead.”

⁹ Jephthah nang di ngara, “Kambŭi angān taban aku mari da rawan daya daya Ammon ka TUHAN nggen di aku pimanang, aku re jadi pimritah ngan.”

¹⁰ Ngara nam, “Kieh situju. TUHAN inŭh saksi ami.”

¹¹ Jadi Jephthah di ngga bara pinguru Gilead, ka bara daya bada ayŭh jadi pimritah ngga pinguru ngara. Jephthah piruah pinganang janji-i di sirung jawin TUHAN di Mizpah.

¹² Komŭnŭ Jephthah pait pinyisung-i ka raja daya Ammon bada nang, “Ani kaii mu ngga kieh? Mani kuu nyerang rais ami?”

¹³ Raja daya Ammon nam pinyisung Jephthah, “Di tika bara daya Israel ruah so Egypt, ngara tambit tana ku so Yang Arnon ndŭg Yang Jabbok ngga Yang Jordan. Madin angān dŭh siŭn dŭh pari-i ngga aran damai.”

¹⁴ Jephthah pait bara pinyisung pari ka raja daya Ammon

¹⁵ ngga pinyinam sakati: “Dŭh-i sawŭ daya Israel adi tambit tana Moab bait tana Ammon.

¹⁶ Simuti inŭh ayŭh: di tika bara daya Israel ruah so Egypt, ngara panu so tarun tana-pajam di ka Tanjung Aqaba ka tambus Kadesh.

¹⁷ Komŭnŭ ngara pait pinyisung ka raja di Edom bada mite pinyibandar yŭn panu mutas tarun tana-i. Pak raja di Edom dŭh nyibandar ngara. Ngara agi gŭh mite so raja Moab, pak ayŭh dŭh gŭh nyibandar ngara panu mutas tarun tana-i. Ngapŭi bara daya Israel rŭŭ di Kadesh.

¹⁸ Komŭnŭ ngara pijuu panu mutas tarun tana-pajam, nganing tarun tana Edom samŭn tarun tana Moab ndŭg ka ngara tambus tura ka timor Moab, di pah mandi Yang Arnon. Ngara bibari diginŭ, pak ngara dŭh mutas Yang Arnon sabab-i mbŭh baat tana Moab.

¹⁹ Komŭnŭ daya Israel pait pinyisung ka Sihon, daya Amor adi raja di Heshbon, ka mite ayŭh pinyibandar ngara mutas rais-i yŭn mŭrŭt tarun tana adŭp ngara.

²⁰ Pak Sihon dŭh nyibandar Israel ndai simŭnŭ. Ayŭh taban sopŭrŭg bara soldadu-i, bibari di Jahaz, ka nyerang Israel.

²¹ Pak TUHAN, adi Tapa Israel, nggen pimanang di daya Israel, ngarah Sihon ngga bara soldadu-i. Jadi daya Israel dapu sopŭrŭg tarun tana daya Amor adi rŭŭ di rais anŭ.

²² Ngara ngisi sopŭrŭg tarun tana daya Amor so Arnon di tura ka siratan ndŭg Jabbok di tura ka utara ka so tarun tana-pajam tura ka timor ndŭg Jordan tura ka barat.

²³ Jadi TUHAN, adi Tapa Israel, inŭh adi pibu daya daya Amor yŭn daya-I, bara daya Israel.

²⁴ Kuu re suba tambit-i pari kah? Kuu bisa nyikŭn sopŭrŭg kayuh adi Chemosh tapa ngan mbŭh nggen di angān. Pak kieh taŭn re dapu sopŭrŭg anŭ adi TUHAN, Tapa ami, mbŭh tambit yŭn ami.

²⁵ Kuu pikir adŭp mu kana dŭ so Balak anak Zippor, adi raja daya Moab kah? Ayŭh gi-bŭn natang Israel, dŭh kah? Agi kah ayŭh matak biperang rawan kieh?

²⁶ Mbŭh sitian taruh ratus sawa Israel rŭŭ di Heshbon ngga Aroer, ka di anak anak kupo adi maning-i, ka sopŭrŭg kupo di tabing Yang Arnon. Tian-ti mani kuu dŭh tambit-i pari?

²⁷ Dŭh, aku gi-mating ndai sarah di kuu. Kuu inŭh adi sarah darŭm kuu an biperang ngga aku. TUHAN inŭh akim. Ayŭh re natu andu ati asi adi sarah, daya Israel puan kah daya Ammon.”

²⁸ Pak raja daya Ammon dŭh mbit piduri di pinganang anŭ so Jephthah.

²⁹ Komŭnŭ roh TUHAN nguasa Jephthah. Ayŭh di mutas Gilead ngga Manasseh ka pari ka Mizpah di Gilead ka radus panu ka Ammon.

³⁰ Jephthah bijanji ngga TUHAN: “Kambŭi Kaam nggen di aku pimanang ngarah daya Ammon,

³¹ aku re badang ndu sadis sibungas daya adi ruah so ramin ku adi nyupat aku mari so pimanang ku. Aku re jugan ndu sadis ka Kaam daya anŭ.”

³² Jadi Jephthah mutas sungi anŭ di rawan daya Ammon, ka TUHAN nggen di ayŭh pimanang.

³³ Ayŭh nyerang ngara piguru so Aroer ndŭg gadung tarun adi maning Minnith; duwŭh puru kupo sopŭrŭg-i, jeh ndŭg Abel Keramim. Bagŭ raru daya Ammon dog siŭ, ka dog ngarah Israel.

Anak dayung Jephthah

³⁴ Kan Jephthah pari, mari ka Mizpah, anak dayung-i ruah di nyupat ayŭh, bitanda buang mambak tamburin. Ayŭh anŭ kaŭs-i ndi anak-i.

³⁵ Kan Jephthah kiris ayŭh, ayŭh nyiratak piraka-i darŭm susah buang nang, “O Anak dayung ku! Kuu kinaman atin ku? Mani gŭt-i dŭh siŭn dŭh kuu adi kinaman atin ku? Aku mbŭh bipayu ngga TUHAN, ka aku dŭh bisa tarik-i pari!”

³⁶ Anak dayung anŭ kidaan di ayŭh, “Kambŭi kaam mbŭh ndai payu ngga TUHAN, ndai adŭ di tunduh ku kayuh adi kaam muko nang, amai sawŭ gŭh TUHAN mbŭh bada kaam maras pinganyu mai, daya Ammon.”

³⁷ Ayŭh nang dinge di sama-i, “Ndi adŭ kayuh mite ku so kaam. Tandah aku sitian duwŭh buran, isa aku bisa bigandon ngga bara dingan ku di gadung darŭd ka ngurid adŭp ku dŭh siŭn dŭh kabŭs gibabŭ dayung tibŭn.”

³⁸ Sama-i bada ayŭh di sitian tipuh duwŭh buran. Ayŭh ngga bara dingan-i di maad darŭd darŭd ka ngurid adŭp-i re kabŭs bayuh banan ka dŭh biyŭn anak.

³⁹ Ripas duwŭh buran anŭ, ayŭh pari ka yŭn sama-i. Sama-i ndai nimun adi-i ko bijanji ngga TUHAN, ka ayŭh kabŭs darŭm-i gibabŭ dayung tibŭn. Simŭnŭ meh adat anŭ piguru di Israel,

⁴⁰ bara dayung Israel ari ruah yŭn tipuh pat andu barang sawa di ngurid anak dayung Jephthah so Gilead.