2 TIMOTHY 2 - Hakcipta - Biatah Bidayuh

Soldadu Kristus adi Tŭtŭd

¹ Ka kuu, anak ku, jadi tagap meh ngga pinyirasi-mandis adi mbŭh tung jata darŭm ata udip ndi ngga Kristus Jesus.

² Taban ajar adi kuu ko dingah aku piagah di sirung jawin bagŭ saksi, ka mbas pasan-i di tangan daya adi bisa dog harap, adi bisa ngajar daya bŭkŭn gŭh.

³ Kuu gŭh patut sua jera, nimun soldadu Kristus Jesus adi tŭtŭd.

⁴ Soldadu adi aŭn ndai kraja-i raan pimunos asŭng pingubak-i. Abah ayŭh jiroh kraja bŭkŭn.

⁵ Daya adi tukang birumba, dŭh-i tungang dapŭd upah manang birumba kambŭi ayŭh dŭh tunda atur birumba.

⁶ Tukang-teya adi bandar nyiraja inŭh adi patut dapŭd sibungas utung so buwa adi dog sun.

⁷ Nakit pikir kayuh adi aku nang, amai Tuhan inŭh adi re bada kuu mirati sopŭrŭg-i.

⁸ Ingat Jesus Kristus, adi mbŭh dog pakat so kabŭs, adi adŭp-I sesang David, nanyam adi dog ngajar darŭm Agah Kana adi aku nyuse.

⁹ Sitagar aku nyuse Agah Kana, aku sangsara ndŭg ka ko dog muak ngga parik basi mun adi ko ndai sarah. Pak pinganang Tapa dŭh darŭm buak.

¹⁰ Ngapŭi aku nyijŭn sopŭrŭg-i yŭn kana bara daya adi Tapa mbŭh mien, siŭn ngara dapŭd pinyiramat adi mandŭg so ka Kristus Jesus samah ngga bragah adi tan adu adu.

¹¹ Ati inŭh pinganang adi sawŭ: “Kambŭi ata mbŭh kabŭs ngga Ayŭh, ata gŭh re udip ngga Ayŭh.

¹² Kambŭi ata bijijŭ ngga atin tŭtŭd, ata gŭh re mritah ngga Ayŭh. Kambŭi ata miman Ayŭh, Ayŭh gŭh re miman ata.

¹³ Kambŭi ata dŭh tŭtŭd, Ayŭh babŭ tŭtŭd, sabab Ayŭh dŭh bisa miman adŭp-I.”

Daya adi Nyiraja adi dog Muji

¹⁴ Bada daya mu ingat anŭ, ka bakan ngara di sirung jawin Tapa da dŭh bikaii pasar bang piminyu. Kaii dŭh-i biguna, pak pirusak daya adi dingah.

¹⁵ Ngga sibisa bisa mu jiroh puji so Tapa, nimun daya adi nyiraja adi dŭh mangŭh ngarun kraja-i. Kuu patut ngajar ajar adi sawŭ adi so Tapa ngga batur-i.

¹⁶ Pijo adŭp mu so kirakar adi kais ka adi sipadin; kayuh adi mun anŭ batur-i bada daya rabis jo so Tapa.

¹⁷ Ajar adi mun anŭ mbŭh keya ka gadag adi man isin daya. Duwŭh naan daya adi mbŭh ngajar kayuh anŭ inŭh Hymenaeus ngga Philetus.

¹⁸ Ngara mbŭh miriseu so ajar adi sawŭ ka mbŭh pirusak pinyabah kada ngara adi sabah di Kristus ngga ajar ngara adi nang pinyimakat so kabŭs mbŭh ripas.

¹⁹ Pak pinagap-rasan adi tagap anŭ adi Tapa ko na dŭh dapŭd dog ngugoh; ka di tunduh pimŭnŭs anŭ agi dog nuris sakati: “Tuhan puan bara daya adi-I dapu” ka “Ngara adi nang adŭp-i mbŭh dog dapu Tapa dŭh siŭn dŭh taran pingandai sarah.”

²⁰ Darŭm tibande ramin agi pinggen makuk adi barang masam-i: agi dog ndai so pirak ngga mas, adi bŭkŭn dog ndai so kayuh ka tana-riyat; kada-i yŭn andu bās, kada-i yŭn andu biasa.

²¹ Ngara adi bada adŭp-i bisig so sopŭrŭg kayuh adi arap anŭ, re dog guna yŭn tujuan adi bragah, sabab ngara mbŭh nyerah adŭp-i yŭn guna Tuan-i, sidia an dog pakai yŭn sopŭrŭg pingandai kana.

²² Pijo adŭp mu so pinyiripong daya adi gibabŭ mara, ka jiroh pinŭnggŭn, pinyabah, pinyirindu, ka damai, samah ngga ngara adi ngga atin bisig-i bagan Tuhan yŭn mite turung.

²³ Pijo adŭp mu so karit adi sipadin ngga adi dŭh biguna; kuu puan pinŭbŭn-i kaii.

²⁴ Nimun urun Tuhan kuu dŭh siŭn bikaii. Kuu dŭh siŭn dŭh an mandis ngga daya; nimun gurū adi kana buang sabar,

²⁵ kuu an duduh darŭm kuu ngika ka ngajar daya adi matah kuu; amai sawŭ, nŭŭh dŭh puan kadŭ Tapa re nggen di ngara aran ngga marik pimudip ngara pari ka adŭp-I ka natŭng ajar adi sawŭ.

²⁶ Ka ngara re ngubah adŭp-i ka pirupas adŭp-i so pirakap Siarap, adi ko nakap ngara da tunda pinyiraan adŭp-i.