2 SAMUEL 20 - Hakcipta - Biatah Bidayuh

Sheba Rawan Pinyipritah David

¹ Di Gilgal agi ndi naan daya adi dŭh biguna dŭn Sheba anak Bikri, so tibaran-asar Benjamin. Ayŭh mambak trompet ka nyirais nang, “Dŭhsah piduri David! Dŭhsah tunda ayŭh! O daya Israel, maad adŭ ata!”

² Jadi daya Israel tingge David ka tunda Sheba, pak daya Judah babŭ an bituan di David ka tunda ayŭh panu so Jordan ndŭg Jerusalem.

³ Kan David mbŭh ndŭg istana di Jerusalem, ayŭh bada simŭng naan dayung nyikŭn-i adi ko-i tingge bada jaga istana dog kurung. Ayŭh nyiran ngara, pak dŭh-i nyibŭŭs ngga ngara. Ngara dog kurung sitŭkŭd umbur ngara mun dayung uban.

⁴ Raja nang di Amasa, “Bagan bara daya Judah bada tikuruk ka pari kamati ayō ngara girundi.”

⁵ Amasa matak di bagan ngara, pak ayŭh dŭh pari di tika adi raja muko miratak.

⁶ Jadi raja nang di Abishai, “Sheba re nyusah ata rabis so Absalom. Taban bara daya ku ngga di jiroh ayŭh, te ayŭh tambit kada kupo adi bikuta ka rupas so tangan ta rai-i.”

⁷ Jadi bara daya Joab, ngga bara pingibān raja, ngga sopŭrŭg soldadu adi bŭkŭn matak so Jerusalem ngga Abishai di nudug Sheba.

⁸ Kan ngara mbŭh ndŭg ndi tibande batuh di Gibeon, Amasa bidapŭd ngga ngara. Joab mbŭh nēn piraka perang buang nakin pedang. Darŭm ayŭh masang, pedang-i rudos so sibong-i.

⁹ Joab nang di Amasa, “Ani agah mu, dingan?” ka digen gagap-i ngga tangan tauh-i re sium ayŭh.

¹⁰ Amasa dŭh rada pedang adi di tangan Joab anŭ ndi, ka Joab tabŭk ayŭh di tain-i, ka isi tain-i bubus ruah ka tana. Jam anŭ gŭh ayŭh kabŭs, ka Joab dŭhsah tabŭk ayŭh dinge. Komŭnŭ Joab ngga jurud-i Abishai di tadak Sheba.

¹¹ Ndi so bara daya Joab mijog sindŭk tadang Amasa ka nyirais nang, “Barang naan daya adi raan tunda Joab ngga David patut tunda Joab!”

¹² Tadang Amasa, bigurai ngga deya adŭp-i, guring di yun aran. Ndi naan so daya Joab kiris bara daya sadi rŭŭ, ayŭh tarik kadi tadang anŭ so aran taban ka darŭm tarun ka nutu-i ngga banang.

¹³ Ripas tadang anŭ muko dog kadi so aran, sopŭrŭg bara daya tunda Joab di tadak Sheba.

¹⁴ Sheba panu mutas tarun tana sopŭrŭg tibaran-asar Israel ka mandŭg ka kupo Abel Beth Maacah, ka sopŭrŭg manak Bikri mbŭh tikuruk ka tunda ayŭh ka darŭm kupo.

¹⁵ Bara daya Joab dingah Sheba agi diginŭ, ngara rasu di nyikapung kupo anŭ. Ngara nugung tana di tura ka sapa sindung kupo yŭn minyakŭh ka kareh tana di ribo sindung isa-i rubuh.

¹⁶ Agi ndi naan dayung adi bijak di kupo anŭ. Ayŭh nyirais nang so darŭm kupo, “Dingah, dingah dawŭ-i! Kidaan di Joab bada kamati; aku raan minyu ngga ayŭh.”

¹⁷ Joab di, ka dayung anŭ siken, “Kuu Joab kah?” “Aku, Joab,” ayŭh nam. “Dingah tuan,” ayŭh nang. “Aku dingah,” ayŭh nam.

¹⁸ Ayŭh nang, “Ndun jah ngara siraru nang, ‘Panu ka kupo Abel yŭn dapŭd pinyinam’ — ka anŭ inŭh kayuh adi ngara ndai.

¹⁹ Tung jami kupo inŭh kupo bās, ndi so anŭ adi siabo bamai ka pagŭng di Israel. Mani kuu suba an pirubuh-i? Kuu raan nyirubuh kayuh adi TUHAN dapu kah?”

²⁰ “Manŭn dŭh!” Joab nam. “Aku dŭh re pirusak bait pirabur kupo ngan!

²¹ Anŭ dŭh kayuh adi raan ami ndai. Ndi naan daya dŭn Sheba anak Bikri, adi mandŭg so rais tarun tana sandah Ephraim, ngasu daya bada rawan pinyipritah Raja David. Nyerah ayŭh ka aku, ka aku re bu so kupo ati.” “Kieh re taran ubak-i ka yŭn mu so tibung sindung kupo ati,” dayung anŭ nam.

²² Komŭnŭ ayŭh di ka yŭn bara daya kupo anŭ yŭn re ndai simŭnŭ; ayŭh sawŭ kapŭg ubak Sheba ka taran-i ka yŭn Joab so tibung sindung kupo. Joab mambak trompet ngga kidaan nang bara daya-i bisa bu tingge kupo anŭ. Ngara bu maad, ka Joab pari ka Jerusalem ka yŭn raja.

Bara Pinurung David

²³ Joab inŭh pingubak bara soldadu Israel; Benaiah anak Jehoiada inŭh tukang ngatur bara pingibān David;

²⁴ Adoniram inŭh tukang ngatur daya ndai kraja takan; Jehoshaphat anak Ahilud inŭh tukang jaga rekod;

²⁵ Sheva inŭh tukang pinuris. Zadok ngga Abiathar inŭh imam,

²⁶ ka Ira adi so kupo Jair gŭh ndi so bara imam David.