2 SAMUEL 6 - Hakcipta - Biatah Bidayuh

Pati Simanya dog Taban ka Jerusalem

¹ David bagan dinge bara soldadu di Israel adi siabo pandai birawan, ka prungun-i agi 30,000 naan.

² Ayŭh nguru ngara ka Baalah di Judah, siŭn taban so nŭ Pati Simanya Tapa, adi dog kadŭn TUHAN Bisa-pŭrŭg, adi bitakta di tunduh cherubim.

³ Ngara tambit-i so ramin Abinadab di tunduh sandah ka na-i di tunduh tibande krita-sapi adi tibŭn. Uzzah ngga Ahio, anak anak dari Abinadab, adi tukang taban krita-sapi anŭ,

⁴ ngga Ahio adi panu di jawin-i.

⁵ David ngga sopŭrŭg daya Israel birajang buang biragu ngga situngang tungang ngara ngga kibās TUHAN. Ngara main kachapi, gambus, gendang, kelentung, ngga sigager.

⁶ Darŭm ngara mandŭg ka tarun yŭn ngiik di Nacon, sapi anŭ sikak, ka Uzzah rasu digŭng Pati Simanya anŭ.

⁷ Jam anŭ gŭh TUHAN baji di Uzzah ka siŭ ayŭh sabab ayŭh dŭh biyŭn stabi. Uzzah kabŭs diginŭ sindŭk Pati Simanya anŭ,

⁸ ka sabab anŭ inŭh tarun anŭ dog kadŭn Perez Uzzah so andu anŭ. David mbŭh raru tuas sabab TUHAN ngga baji-I mbŭh ngukum Uzzah.

⁹ Komŭnŭ David taru TUHAN ka nang, “Simuki meh aku re taban Pati Simanya anŭ madin?”

¹⁰ Jadi ayŭh ndai pikir-i dŭh re taban-i ka Jerusalem. Ayŭh taban-i ka ramin Obed Edom daya adi so kupo Gath.

¹¹ Pati Simanya agi diginŭ taruh buran, ka TUHAN nyiberkat Obed Edom ngga rawang-i.

¹² Raja David dingah sitagar Pati Simanya anŭ TUHAN mbŭh nyiberkat Obed Edom ngga sopŭrŭg kayuh adi-i biyŭn; jadi ayŭh tambit Pati Simanya anŭ so ramin Obed ka taban-i ka Jerusalem ngga gawai bās.

¹³ Kan bara daya anŭ adi taban Pati Simanya anŭ mbŭh panu nŭm sakong, David bada ngara rŭŭ atan adŭp-i jugan ndu sadis ka TUHAN ndi dari sapi ngga ndi anak sapi adi gamu.

¹⁴ David, nēn batur-i banang linen adŭ di kupong-i, birajang ngga situngang tungang-i ngga kibās TUHAN.

¹⁵ Ka sawŭ ayŭh ngga sopŭrŭg daya Israel taban Pati Simanya ndŭg Jerusalem ngga sirais gaŭn ka ngga jawŭn dudu trompet.

¹⁶ Darŭm Pati anŭ dog taban mŭrŭt kupo, Michal, anak dayung Saul, nyingo so pinjan ka kiris Raja David birajang buang-i mirupat mirupat ngga rajang kudus, ka ayŭh mbŭh dŭh raru munos asŭng-i kiris.

¹⁷ Ngara taban Pati anŭ ka na-i di tarun yŭn adŭp-i darŭm Bari Tuhan adi David mbŭh pijog yŭn-i. Komŭnŭ ayŭh jugan sadis ngga sadis bidingan ka TUHAN.

¹⁸ Kan ayŭh muko jugan sadis sadis anŭ, ayŭh nyiberkat bara daya ngga adŭn TUHAN Bisa-pŭrŭg

¹⁹ ka kutung pinguman di sopŭrŭg ngara. Ayŭh nggen ndi baru ruti di barang naan dari ngga dayung di Israel, ndi pire asak dagin, ngga kada buwa anggor adi pisŭk. Komŭnŭ ngara maad ka arŭn adŭp ngara.

²⁰ Ripas anŭ, kan David maad di nggen tabi di rawang adŭp-i, Michal ruah di tudu ayŭh. “Raja Israel mbŭh bandar bandar bada adŭp-i dog stabi andu ati!” ayŭh nang. “Ayŭh pirapa adŭp-i mun daya budo di sirung jawin bara daya-gaji dayung pinurung-i!”

²¹ David nam, “Aku birajang ngga kibās TUHAN, adi mbŭh mien aku bada gati sama mu ngga rawang-i, da jadi pinguru daya-I Israel. Ka aku re babŭ birajang ngga kibās TUHAN,

²² ka re pimangŭh adŭp ku rabis so adi mbŭh. Kuu bisa nang aku au-tarun, pak bara dayung anŭ stabi di aku!”

²³ Michal, anak Saul, dŭh biyŭn anak sitŭkŭd umbur-i.