3 JOHN 1 - Hakcipta - Biatah Bidayuh

¹ So aku Nyamba Eklisia, nuju dingan ku Gaius adi aku rindu.

² Dingan adi aku rindu, aku simayang mite sopŭrŭg kayuh tirase di kuu ka mite kuu bua sanang, nimun adi mbŭh aku puan kuu agi sanang darŭm roh.

³ Aku agi raru gaŭn kan kada daya Kristen mandŭg ka kidaan di aku munki masam tŭtŭd kuu di Tapa, nimun kuu taŭn siraru udip darŭm nundok di ajar-I.

⁴ Mating kayuh bŭkŭn adi bisa bada aku gaŭn adŭ-i agah pasar bara anak ku adi udip darŭm nundok di ajar Tapa.

Gaius Dog Muji

⁵ Dingan adi aku rindu, kuu mbŭh raru tŭtŭd di kraja mu yŭn bara daya Kristen adi bŭkŭn; simŭnŭ gŭh kuu di andu kuu bayuh natŭng ngara.

⁶ Ngara agi minyu di bara daya eklisia digiti pasar pinyirindu mu. Aku mite kuu turung ngara pijuu pimanu-i nanyam ka adi pimunos asŭng Tapa.

⁷ Amai ngara mbŭh matak di nyuse agah pasar Kristus, ka abah-i kambat pinurung so bara daya adi dŭh sabah di Tapa.

⁸ Ata daya Kristen, dŭh siŭn dŭh an turung ngara, isa darŭm ata ndai simŭnŭ ata bisa dapŭd kraja samah ngga ngara darŭm nyuse ajar Tapa.

Diotrephes ngga Demetrius

⁹ Aku agi nuris surat adi purok nuju eklisia; pak Diotrephes, adi gruwŭn adŭp-i jadi pinguru ngara, dŭh an piduri kayuh adi nang ku.

¹⁰ Kan aku mandŭg te, aku re kidaan sopŭrŭg kayuh adi-i ko ndai: pinganang arap-i pasar ata samŭn pinganang kadong-i! Pak dŭh-i anŭ adŭ; ayŭh abah kambat daya Kristen kan ngara mandŭg, ndŭg ka nagah daya adi raan kambat ngara, buang suba an pibu ngara so eklisia!

¹¹ Dingan adi aku rindu, dŭhnyah nanya urah adi arap, pak nanya meh urah adi kana. Asi asi adi ndai kana mbŭh daya Tapa; asi asi adi ndai arap dŭh-i kiris Tapa.

¹² Barang naan daya nganju Demetrius; adŭp Tapa gŭh muji ayŭh. Ka kieh nambah ngga taksi ami, ka angān puan nang kayuh adi kieh nang agi sawŭ.

Pinŭbŭn Surat ngga Pinganang Tabi

¹³ Bagŭ kayuh an ku nang di kuu, pak aku dŭh an pakai surat.

¹⁴ Aku harap aku rikas dapŭd kuu, ka nganŭ ata bisa minyu pasar-i.

¹⁵ Damai ka angān. Sopŭrŭg dingan mu digiti pait tabi. Nggen tabi ku di sopŭrŭg dingan ta diginŭ.