2 SAMUEL 8 - Hakcipta - Biatah Bidayuh

Pimanang David darŭm Biperang

¹ Mua tian ripas anŭ Raja David nyerang daya Philistine dinge, ngarah ngara, ka sirabut tana ngara.

² Komŭnŭ ayŭh ngarah daya Moab. Ayŭh bada daya daya-takap guring di tana ka siŭ duwŭh naan so barang taruh naan ngara. Jadi daya Moab trima ayŭh jadi raja ngara ka bayar suke di ayŭh.

³ Komŭnŭ ayŭh ngarah Hadadezer anak Rehob, raja di Zobah di rais Syria. Di tika anŭ Hadadezer aŭn matak re pari nguasa tarun tana tura ka sijo Yang Euphrates.

⁴ David nakap 1,700 naan soldadu-i adi pinunggang kuda ka 20,000 naan soldadu-i adi panu kaja. Ayŭh bada bajang sopŭrŭg kuda adŭ-i anŭ adi sadang kiang-i ngga tarik siratus krita kuda.

⁵ Kan bara daya Syria so Damascus pait ndi bara tibaran soldadu bada turung Raja Hadadezer, David nyerang ngara ka siŭ 22,000 naan ngara.

⁶ Komŭnŭ ayŭh pijog bari bara soldadu di tarun tana ngara, ka ngara trima ayŭh jadi raja ngara ka bayar suke di ayŭh. TUHAN bada David manang biperang di barang yŭn.

⁷ David tambit dudu pinangin mas bara pinurung Hadadezer ka taban-i ka Jerusalem.

⁸ Ayŭh tambit gŭh raru bagŭ kiang timaga so Betah ngga Berothai, kupo kupo adi dog mritah Hadadezer.

⁹ Raja Toi di Hamath dingah David muko ngarah sopŭrŭg bara soldadu Hadadezer.

¹⁰ Jadi ayŭh pait anak-i Joram bada tabi Raja David ka nganju ayŭh amai pimanang-i ngarah Hadadezer, adi taŭn tian-ti ari biperang gŭh ngga ayŭh. Joram taban ka yŭn David pinganggen adi dog ndai so mas, pirak, ka timaga.

¹¹ Raja David nitah sopŭrŭg-i yŭn dog pakai di tika simayang, samŭn pirak ngga mas adi-i tambit so bangsa bangsa adi-i ko ngarah —

¹² mun Edom, Moab, Ammon, Philistia, ngga Amalek, simŭnŭ gŭh kada kayuh adi-i ko sirapas so Hadadezer.

¹³ David jadi rabis timagah di andu ayŭh pari ko siŭ 18,000 naan daya Edom di Rubān Garo.

¹⁴ Ayŭh pijog bari bara soldadu di ndi tarun tana Edom, ka bara daya diginŭ trima ayŭh jadi raja ngara. TUHAN bada David manang biperang di barang yŭn-i.

¹⁵ David mritah di ndi tarun tana Israel ka natu sopŭrŭg rayat-i dog sita brinyam ka ngga tŭnggŭn.

¹⁶ Joab, Zeruiah adi sindŭ-i, inŭh pingibās bara soldadu; Jehoshaphat anak Ahilud inŭh tukang jaga rekod;

¹⁷ Zadok anak Ahitub ngga Ahimelech anak Abiathar jadi imam; Seraiah jadi tukang pinuris;

¹⁸ Benaiah anak Jehoiada jadi pingubak bara pingibān David; ka bara anak David jadi imam.