2 SAMUEL 7 - Hakcipta - Biatah Bidayuh

Pinganang Nathan yŭn David

¹ Raja David rŭŭ di Istana-i, ka TUHAN grindung ayŭh so sopŭrŭg pinganyu-i.

² Komŭnŭ raja nang di nabi Nathan, “Tingga, aku rŭŭ di ramin dog ndai so kayuh sedar, pak Pati Simanya Tapa dog nyikŭn darŭm bari!”

³ Nathan nam, “Ndai tadŭ tadŭ kayuh adi kaam raan, sabab TUHAN agi ngga kaam.”

⁴ Pak ngarŭm anŭ TUHAN nang di Nathan,

⁵ “Panu di kidaan di urun Ku David nang Aku nang di ayŭh, ‘Dŭh-i kuu adi re pijog ramin yŭn Ku.

⁶ So jaman Aku pirupas daya Ku Israel so Egypt ndŭg madin, Aku bŭn rŭŭ di ramin; Aku bigandon, Aku rŭŭ di bari.

⁷ Di tipuh Aku bigandon ngga bara daya Ku Israel Aku bŭn siken tadŭ tadŭ pinguru adi Aku muko mien mani ngara bŭn pijog yŭn Ku ramin adi dog ndai so kayuh sedar.’

⁸ “Jadi kidaan di urun Ku David nang Aku, adi TUHAN Bisa-pŭrŭg, nang di ayŭh, ‘Aku tambit kuu so yŭn mu kingat biri di arong teya ka bada kuu jadi pimritah yŭn bara daya Ku Israel.

⁹ Aku agi ngga kuu di barang ka yŭn mu mbŭh di, ka Aku muko ngarah sopŭrŭg pinganyu mu di barang saba kuu nyurong di nyerang. Aku re bada kuu timagah mun pinguru pinguru adi bās di ong.

^10-11 Aku mbŭh mien tarun yŭn bara daya Ku Israel ka mbŭh bada ngara rŭŭ diginŭ, di yŭn ngara dŭh re tia dog kinanyuh. So sibungas ngara mŭrŭt tarun tana anŭ, ngara ari dog nyerang bara daya adi ganas, pak-i dŭh re tia mun anŭ. Aku bijanji Aku re grindung kuu so sopŭrŭg pinganyu mu ka re nggen di kuu sesang.

¹² Kan kuu kabŭs ka dog kubur ngga bara tayung-babuk mu, Aku re bada ndi so bara anak mu jadi raja ka re bada pritah-i tagap.

¹³ Ayŭh inŭh adi re pijog ramin yŭn Ku, ka Aku re natu takta-i re tan adu adu yŭn barang turap sesang-i.

¹⁴ Aku re jadi Sama-i, ka ayŭh re jadi anak Ku. Kan ayŭh ndai sarah, Aku re ngukum ayŭh nimun sama ngukum anak-i.

¹⁵ Pak Aku dŭh re ko batu ayŭh mun Aku ko batu Saul, adi Aku kadi isa kuu dapŭd jadi raja.

¹⁶ Kuu re adu adu biyŭn bara sesang, ka Aku re bada pritah mu tan adu adu. Taris asar pinyipritah mu re dŭh mungan.’ ”

¹⁷ Nathan kidaan di David sopŭrŭg kayuh adi Tapa ko pinandŭng di ayŭh.

Dua Trima Kaseh David

¹⁸ Komŭnŭ David di ka Bari TUHAN, guru ka bidua, “TUHAN Raja, aku dŭh sukup kana yŭn sopŭrŭg kayuh adi Kaam mbŭh ndai di aku, simŭnŭ gŭh rawang ku.

¹⁹ Madin tanŭ ka Kaam mbŭh ndai rabis so anŭ, TUHAN raja; Kaam mbŭh bijanji pasar bara sesang ku yŭn sawa sawa adi re. Ka Kaam mbŭh bada ndi naan daya kiris kayuh ati, TUHAN Raja!

²⁰ Ani meh re ku nang dinge! Kaam puan aku, adi urun Mai.

²¹ Kaam ndai simŭnŭ so ka pinyiraan ngga pinŭtŭn adŭp Mai; Kaam mbŭh ndai sopŭrŭg pingandai bās anŭ ngga Mai ngajar aku.

²² Kaam adi raru bās, TUHAN Raja! Mating Tapa bŭkŭn adi re mun Kaam; tian-ti kieh mbŭh puan nang Kaam sadi adŭ Tapa.

²³ Mating bangsa bŭkŭn re mun Israel, adi Kaam pirupas so jadi urun bada jadi daya adŭp Mai. Kayuh adi bās buang raru kana adi Kaam ndai yŭn ngara mbŭh bada Kaam timagah di ndi ong ong. Kaam pibu bangsa bangsa bŭkŭn ngga tapa tapa ngara darŭm daya Mai masang darŭm pimanu ngara, daya adi Kaam pirupas so Egypt bada jadi daya adŭp Mai.

²⁴ Kaam mbŭh bada Israel adu adu jadi daya adŭp Mai, ka Kaam, TUHAN, mbŭh jadi Tapa ngara.

²⁵ “Ka madin, TUHAN Tapa, pijadi yŭn adu adu janji adi Kaam mbŭh ndai pasar aku ngga bara sesang ku, ka ndai kayuh adi Kaam nang adŭp Mai re ndai.

²⁶ Adŭn Mai re jadi timagah, ka daya re adu adu nang, ‘TUHAN Bisa-pŭrŭg inŭh Tapa Israel.’ Ka Kaam re bada takta ku tan adu adu yŭn barang turap sesang ku.

²⁷ TUHAN Bisa-pŭrŭg, Tapa Israel! Aku birani bidua simŭnŭ ka Kaam, sabab Kaam mbŭh pinandŭng sopŭrŭg kayuh ati di aku, adi urun Mai, ka mbŭh kidaan di aku nang Kaam re bada sesang sesang ku jadi raja.

²⁸ “Ka madin, TUHAN Raja, Kaam inŭh Tapa; Kaam ari ingat janji Mai, ka Kaam mbŭh ndai janji adi raru kana di aku.

²⁹ Aku mite Kaam nyiberkat bara sesang ku isa ngara adu adu kinyam masi Mai. Kaam, TUHAN Raja, mbŭh bijanji an nggen ati, siŭn berkat Mai adu adu di tunduh bara sesang ku.”