2 SAMUEL 2 - Hakcipta - Biatah Bidayuh

David dog Garar jadi Raja Judah

¹ Ripas anŭ, David siken TUHAN, “Bisa aku di ka mritah ndi so kupo kupo di Judah?” “Bisa,” TUHAN nam. “Aki ndi?” David siken. “Hebron,” TUHAN nang.

² Jadi David di ka Hebron, taban duwŭh naan sawŭn-i: Ahinoam, adi so Jezreel, ngga Abigail, uban Nabal, adi so Carmel.

³ Ayŭh taban gŭh bara daya-i ngga rawang ngara, ka ngara piramin di kupo kupo maning Hebron.

⁴ Komŭnŭ bara daya Judah mandŭg ka Hebron ka nginyo David jadi raja Judah. Kan David dingah bara daya di Jabesh di Gilead mbŭh kubur Saul,

⁵ ayŭh pait kada daya kamanŭ ngga pinganang: “Isa-i TUHAN nyiberkat angān amai angān mbŭh kiren pinyitŭtŭd ngan di raja ngan darŭm angān kubur ayŭh.

⁶ Ka madin isa-i TUHAN kana buang tŭtŭd ngga angān. Aku mŭnŭ gŭh re kana ngga angān sabab kayuh adi angān mbŭh ndai.

⁷ Jadi bake ka pagan meh! Saul adi raja ngan mbŭh kabŭs, ka daya Judah mbŭh nginyo aku bada jadi raja ngara.”

Ishbosheth dog Garar jadi Raja Israel

⁸ Pingibās bara soldadu Saul, Abner anak Ner, mbŭh bu ngga Ishbosheth anak Saul, mutas yang Jordan di ka Mahanaim.

⁹ Diginŭ Abner bada Ishbosheth jadi raja di tarun tana Gilead, Asher, Jezreel, Ephraim, ka Benjamin, ka samŭn ndi tarun tana Israel.

¹⁰ Ayŭh mbŭh pat puru sawa umbur-i kan ayŭh dog garar jadi raja Israel, ka ayŭh mritah sitŭkŭd duwŭh sawa. Pat tibaran-asar Judah tŭtŭd dŭ di David,

¹¹ ka so Hebron ayŭh mritah Judah sitŭkŭd ju sawa sitangah.

Israel ngga Judah Biperang

¹² Abner ngga bara pinurung Ishbosheth di ka kupo Gibeon so Mahanaim.

¹³ Joab, anak Zeruiah, ngga soldadu David adi bŭkŭn bidapŭd ngga ngara di pagong, di yŭn sopŭrŭg ngara samah guru, ndi tibaran tura ka parad ndi ka anŭ ndi tura ka parad andi.

¹⁴ Abner nang di Joab, “Ja ata bada soldadu adi mara so barang parad biraruh pakai sinyata.” “Bisa,” Joab nam.

¹⁵ Jadi simŭng duwŭh naan daya, ngarun Ishbosheth ngga tibaran-asar Benjamin, biraruh rawan simŭng duwŭh naan daya David.

¹⁶ Barang naan nakap rawan-i di ubak ka tabŭk pedang-i di tigang rawan-i, ndŭg ka sopŭrŭg ngara adi duwŭh puru-pat naan samah tumbang ka kabŭs. Ngapŭi tarun anŭ dog kadŭn “Tana Pedang.”

¹⁷ Komŭnŭ ngara adi bŭkŭn samah makat ka bisaad, ka Abner ngga bara daya Israel dog ngarah bara soldadu David.

¹⁸ Taruh madis anak Zeruiah agi diginŭ: Joab, Abishai, ngga Asahel. Asahel, adi tungang bikaduh raju mun jerak,

¹⁹ rasu tadak Abner, nŭtŭn tudu ayŭh.

²⁰ Abner kimat punok ka nang, “Kuu kah anŭ, Asahel?” “Aku,” ayŭh nam.

²¹ “Dŭhnyah tadak aku!” Abner nang. “Tadak ndi naan so bara soldadu ka nŭh tambit kayuh adi-i biyŭn.” Pak Asahel babŭ gŭh tadak ayŭh.

²² Abner nang dinge di ayŭh, “Dŭhnyah tadak aku! Dŭhnyah takan aku siŭ kuu? Simuki aku re tungang situra jawin ngga kaka mu Joab?”

²³ Pak Asahel ngandŭ; jadi Abner, nyipunok tabŭk jarok-i, miratos tain-i ka punok. Asahel tumbang rasu kabŭs, ka barang naan adi kiris tadang-i rŭŭ ka mijog diginŭ.

²⁴ Pak Joab ngga Abishai rasu tadak Abner, ka arong singumi andu ngara mandŭg ka sandah Ammah, adi tura ka timor Giah di aran nuju tarun tana-pajam Gibeon.

²⁵ Bara daya adi so tibaran-asar Benjamin tikuruk maning Abner dinge ka samah sidia kajŭn di tibung ndi sandah.

²⁶ Abner nyirais nang di Joab, “Sah kah ata adu adu bisaad? Dŭh kah kuu puan nang pinŭbŭn-i re jadi dendam adŭ? Kieh ati ndi bangsa ngga kuu. Ndŭg sinde kuu re tandah bara daya mu tadak kieh?”

²⁷ “Aku bipayu ngga adŭn Tapa adi udip,” Joab nam, “kambŭi kuu dŭh minyu tejah, bara daya ku manŭn re adu adu tadak kuu ndŭg isan isan sipagi.”

²⁸ Jadi Joab mambak trompet-i ndu tandā di bara daya-i bada dŭh tia tadak bara daya Israel; ka ngara meh rasu ko bisaad.

²⁹ Abner ngga bara daya-i panu kadŭg rubān Jordan ndi ngarŭm anŭ; ngara mutas Yang Jordan, ka ripas ko panu ndi isan isan andu jawa ndi, ngara mbŭh pari ka Mahanaim.

³⁰ Kan Joab mbŭh dŭh tia tadak ngara, ayŭh nguruk sopŭrŭg daya-i ka kiris simŭng-prii naan ngara mbŭh mating, samŭn Asahel.

³¹ Bara daya David mbŭh siŭ 360 naan daya Abner so tibaran-asar Benjamin.

³² Joab ngga bara daya-i tambit tadang Asahel ka kubur-i di kubur rawang di Bethlehem. Komŭnŭ ngara panu ndi ngarŭm anŭ ka ngga siri jawa ngara mbŭh pari ka Hebron.